ఆంధ్రప్రదేశ్ ముఖ్యమంత్రి చంద్రబాబు నాయుడు దగ్గరకి తాజాగా ఒక ఫైల్ వచ్చింది. సీఎం పేషీలో డిప్యూటీ సెక్రటరీగా పోస్టుకు పెంచల్ రెడ్డి అనే పరిశ్రమల శాఖ అధికారిని నియమిస్తే బాగుంటుందనేది ఆ ఫైల్‌లో వున్న సారాంశం. చంద్రబాబు దగ్గరకి ఫైల్ రావాలంటే అది రకరకాల దశలు దాటుకుని రావాలి. అన్ని దశలు దాటుకుని వచ్చిన ఆ ఫైల్ మీద చంద్రబాబు ఓ సంతకం చేసేశారంటే పెంచల్ రెడ్డి అనే అధికారి ఎంచక్కా సీఎం పేషీలో డిప్యూటీ సెక్రటరీ పోస్టులో కూర్చునేవారు. అయితే ఇంతకీ ఎవరీ పెంచల్ రెడ్డి అని ఎంక్వయిరీ చేసిన చంద్రబాబు నాయుడికి మైండ్ బ్లాక్ అయ్యే లెవల్లో సమాధానం వచ్చింది. సదరు పెంచల్ రెడ్డి ఎవరో కాదు. వైసీపీ నాయకుడు బాలినేనీ శ్రీనివాసరెడ్డికి చాలా సన్నిహితుడు, బంధువు, అలాగే వైసీపీ నాయకుడు జగన్‌కి కూడా బంధువే. జగన్ పార్టీ సన్నిహితుడికి తన పేషీలో స్థానం ఇవ్వడం అంటే కొరివితో తల గోక్కున్నట్టేనని అర్థం చేసుకున్న చంద్రబాబు అర్జెంటుగా ఆ ఫైలును పక్కన పెట్టేసినట్టు తెలుస్తోంది. వైసీపీ నాయకులకు సన్నిహితుడు, బంధువు అయిన వ్యక్తిని తన పేషీలోకి తీసుకోవాలంటూ తనకు ప్రతిపాదన పంపిన వారి మీద చంద్రబాబును దృష్టి సారించినట్టు తెలుస్తోంది.