అంతర్జాతీయ ఆర్థిక రంగంలో దశాబ్దాలుగా తిరుగులేని సురక్షిత కోటగా విరాజిల్లిన స్విస్ బ్యాంకింగ్ రహస్య సామ్రాజ్యం ఇప్పుడు తీవ్రమైన మార్పులకు లోనవుతోంది. ఒకప్పుడు ప్రపంచవ్యాప్తంగా ఉన్న బిలియనీర్లు, రాజకీయ నాయకులు, వివాదాస్పద పారిశ్రామికవేత్తల గుప్త నిధులకు కేరాఫ్ అడ్రస్‌గా నిలిచిన స్విట్జర్లాండ్..  ఇప్పుడు తన పంథాను మార్చుకోక తప్పని పరిస్థితి ఏర్పడింది. భౌగోళిక రాజకీయ పరిణామాలు, అంతర్జాతీయ నియంత్రణ సంస్థల ఒత్తిడి కారణంగా ఈ రహస్య ఆర్థిక వ్యవస్థలో చీలికలు వస్తున్నాయి. దీని ఫలితంగా ప్రపంచ సంపద అంతా ఇప్పుడు ఆసియా, మధ్యప్రాచ్య దేశాల వైపు వేగంగా వలస వెళ్తోంది. ముఖ్యంగా సింగపూర్, దుబాయ్ వంటి నగరాలు అంతర్జాతీయ ధనికులకు కొత్త ఆర్థిక కేంద్రాలుగా మారుతుండటం గమనార్హం.  

గతంలో స్విస్ బ్యాంకుల్లో ఖాతా తెరవడం అంటే చట్టాలకు దొరకని అపరాధ  సంపదగా భావించేవారు. కానీ ఇటీవలి కాలంలో, ముఖ్యంగా తూర్పు ఐరోపాలో   రష్యా ఉక్రెయిన్ సంక్షోభం తర్వాత గ్లోబల్ బ్యాంకింగ్ స్వరూపమే మారిపోయింది. స్విట్జర్లాండ్ తన శతాబ్దాల నాటి సాంప్రదాయ ఆర్థిక తటస్థ విధానాన్ని వీడి, యూరోపియన్ యూనియన్  (ఈయూ) విధించిన ఆంక్షలకు మద్దతు పలికింది. ఈ క్రమంలో రష్యా ప్రభుత్వానికి, ఆ దేశానికి చెందిన ప్రముఖ ఒలిగార్చ్‌లకు చెందిన బిలియన్ల కొద్దీ డాలర్ల ఆస్తులను స్విస్ బ్యాంకులు నిలిపివేశాయి. ప్రభుత్వ అధికారిక లెక్కల ప్రకారం దాదాపు 5.8 బిలియన్ స్విస్ ఫ్రాంకుల ప్రైవేట్ ఆస్తులతో పాటు..  రష్యన్ సెంట్రల్ బ్యాంకుకు చెందిన మరికొన్ని నిధులను కూడా ఫ్రీజ్ చేశాయి.

ఈ సంచలన చర్యతో స్విస్ ఖాతాలు అంతర్జాతీయ రాజకీయ నిర్ణయాలకు అతీతం కావనే స్పష్టమైన సందేశం ప్రపంచ సంపన్నులకు అందింది.  మరోవైపు, అంతర్జాతీయంగా మనీ లాండరింగ్ నిరోధక చట్టాలు  కఠినతరం కావడం,  కామన్ రిపోర్టింగ్ స్టాండర్డ్స్  (సీఆర్ఎస్) అమలులోకి రావడం స్విస్ రహస్యాలకు గండికొట్టింది. ఈ నూతన వ్యవస్థల ద్వారా పన్ను సమాచారాన్ని వివిధ దేశాలతో ఆటోమేటిక్‌గా పంచుకునే వీలు కలగడంతో..  పన్ను ఎగవేతదారులకు స్విట్జర్లాండ్ వేదిక కాకుండా పోయింది. స్విస్ ఆర్థిక రంగ నియంత్రణ సంస్థ (ఫిన్మా) ఒత్తిడితో అక్కడి బ్యాంకులు ఇప్పుడు  హై రిస్క్ కేటగిరీలో ఉన్న రాజకీయ నేతలు, వివాదాస్పద వ్యాపారవేత్తల ఖాతాలను సిస్టమాటిక్‌గా తొలగిస్తున్నాయి. ఈ  ఆఫ్-బోర్డింగ్  ప్రక్రియ వల్ల ఒక్కో బ్యాంక్ వందలాది ఖాతాలను మూసివేయాల్సి వచ్చింది, ఇందులో మిలియన్ల కొద్దీ నిధులు ఉన్న ఖాతాలు కూడా ఉన్నాయి. 

ప్రస్తుత పరిస్థితుల్లో స్విస్ బ్యాంకులు కేవలం నల్లధనానికి ఆశ్రయం ఇవ్వడం మానేసి, చట్టబద్ధమైన క్లీన్ మనీకి మాత్రమే సేవలందించే కేంద్రాలుగా తమను తాము రీబ్రాండ్ చేసుకుంటున్నాయి.  స్విట్జర్లాండ్‌లో నియంత్రణలు పెరగడంతో ప్రపంచ వ్యాప్తంగా  మల్టీపోలార్ వెల్త్ ఆర్కిటెక్చర్ రూపుదిద్దుకుంటోంది.  ఆసియాలో సింగపూర్ తన చట్టపరమైన పటిష్టత, రాజకీయ స్థిరత్వం, వ్యాపార అనుకూల విధానాల వల్ల సరికొత్త ఆర్థిక హబ్‌గా అవతరించింది. గత దశాబ్ద కాలంలో సింగపూర్‌లో అసెట్స్ అండర్ మేనేజ్‌మెంట్   పరిమాణం ఊహించని రీతిలో పెరిగింది. అదేవిధంగా.. మధ్యప్రాచ్యంలోని దుబాయ్ నగరంలో వ్యక్తిగత ఆదాయపు పన్ను లేకపోవడం, క్రిప్టో కరెన్సీల పట్ల అను కూల వైఖరి, అంతర్జాతీయంగా తటస్థ ఇమేజ్ కలిగి ఉండటంతో యూరోపియన్, రష్యన్ సంపదను భారీగా ఆకర్షిస్తోంది. 

చైనా,  తూర్పు ఆసియా దేశాల ధనికులకు హాంకాంగ్ ఇప్పటికీ ప్రధాన ద్వారంగానే కొనసాగుతోంది. ఈ విధంగా ఒకప్పుడు ఆఫ్-షోర్ బ్యాంకింగ్ అంటే కేవలం స్విట్జర్లాండ్ మాత్రమే అనుకునే కాలం పోయి.. ఇప్పుడు జియోపాలిటికల్ డైవర్సిఫికేషన్ యుగం నడుస్తోంది.  భారతీయ రాజకీయాల్లో కూడా స్విస్ బ్యాంకుల్లో నల్లధనం అనే అంశం దశాబ్దాలుగా ఒక సంచలన నారేటివ్‌గా ఉంటూ వస్తోంది. దేశంలోని ప్రముఖ రాజకీయ కుటుంబాలు, నేతల గుప్త నిధులపై ప్రజాస్వామ్య వేదికలపై ఎన్నో చర్చలు జరిగాయి. గతంలో యూపీఏ   హయాంలో పార్టిసిపేటరీ నోట్స్   ద్వారా విదేశీ నిధులు దేశీయ స్టాక్ మార్కెట్లు, రియల్ ఎస్టేట్ రంగాల్లోకి ప్రవహించి ఆస్తి బుడగలను సృష్టించాయనే విశ్లేషణలు ఉన్నాయి. అయితే..  ప్రస్తుత అంతర్జాతీయ సమాచార మార్పిడి ఒప్పందాల వల్ల భారత పన్ను విభాగానికి విదేశాల్లోని భారతీయుల ఖాతాల డేటా ఆటోమేటిక్‌గా అందుతోంది. దీనివల్ల రాజకీయ నల్లధనాన్ని, కార్పొరేట్ పన్ను ఎగవేతలను పూర్తిగా నిర్మూలించలేకపోయినా..  వాటిని దాచిపెట్టే రహస్య సామర్థ్యం మాత్రం గణనీయంగా క్షీణించింది.  

అయితే..  స్విస్ బ్యాంకులు కఠినతరంగా మారినంత మాత్రాన నల్లధనం పూర్తిగా మాయమైపోదని నిపుణులు విశ్లేషిస్తున్నారు. భారతదేశానికి చెందిన గుప్త నిధులు ఒకవేళ ఉంటే..  అవి స్విట్జర్లాండ్ నుండి సింగపూర్, దుబాయ్ లేదా ఇతర కరేబియన్ ఆఫ్-షోర్ ప్రాంతాలకు తరలిపోయే ప్రమాదం ఉంది. కానీ గమనించాల్సిన విషయమేమిటంటే..  ఆయా కొత్త కేంద్రాలపై కూడా ఫైనాన్షియల్ యాక్షన్ టాస్క్ ఫోర్స్  వంటి అంతర్జాతీయ సంస్థల ఒత్తిడి పెరుగుతోంది. గ్లోబల్ ఎఎంఎల్ ప్రమాణాలు ప్రపంచవ్యాప్తంగా ఒకే తీరుగా అమలువుతుండటంతో..  భవిష్యత్తులో శాశ్వతంగా నల్లధనాన్ని దాచుకోగలిగే సురక్షిత స్థావరాలు అంటే ట్యాక్స్ హెవెన్స్  క్రమంగా అంతరించిపోనున్నాయి.  భారత ప్రజాస్వామ్య వ్యవస్థలో పారదర్శకతను పెంచేందుకు ఈ అంతర్జాతీయ మార్పులు ఎంతో దోహదపడనున్నాయి. ఇకపై రాజకీయ వేదికలపై కేవలం  స్విస్ బ్యాంక్ నినాదాలు చేయడం కంటే..  అంతర్జాతీయ సహకారం ద్వారా లభించే ఖచ్చితమైన డేటా ఆధారంగా చట్టపరమైన చర్యలు చేపట్టడంపై దృష్టి పెట్టాల్సి ఉంటుంది. కొత్తగా రూపుదిద్దుకుంటున్న ఆర్థిక హబ్‌ల వైపు వెళ్లే నిధుల ప్రవాహంపై నిఘా ఉంచడానికి ఇన్వెస్టిగేటివ్ జర్నలిజం, పార్లమెంటరీ కమిటీల పరిశీలన, పౌర సమాజం నుండి ఒత్తిడి నిరంతరం అవసరమవుతాయి.  చివరిగా..  స్విస్ బ్యాంకింగ్ వ్యవస్థలో రహస్య శకం ముగిసి ఉండవచ్చు కానీ.. అది ప్రపంచ ఆర్థిక రంగానికి ఒక కొత్త అధ్యాయాన్ని పరిచయం చేసింది. స్విట్జర్లాండ్ ఇప్పుడు సాంకేతికత, ఫిన్‌టెక్, క్రిప్టో వ్యాలీ (జూగ్) వంటి డిజిటల్ ఆస్తుల నియంత్రణ వైపు అడుగులు వేస్తూ..  పారదర్శకమైన వెల్త్ మేనేజ్‌మెంట్ కేంద్రంగా మారుతోంది. అంతర్జాతీయంగా నల్లధనం దాచుకోవడానికి ప్రపంచం చిన్నదవుతున్న వేళ, ప్రజాస్వామ్య దేశాలకు పారదర్శకతను నెలకొల్పే అవకాశాలు మరింత విస్తృతమవుతున్నాయి

-సీతారాం కంఠంనేని

ఈ విశ్లేషణ మీకు నచ్చినట్లయితే, దయచేసి https://www.teluguone.com పోర్టల్ ను  ఫాలో అవ్వండి. లైక్ చేయండి. షేర్ చేయండి. మీ విలువైన అభిప్రయాలను తెలియజేయండి.