కృష్ణా జిల్లా చల్లపల్లి పోలీస్ స్టేషన్ మంగళవారం (మార్చి 31)  ఉదయం భారీ పేలుడు సంభవించింది. ఈ ఘటనలో ఓ ఎస్సైతో పాటు మరో ముగ్గురు పోలీసులు తీవ్రంగా గాయపడ్డారు.  వివరాలిలా ఉన్నాయి. అక్రమంగా నిలవ ఉంచిన   మందుగుండు సామాగ్రిని స్వాధీనం చేసుకుని పోలీసు స్టేషన్‌కు తీసుకొచ్చి పరిశీలిస్తున్న సమయంలో ఈ పేలుడు సంభవించింది.  

పేలుడు తీవ్రతకు స్టేషన్ భవనం పాక్షికంగా దెబ్బతింది. స్టేషన్ ఆవరణలో నిలిపి ఉంచిన కొన్ని వాహనాలు కూడా ధ్వంసమయ్యాయి.  ఈ పేలుడులో గాయపడిన పోలీసులను హుటాహుటిన ఆస్పత్రికి తరలించారు.  చల్లపల్లి సీఐ కేఎస్ రావు ఘటనా స్థలానికి చేరుకుని పరిస్థితిని సమీక్షించారు.  ప్రమాదానికి గల కచ్చితమైన కారణాలపై ఆరా తీస్తున్నారు. ఉన్నతాధికారులు ఈ ఘటనపై పూర్తిస్థాయి దర్యాప్తుకు ఆదేశించారు. కాగా పేలుడు శబ్దానికి ఆ పరిసర ప్రాంతాల ప్రజలు తీవ్ర భయాందోళనలకు గురయ్యారు.