ఒకప్పడు శక్తిమాన్‌ అన్న పేరు వింటే అదేదో టీవీ సీరియల్‌ అనుకునేవారు. కానీ ఇప్పడు అదో గుర్రం పేరు అని కూడా జనాలకి స్ఫురిస్తోంది. ఉత్తరాఖండ్‌కు చెందిన ఈ పోలీసు గుర్రం మీద ఓ బీజేపీ ఎమ్మెల్యే తన జులుం చూపించిన విషయం తెలిసిందే! గొడ్డుని బాదినట్లు అన్న సామెతకు మించి సదరు ఎమ్మెల్యే ఈ మూగజీవిని బాదడంతో, శక్తిమాన్‌ అక్కడికక్కడే కుప్పకూలిపోయింది. శక్తిమాన్‌ కాలుకి తీవ్ర గాయాలు అయ్యాయని గ్రహించిన పశువైద్యలు ఎంతగా ప్రయత్నించినా, గాయాలను మాన్పలేకపోయారు. దాంతో వేగంగా కుళ్లిపోతున్న గుర్రం కాలుని తీసివేయక తప్పని స్థితి వచ్చింది. ఆ స్థానంలో త్వరలోనే ఓ కృత్రిమ కాలుని అమరుస్తామని వైద్యులు పేర్కొన్నారు. శక్తిమాన్ మీద ప్రజాప్రతినిధి జులుంకి సంబంధించిన వీడియోలు సోషల్‌ మీడియాలో వస్తృతంగా ప్రచారం కావడంతో, సదరు ఎమ్మెల్యేని అరెస్టు చేయాలంటూ పోలీసుల మీద ఒత్తిడి పెరిగిపోయింది. దీంతో గణేష్‌ జోషి అనే ఆ ఎమ్మెల్యేని నిన్న పోలీసులు అరెస్టు చేయక తప్పలేదు. అయితే కేవలం అరెస్టుతోనే ఈ వ్యవహారం ఆగేట్లు కనిపించడం లేదు. గణేష్‌ జోషిని పార్టీ నుంచి బహిష్కరించాలంటూ, సాక్షాత్తూ కేంద్ర మంత్రి మేనకా గాంధి డిమాండ్ చేశారు. ప్రజాప్రతినిధిగా ఉంటే చట్టాన్ని తన చేతిలోకి తీసుకోవచ్చుననుకునే వారికి, ఇప్పటి సంఘటన ఓ గుణపాఠంగా మిగిలిపోవచ్చు.