ఆంద్రప్రదేశ్ రాజధానికి గొప్ప చారిత్రిక నేపధ్యం కలిగిన ‘అమరావతి’ పేరును ముఖ్యమంత్రి చంద్రబాబు నాయుడు ఖరారు చేసినట్లు తాజా సమాచారం. అచ్చమయిన తెలుగుదనం ఉట్టిపడుతున్న అమరావతి గురించి కవులు, సాహితీవేత్తలు తమ రచనలలో అనేకవిధాలుగా వర్ణించారు. అంతేగాక ‘అమరావతి’ యావత్ రాష్ట్ర ప్రజలందరికీ సుపరిచితమయిన పేరు. దానితో ప్రజలు చక్కటి అనుబంధం కలిగి ఉన్నారు. ఇక అమరావతి పేరు వెనుకున్న బౌద్ధ నేపధ్యం వలన రాష్ట్ర రాజధాని నగరానికి, తద్వారా రాష్ట్రానికి కూడా ప్రపంచ దేశాలలో చాలా త్వరగా గుర్తింపు ఏర్పడుతుందనే అభిప్రాయంతోనే చంద్రబాబు నాయుడు ఈపేరును ఖరారు చేసినట్లు తెలుస్తోంది. నిజానికి మొన్న తుళ్ళూరులో ఉగాది వేడుకలు జరుపుకొన్నప్పుడే చంద్రబాబు నాయుడు రాజధాని పేరు ప్రకటించాలనుకొన్నారు. కానీ ముందుగా అధికారికంగా అసెంబ్లీలో ప్రకటించి సభ్యుల ఆమోదం పొందిన తరువాతే బయట ప్రకటించడం మంచిదనే ఆలోచనతో ఆ ఆలోచన విరమించుకొన్నట్లు తెలుస్తోంది. కానీ ఈ విషయం ఎలాగో మీడియాకు తెలియడంతో ఇంకా అధికార ప్రకటన వెలువడక ముందే ప్రజలకు తెలిసిపోయింది. కనుక చంద్రబాబు నాయుడు ఈరోజే అసెంబ్లీలో అధికారికంగా ప్రకటించవచ్చును.