సాంకేతిక ప్రపంచంలో  ఫుల్ స్టాక్ దిగ్గజంగా గూగుల్ ప్రస్థానం 

సాంకేతిక ప్రపంచంలో  ఫుల్ స్టాక్ దిగ్గజంగా గూగుల్ ప్రస్థానం కృత్రిమ మేధ (ఏఐ) విభాగంలో ఒకప్పుడు తీవ్రమైన సవాళ్లను, విమర్శలను ఎదుర్కొంది.  టెక్ దిగ్గజం ఆల్ఫాబెట్ (గూగుల్ మాతృసంస్థ) ప్రస్తుతం మార్కెట్లో అద్భుతమైన రీతిలో పుంజుకుంది. చాట్-జీపీటీ వంటి సరికొత్త జనరేటివ్ ఏఐ సాధనాలు అందుబాటులోకి వచ్చిన తరుణంలో, గూగుల్ సాంప్రదాయ సెర్చ్ ఇంజిన్ ఉనికి ప్రమాదంలో పడిందని పారిశ్రామిక నిపుణులు, పెట్టుబడిదారులు ఆందోళన వ్యక్తం చేశారు. అయితే..  వాటన్నింటినీ పటాపంచలు చేస్తూ గూగుల్ సరికొత్త ఆవిష్కరణలతో మార్కెట్లోకి దూసుకువచ్చింది. ఈ పరిణామాల నేపథ్యంలో ప్రస్తుతం ఆల్ఫాబెట్ సంస్థ పట్ల అంతర్జాతీయ వ్యాపార వర్గాల్లో అత్యంత సానుకూల వాతావరణం ఏర్పడింది.  గడిచిన ఏడాది కాలంలో ఆల్ఫాబెట్ సంస్థ సాధించిన ఆర్థిక వృద్ధి అంతర్జాతీయ మార్కెట్‌ను ఆశ్చర్యపరిచింది. ఈ సంస్థ  షేర్ల విలువ ఏకంగా 140 శాతం మేర వృద్ధిని నమోదు చేయడం విశేషం. అంతేకాకుండా, గడచిన కొద్ది కాలంలో ప్రపంచంలోనే అత్యంత విలువైన కంపెనీగా కూడా ఆల్ఫాబెట్ అవతరించడం గూగుల్ సాధించిన విజయానికి నిదర్శనంగా నిలుస్తోంది. 

ఒకప్పుడు వెనుకబడిందనే వ్యాఖ్యల నుండి నేడు గ్లోబల్ టెక్ మార్కెట్‌లో అగ్రశ్రేణి శిఖరానికి చేరడం వెనుక సంస్థ  దీర్ఘకాలిక వ్యూహాలు,  పరిశోధనలు స్పష్టంగా కనిపిస్తున్నాయి.  వాస్తవానికి ఏఐ రంగానికి గూగుల్ సంస్థ ఎంతో కాలం క్రితమే బలమైన పునాదులు వేసింది. 2014లోనే డీప్‌మైండ్ సంస్థను హస్తగతం చేసుకోవడం.. ఆ తర్వాత టెక్నాలజీ ప్రపంచంలో విప్లవాత్మక మార్పులు తెచ్చిన ట్రాన్స్‌ఫార్మర్ ఆర్కిటెక్చర్‌ను ఆవిష్కరించడం ద్వారా గూగుల్ తన ప్రాధాన్యతను చాటుకుంది. అయితే, 2022 చివరి భాగంలో ఓపెన్ఏఐ (OpenAI) వంటి సంస్థలు మార్కెట్లోకి ప్రవేశించి సంచలనం సృష్టించినప్పుడు గూగుల్ కొంతవరకు ఆత్మరక్షణలో పడాల్సి వచ్చింది. ఆ సమయంలో గూగుల్ ప్రవేశపెట్టిన  జెమిని తొలి సంస్కరణ ఆశించిన ఫలితాలను ఇవ్వకపోవడం..    సాంకేతిక లోపాలు తలెత్తడం వల్ల సంస్థ ప్రతిష్టకు స్వల్ప విఘాతం కలిగింది.  అయినప్పటికీ, పట్టువదలకుండా గూగుల్ శాస్త్రవేత్తలు, ఇంజనీర్లు చేసిన కృషి వల్ల జెమిని మోడల్స్ అత్యంత శక్తిమంతంగా రూపాంతరం చెందాయి. ప్రస్తుత గణాంకాల ప్రకారం ప్రపంచవ్యాప్తంగా దాదాపు 750 మిలియన్లకు పైగా యాక్టివ్ వినియోగదారులు జెమిని ఏఐ సేవలను క్రమం తప్పకుండా వినియోగిస్తున్నారు. ఇది గూగుల్ సాంకేతికత ఎంత వేగంగా ప్రజాదరణ పొందిందో తెలియజేస్తోంది. 

ప్రస్తుతం జెమిని మోడల్స్, డీప్‌మైండ్ పరిశోధనా విభాగాలు, గూగుల్ క్లౌడ్ సర్వీసెస్, సొంతంగా తయారు చేసుకుంటున్న టిపియు చిప్‌లు,  విస్తృతమైన ఆండ్రాయిడ్ పంపిణీ వ్యవస్థ వంటి అన్ని కీలక వనరులు ఒకే గోడుగు కింద ఉండటం ఆల్ఫాబెట్‌కు ఉన్న అతిపెద్ద సానుకూలాంశం. అందుకే పరిశ్రమలో దీనిని  ఫుల్ స్టాక్  ఏఐ పవర్‌హౌస్‌గా అభివర్ణిస్తున్నారు.  గూగుల్ సంస్థ సాధిస్తున్న ఈ విజయాల వెనుక అంతర్గతంగా అభివృద్ధి చేసిన కస్టమ్ టెన్సార్ ప్రాసెసింగ్ యూనిట్ (TPU) చిప్‌ల పాత్ర అత్యంత కీలకమైనది. ప్రస్తుతం మార్కెట్లో చిప్ తయారీలో రారాజుగా ఉన్న ఎన్విడియా సంస్థకు ప్రత్యామ్నాయంగా గూగుల్ ఈ చిప్‌లను తీర్చిదిద్దింది. ఇవి గూగుల్ క్లౌడ్ వ్యాపారంలో విప్లవాత్మకమైన మార్పులకు కారణమయ్యాయి. వచ్చే ఏడాది నాటికి ఈ టిపియు ఆధారిత అమ్మకాల ద్వారా వచ్చే ఆదాయం దాదాపు 61 బిలియన్ డాలర్ల మార్కును తాకవచ్చని ఆర్థిక నిపుణులు అంచనా వేస్తున్నారు. దీనికి తోడు గూగుల్ క్లౌడ్ ఆదాయం 63 శాతం మేర పెరగడం..  దాదాపు 75 శాతం మంది క్లయింట్లు ఎండ్-టు-ఎండ్ స్టాక్‌ను వినియోగిస్తుండటం సంస్థ యొక్క ఆర్థిక పటిష్టతకు అద్దం పడుతోంది.  

వ్యూహాత్మక భాగస్వామ్యాల విషయానికి వస్తే..  ప్రముఖ ఏఐ స్టార్టప్  ఆంత్రోపిక్  (Anthropic) సంస్థతో కుదుర్చుకున్న 200 బిలియన్ డాలర్ల విలువైన క్లౌడ్ ఒప్పందం గూగుల్ చరిత్రలో మరో మైలురాయిగా నిలిచింది. ఇక్కడ గూగుల్ ఒక వినూత్నమైన  వర్చువల్ సైకిల్  వ్యూహాన్ని అమలు చేస్తోంది. పెట్టుబడిదారుల నుండి సేకరించిన నిధులను ప్రముఖ స్టార్టప్‌లలో పెట్టుబడిగా పెట్టడం..  తిరిగి ఆయా స్టార్టప్‌లు తమ డేటా అవసరాల కోసం గూగుల్ క్లౌడ్ సేవలను వినియోగించుకునేలా చేయడం ద్వారా తన ఆదాయాన్ని తానే స్వయంగా వృద్ధి చేసుకునేలా గూగుల్ ప్రణాళికలు రచించింది. ఏఐ రంగంలో ఏ విజేత నిలిచినా, వారు చివరికి గూగుల్ క్లౌడ్ లేదా టిపియు మౌలిక సదుపాయాలపై ఆధారపడక తప్పని పరిస్థితిని గూగుల్ కల్పించింది.  ఇలాంటి అద్భుతమైన విజయాలు,  వృద్ధి రేటు కనిపిస్తున్నప్పటికీ.. భవిష్యత్తులో ఆల్ఫాబెట్ సంస్థ కొన్ని కీలకమైన సవాళ్లను ఎదుర్కోవాల్సి ఉంటుంది. 

రాబోయే రోజుల్లో సంస్థ యొక్క మూలధన వ్యయం   భారీగా పెరిగే అవకాశాలు స్పష్టంగా కనిపిస్తున్నాయి. ఈ వ్యయాలు దాదాపు 190 బిలియన్ డాలర్ల వరకు చేరవచ్చనీ, ఇది 2025 నాటి పెట్టుబడుల స్థాయి కంటే రెట్టింపు అని అంచనాలు చెప్తున్నాయి. ఇంతటి భారీ మొత్తంలో చేసే పెట్టుబడులను తిరిగి లాభాల రూపంలోకి,  గరిష్ట రాబడులుగా ఎలా మార్చాలనేది గూగుల్ యాజ మాన్యం ముందున్న అతిపెద్ద సవాలు.  మరోవైపు, సెర్చ్ ఇంజిన్,   డిజిటల్ కామర్స్ రంగాలలో సరికొత్త  ఏజెంటిక్ (Agentic) ఏఐ వ్యూహాలను గూగుల్ ఏ విధంగా అమలు చేయబోతోందనే అంశంపై పరిశ్రమ వర్గాల్లో ఆసక్తి నెలకొంది. రాబోయే గూగుల్ ఐ/ఓ (Google I/O) సదస్సు వేదికగా ఈ భవిష్యత్తు ప్రణాళికలపై పూర్తి స్థాయి స్పష్టత వచ్చే అవకాశం ఉందని నిపుణులు భావిస్తున్నారు. 

నేడు ఆల్ఫాబెట్ అనేది కేవలం సమాచారాన్ని వెతికే ఒక సెర్చ్ కంపెనీ మాత్రమే కాదు, ఇది ఆధునిక డిజిటల్ ఆర్థిక వ్యవస్థకు ఒక బలమైన వెన్నెముకగా రూపాంతరం చెందింది. రాబోయే దశాబ్ద కాలంలో గూగుల్ సాంకేతిక రంగాన్ని శాసించే తిరుగులేని శక్తిగా ఎదగడానికి ఈ మౌలిక సదుపాయాల విస్తరణ ఎంతగానో దోహదపడనుంది. అంతిమంగా, ఏఐ రేసులో తానే అగ్రస్థానంలో నిలవడమే కాకుండా, ఇతర కృత్రిమ మేధ సంస్థలకు సైతం ప్రాథమిక సాంకేతిక సరఫరాదారుగా మారడం ద్వారా ఆల్ఫాబెట్ తన అప్రతిహత శక్తిని చాటుకుంది. 

- సీతారాం కంఠంనేని

ఈ విశ్లేషణ మీకు నచ్చినట్లయితే, దయచేసి https://www.teluguone.com పోర్టల్ ను  ఫాలో అవ్వండి. లైక్ చేయండి. షేర్ చేయండి. మీ విలువైన అభిప్రయాలను తెలియజేయండి.