ఉత్తరాంధ్ర ప్రగతికి ప్రతిరూపంగా నిలిచే భోగాపురం అల్లూరి సీతారామరాజు అంతర్జాతీయ విమానాశ్రయం అందుబాటులోకి రావడంపై కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు తీవ్ర సంతోషం వ్యక్తం చేశారు. ప్రతిపక్షాలు చేసే విమర్శలు, హేళనలకు కూటమి ప్రభుత్వం తమ అభివృద్ధి సంక్షేమ కార్యక్రమాలతోనే తగిన సమాధానం ఇచ్చిందని ఆయన వ్యాఖ్యానించారు. ప్రధానమంత్రి నరేంద్ర మోదీ చేతుల మీదుగా భోగాపురం విమానాశ్రయం అధికారికంగా జాతికి అంకితమైన చారిత్రాత్మక ఘట్టం వేళ, విమానాశ్రయ ప్రాంగణంలో ఏర్పాటు చేసిన బహిరంగ సభలో రామ్మోహన్ నాయుడు మాట్లాడారు. ఈ బృహత్తర ప్రాజెక్ట్ ప్రారంభంతో ప్రస్తుతం ప్రపంచ దృష్టి ఉత్తరాంధ్ర వైపు మళ్లిందని ఆయన పేర్కొన్నారు.

ఈ సందర్భంగా రాజకీయ విమర్శకుల తీరుపై కేంద్రమంత్రి ఘాటుగా స్పందించారు. ఒకప్పుడు ఈ ప్రాంతాన్ని కేవలం ఎర్రబస్సులు మాత్రమే తిరిగే అత్యంత వెనుకబడిన ప్రాంతమని పలువురు ఎద్దేవా చేశారని గుర్తుచేశారు. కానీ నేడు అదే నేలపై అధునాతన విమానాలు, ఎయిర్‌బస్సులు ల్యాండ్ అయ్యే స్థాయికి ఉత్తరాంధ్ర రూపుదిద్దుకుందని గర్వంగా వెల్లడించారు. భోగాపురం విమానాశ్రయం అందుబాటులోకి రావడంతో ఉత్తరాంధ్రలో పారిశ్రామిక, పర్యాటక రంగాలకు సరికొత్త ఊపు వస్తుందని రామ్మోహన్ నాయుడు అన్నారు. ఈ ప్రాజెక్ట్ ద్వారా రాబోయే రోజుల్లో వేలాది మంది స్థానిక యువతకు ప్రత్యక్షంగా, పరోక్షంగా ఉపాధి ఉపాధి అవకాశాలు లభించనున్నాయని ధీమా వ్యక్తం చేశారు.

ప్రధానమంత్రి నరేంద్ర మోదీ నేతృత్వంలో రూపుదిద్దుకుంటున్న 'వికసిత్ భారత్' లక్ష్యం, ముఖ్యమంత్రి నారా చంద్రబాబు నాయుడు ఆలోచనల నుంచి వచ్చిన 'విజన్ 2047' దిశగా ఎన్డీయే కూటమి ప్రభుత్వం వేగంగా అడుగులు వేస్తోందని ఆయన వివరించారు. కేంద్ర, రాష్ట్ర ప్రభుత్వాల డబుల్ ఇంజిన్ సహకారంతో ప్రాంతీయ ప్రాజెక్టుల నిర్మాణం ఊపందుకుందని తెలిపారు.

ఈ అంతర్జాతీయ ఎయిర్‌పోర్టు వినియోగంలోకి రావడం వల్ల విశాఖపట్నం, విజయనగరం, శ్రీకాకుళం జిల్లాల ఆర్థిక వ్యవస్థ స్వరూపం పూర్తిగా మారిపోతుందని ఆర్థిక విశ్లేషకులు భావిస్తున్నారు. విదేశీ పెట్టుబడులు పెరగడంతో పాటు కార్గో రవాణా సౌకర్యాలు మెరుగై స్థానిక వ్యాపార రంగానికి గొప్ప ప్రోత్సాహం లభిస్తుందనే ఆశాభావం వ్యక్తమవుతోంది. విమానాశ్రయానికి అనుసంధానంగా జాతీయ రహదారులు, మెరుగైన మౌలిక సదుపాయాల కల్పన కూడా వేగవంతం కానుండటంతో ఉత్తరాంధ్ర ప్రాంతం త్వరలోనే దక్షిణాసియాలోనే కీలక పారిశ్రామిక కేంద్రంగా ఎదుగుతుందని ప్రజలు, పారిశ్రామికవేత్తలు ఆశిస్తున్నారు.

Alluri Sitarama Raju International Airport, Nara lokesh, Andhra Pradesh Aviation, Bhogapuram Airport, Prime Minister Narendra Modi, CM Chandrababu, Deputy CM Pawan Kalyan, Alluri Sitarama Raju International Airport, AP Development Projects, Rammohan Naidu