ప్రపంచ రాజకీయ యవనికపై భారతదేశం తన సార్వభౌమత్వాన్ని, ప్రజాస్వామ్య వ్యవస్థల స్వతంత్రతను చాటిచెబుతూ అంతర్జాతీయ శక్తులకు స్పష్టమైన సంకేతాలు పంపింది. ఇటీవల ఒక అంతర్జాతీయ ఇంటర్వ్యూలో భారత విదేశాంగ మంత్రి డాక్టర్ ఎస్. జైశంకర్ చేసిన వ్యాఖ్యలు ప్రపంచవ్యాప్తంగా సరికొత్త చర్చకు తెరలేపాయి. ముఖ్యంగా అంతర్గత ప్రజాస్వామ్య ప్రక్రియలలో బాహ్య శక్తులు ఏ విధంగా ప్రభావం చూపాలని చూస్తున్నాయో ఆయన సోదాహరణంగా వివరించారు. పాశ్చాత్య సమాజాల ఎలైట్ వర్గాలు, అంతర్జాతీయ ఎన్జీఓలు, అలాగే కొందరు ప్రపంచ కుబేరులు తమ స్వార్థ ప్రయోజనాల కోసం ప్రజాస్వామ్య నిర్వచనాలను మార్చేందుకు ప్రయత్నిస్తున్న తీరును ఆయన తీవ్రంగా ఖండించారు.  గ్లోబలైజేషన్,  సాఫ్ట్ పవర్ ముసుగులో దేశాల సార్వభౌమత్వాన్ని దెబ్బతీసే కుట్రలపై భారత్ ఎంత అప్రమత్తంగా ఉందో ఈ వ్యాఖ్యల ద్వారా స్పష్టమవుతోంది. 

 జార్జ్ సోరోస్ లక్ష్యంగా జైశంకర్ చాణక్యం

ఈ చర్చలో భాగంగా హంగేరియన్-అమెరికన్ బిలియనీర్,  అంతర్జాతీయ ఫౌండేషన్ల నిర్వాహకుడు జార్జ్ సోరోస్ వైఖరిని జైశంకర్ గట్టిగా నిలదీశారు. వయసు పైబడిన, విపరీతమైన ధనబలం కలిగిన,  మొండి పట్టుదలతో కూడిన ఒక ప్రమాదకరమైన వ్యక్తిగా సోరోస్ ను జైశంకర్ అభివర్ణించారు. తన అధీనంలో ఉన్న అపారమైన నిధులు, స్వచ్ఛంద సంస్థల నెట్‌వర్క్ ద్వారా అభివృద్ధి చెందుతున్న దేశాల రాజకీయాలను ప్రభావితం చేయడమే సోరోస్ ప్రధాన ఎజెండా అని ఆరోపించారు. ఇండియాలో ఏ రకమైన ప్రభుత్వం అధికారంలో ఉండాలి, ప్రజలు ఎవరిని ఎన్నుకోవాలి అనే విషయాలపై సోరోస్ కు కొన్ని వ్యక్తిగత ప్రాధాన్యతలు ఉన్నాయని..  ఒకవేళ ఇండియన్ ఓటర్ల తీర్పు ఆ నిబంధనలకు విరుద్ధంగా ఉంటే, ఇక్కడి ఎన్నికల చట్టబద్ధతను ప్రశ్నించేందుకు కూడా  జార్జ్ సోరోస్ వెనుకాడరని జైశంకర్ విమర్శించారు. ఆర్థిక బలంతో ప్రజాస్వామ్య తీర్పును తప్పుగా చిత్రించడం అత్యంత ఆందోళనకరమైన పరిణామమని హెచ్చరించారు.  పాశ్చాత్య ఎలైట్ వర్గాల ద్వంద్వ ప్రమాణాలుకేవలం ఒక వ్యక్తిపైనే కాకుండా, మొత్తం పాశ్చాత్య, యూరో-అట్లాంటిక్  ఎలైట్ వర్గాల  ద్వంద్వ నీతిని విదేశాంగ మంత్రి ఎండగట్టారు. నేడు ప్రపంచ శక్తి సమతుల్యత పాత కేంద్రాల నుండి బహుళ ధ్రువ వ్యవస్థ వైపు వేగంగా మారుతున్నప్పటికీ.. కొన్ని పాశ్చాత్య శక్తులు తాము నిర్ణయించిన ప్రమాణాలే సరైనవని భావించడం హాస్యాస్పదమన్నారు. తమకు నచ్చిన,  తమ ప్రయోజనాలకు అనుకూలంగా ఉండే రాజకీయ పక్షాలు విజయం సాధిస్తే ఆ ఎన్నికలను పారదర్శకమైనవిగా గుర్తిస్తారనీ.. అదే తమ సిద్ధాంతాలకు భిన్నమైన పక్షాలు గెలిస్తే ఆ ప్రజాస్వామ్యాన్ని లోపభూయిష్టమైనదిగా ముద్ర వేస్తారని జైశంకర్ ఆక్షేపించారు.  ప్రజాస్వామ్య సూచీలను,  కొలమానాలను   కొన్ని దేశాలు తమ రాజకీయ ఆయుధాలుగా మలుచుకుంటున్నాయనే సత్యాన్ని ఆయన ప్రపంచం ముందు ఉంచారు. 

 అసత్య ప్రచారాలు.. వ్యవస్థీకృత కుట్రలు

గతంలో భారతదేశ పౌరసత్వ చట్టాలకు సంబంధించి సోరోస్ చేసిన కొన్ని వివాదాస్పద వ్యాఖ్యలను కూడా జైశంకర్ ఈ సందర్భంగా ప్రస్తావించారు. భారతదేశంలో లక్షలాది మంది మైనారిటీల పౌరసత్వాన్ని రద్దు చేసేందుకు ప్రణాళికలు జరుగుతున్నాయంటూ సోరోస్ చేసిన ఆరోపణలను ఆయన తీవ్రంగా ఖండించారు. అసలు ఎన్నడూ జరగని, వాస్తవ దూరమైన ఇటువంటి వాదనలు కేవలం అజ్ఞానంతో చేసినవి కాదని, సమాజంలో అభద్రతాభావాన్నీ, పరస్పర అనుమానాలను రేకెత్తించి దేశాన్ని అస్థిరపరచడానికేనని స్పష్టం చేశారు. దీనినే ఆయన ఒక వ్యూహాత్మక భయానక ప్రచారంగా  పేర్కొన్నారు. ఇవన్నీ యాదృచ్ఛికంగా జరిగేవి కావనీ, అంతర్జాతీయంగా కొన్ని శక్తులు నడిపించే వ్యవస్థీకృత ప్రభావ కార్యకలాపాలలో  భాగమేనని బట్టబయలు చేశారు.  గ్లోబలైజేషన్ ముసుగులో  రెజీమ్ చేంజ్  వ్యూహాలుప్రస్తుత ఆధునిక ప్రపంచంలో గ్లోబలైజేషన్ పదం వెనుక దాగి ఉన్న సరికొత్త రాజకీయ కోణాన్ని జైశంకర్ విశ్లేషించారు. గతంలో ఒక దేశంలోని ప్రభుత్వాన్ని మార్చడానికి,  లేదా అంతర్గత వ్యవహారాలను మార్చడానికి శక్తులు గుప్తంగా ప్రయత్నించేవనీ..  కానీ నేడు అవే శక్తులు ఓపెన్ సొసైటీ,  పారదర్శకత, ఫిలాంత్రపీ' (పరోపకారం) అనే ఆకర్షణీయమైన పదజాలంతో సరికొత్త ముసుగు వేసుకుని వస్తున్నాయని జైశంకర్ చెప్పారు. గ్లోబలైజేషన్ వల్ల సరిహద్దుల పరిమితులు తగ్గడాన్ని ఆసరాగా చేసుకుని, అపరిమితమైన నిధులు,  ఎన్జీఓల ద్వారా కొన్ని శక్తులు తమ రాజకీయ అజెండాలను సజావుగా ముందుకు నెడుతున్నాయన్నారు. పైకి సాఫ్ట్ పవర్ లా కనిపించే ఈ ప్రక్రియల వెనుక అసలు సిసలైన హార్డ్ పాలిటిక్స్ దాగి ఉన్నాయని ఆయన హెచ్చరించారు.  

చైనా మీడియా సైతం సోరోస్ పై తీవ్ర విమర్శలు

అంతర్జాతీయ రాజకీయాల్లో జార్జ్ సోరోస్ నడిపిస్తున్న ఈ తరహా వ్యూహాలపై కేవలం భారతదేశమే కాదు, చైనా కూడా తీవ్ర అభ్యంతరాలు వ్యక్తం చేస్తోంది. చైనా ప్రభుత్వ అధికారిక,  అనుబంధ మీడియా సంస్థలు సోరోస్ ను ప్రపంచ శాంతికి,  స్థిరత్వానికి ఒక పెద్ద ముప్పుగా అభివర్ణించాయి. ఆయన అనుసరించే పద్ధతులు ఉగ్రవాద ధోరణులను పోలి ఉంటాయని   కొన్ని చైనా పత్రికలు వ్యాఖ్యానించాయి. సోరోస్ కు చెందిన వివిధ ఫౌండేషన్లు,  నిధులు ప్రపంచవ్యాప్తంగా ఉన్న విభిన్న దేశాలలో రాజకీయ అస్థిరతను సృష్టించడానికి, ఆర్థిక ఒత్తిళ్లను తీసుకురావడానికి,  ప్రభుత్వాలను కూల్చడానికి ఉపయోగపడుతున్నాయని చైనా మీడియా స్పష్టంగా ఆరోపించింది. అభివృద్ధి చెందుతున్న దేశాల అంతర్గత విషయాలలో ఇటువంటి జోక్యం ఆయా దేశాల సార్వభౌమత్వానికి తీవ్ర గండంగా పరిణమించిందని చైనా పేర్కొంది. 

వలసవాద చేదు జ్ఞాపకాలు..  చారిత్రక అప్రమత్తత

భారతదేశం బాహ్య శక్తుల జోక్యం పట్ల ఇంత కఠినంగా, అప్రమత్తంగా ఉండటానికి గల చారిత్రక కారణాలను కూడా డాక్టర్ జైశంకర్ వివరించారు. శతాబ్దాల పాటు విదేశీ పాలకుల చేతిలో వలసవాద రొంపిలో నలిగిపోయిన భారతదేశానికి..  బాహ్య శక్తులు ఏ రూపంలో దేశంలోకి ప్రవేశించినా వాటి పట్ల సహజంగానే   అప్రమత్తతతో  ఉంటాయని ఆయన గుర్తుచేశారు. అందువల్లనే అంతర్జాతీయ ప్రక్రియలు ఎంతవరకు పారదర్శకంగా ఉన్నాయి. అసలు ఈ ప్రజాస్వామ్య ప్రమాణాలను నిర్ణయించే హక్కు ఎవరికి ఉంది అనే విషయాలపై గ్లోబల్ సౌత్ వేదికగా ఒక సుదీర్ఘమైన,  లోతైన చర్చ జరగాల్సిన అవసరం ఎంతైనా ఉందని ఆయన పిలుపునిచ్చారు.   విదేశాంగ మంత్రి జైశంకర్ చేసిన ఈ కీలక వ్యాఖ్యలు భవిష్యత్తులో భారత విదేశాంగ విధానంలోనూ, దేశీయ రాజకీయాల్లోనూ బలమైన మార్పులకు దారితీయనున్నాయి. 

బాహ్య ప్రపంచం నుండి వచ్చే అనవసర వ్యాఖ్యలను, విమర్శలను భారతదేశం ఇకపై ఎంతమాత్రం సహించబోదనే స్పష్టమైన సందేశం జైశంకర్ తన వ్యాఖ్యల ద్వారా ఇచ్చారు. గ్లోబల్ నారేటివ్ లలో పాశ్చాత్య దేశాల ఏకపక్ష ఆధిపత్యాన్ని సవాలు చేసే ఆత్మవిశ్వాసం భారత్ కు ఉందని విస్పష్టంగా రుజువైంది.  విదేశీ నిధులు, ఎన్జీఓల పాత్ర, అంతర్గత రాజకీయాలపై జరుగుతున్న చర్చలకు ఇకపై ప్రభుత్వ,  మంత్రిత్వ శాఖల స్థాయి నుండి మరింత సంస్థాగతమైన మద్దతు లభించనుంది.  

 ఓటరు దేవుడే సుప్రీం

ఈ మొత్తం వ్యవహారంలో విదేశాంగ మంత్రి అందించిన అంతిమ సారాంశం ఒక్కటే.. భారతదేశ ప్రజాస్వామ్య వ్యవస్థ తీర్పును నిర్ణయించాల్సింది, ఇక్కడి ప్రభుత్వాన్ని నడపాల్సింది కేవలం భారతీయ ఓటర్లు మాత్రమే. విదేశాల్లో కూర్చునే ఆర్థికవేత్తలు, వ్యాఖ్యాతలు,  స్వయం ప్రకటిత ప్రజాస్వామ్య సంరక్షకులు ఎంతమాత్రం కాదు. అయితే..  ఈ సార్వభౌమత్వాన్ని కాపాడుకోవడంతో పాటు అంతర్గతంగా పౌర సమాజ చైతన్యాన్ని, స్వతంత్ర న్యాయవ్యవస్థను,  నిష్పాక్షిక మీడియా స్వేచ్ఛను మరింత బలోపేతం చేసుకోవాల్సిన బాధ్యత కూడా దేశంపై ఉందనే విషయాన్ని ఈ చర్చ గుర్తుచేస్తోంది. మన ప్రజాస్వామ్య ప్రమాణాలను మనమే నిర్దేశించుకుంటూ ముందుకు సాగడమే దీనికి ఏకైక మార్గం.

- సీతారాం కంఠంనేని

ఈ విశ్లేషణ మీకు నచ్చినట్లయితే, దయచేసి https://www.teluguone.com పోర్టల్ ను  ఫాలో అవ్వండి. లైక్ చేయండి. షేర్ చేయండి. మీ విలువైన అభిప్రయాలను తెలియజేయండి.