అత్యాచార ఆరోపణలపై యువ క్రికెటర్ అభిషేక్ పోరెల్‌ను పోలీసులు అరెస్ట్ చేశారు. కలకత్తా హైకోర్టు ఇచ్చిన కఠిన ఆదేశాల అనంతరం, అత్యాచారం  క్రిమినల్ బెదిరింపుల తీవ్ర ఆరోపణల కేసులో పశ్చిమ బెంగాల్ పోలీసు యంత్రాంగం ఈ నిర్ణయం తీసుకుంది. క్రికెట్ రంగంలో ఎంతో భవిష్యత్తు ఉందనుకున్న ఒక యువ ఆటగాడు సడన్‌గా ఇటువంటి వివాదంలో చిక్కుకోవడం క్రీడాభిమానులను తీవ్ర దిగ్భ్రాంతికి గురిచేసింది. ఈ కేసు పూర్వాపరాల్లోకి వెళ్తే, ఒక వైద్య విద్యార్థిని (మెడికల్ స్టూడెంట్) ఇచ్చిన ఫిర్యాదు ఆధారంగా పశ్చిమ బెంగాల్‌లోని మోగ్రా పోలీస్ స్టేషన్‌లో ఎఫ్‌ఐఆర్ నమోదైంది. బాధితురాలు అందించిన వివరాల ప్రకారం, గత 3 ఏళ్లుగా పెళ్లి చేసుకుంటానని నమ్మించి అభిషేక్ పోరెల్ తనతో శారీరక సంబంధం పెట్టుకున్నాడని తెలిపింది. 

అయితే గత ఏడాది కాలంగా తనను క్రమంగా దూరం పెట్టడం ప్రారంభించాడని, పెళ్లి విషయం ప్రస్తావించగా స్పష్టంగా నిరాకరించాడని పేర్కొంది. అంతేకాకుండా తనపై భౌతిక దాడికి పాల్పడటమే కాకుండా, తీవ్రస్థాయిలో క్రిమినల్ బెదిరింపులకు గురిచేశాడని ఆరోపించింది.పరిస్థితి ఇంతటితో ఆగక, వారిద్దరికి సంబంధించిన వ్యక్తిగత మరియు సన్నిహిత ఫోటోలు, వీడియోలను సోషల్ మీడియా వేదికల్లో వైరల్ చేస్తానని బెదిరించినట్లు బాధితురాలు పోలీసులకు వెల్లడించింది. బాధితురాలి ఫిర్యాదులోని అంశాలను పరిశీలించిన పోలీసులు భారతీయ న్యాయ సంహిత (BNS) కింద నాన్-బెయిలబుల్ తీవ్రమైన సెక్షన్ల ఆధారంగా ఎఫ్‌ఐఆర్ నమోదు చేశారు. 

ఈ అంశంపై విచారణ చేపట్టిన కలకత్తా హైకోర్టు కేసు తీవ్రతను పరిగణనలోకి తీసుకుని, నిందితుడిని వెంటనే అరెస్ట్ చేయాలని ఆదేశించింది. న్యాయస్థానం బాధితురాలి గోప్యతను, భద్రతను కాపాడటానికి ప్రత్యేక చర్యలు సూచించింది. అందులో భాగంగా అభిషేక్ పోరెల్‌కు చెందిన ఎలక్ట్రానిక్ పరికరాలను (మొబైల్ ఫోన్లు, లాప్‌టాప్‌లు మొదలైనవి) తక్షణమే స్వాధీనం చేసుకోవాలని పోలీసులకు స్పష్టమైన మార్గదర్శకాలు ఇచ్చింది. పోరెల్ ఢిల్లీ క్యాపిటల్స్ జట్టుకు వికెట్ కీపర్ బ్యాటర్‌గా ప్రాతినిధ్యం వహిస్తున్నారు.  ఒకవైపు ఐపీఎల్, బెంగాల్ ప్రో T20 లీగ్ వంటి వేదికలపై పరుగుల వర్షం కురిపిస్తూ లైమ్‌లైట్‌లో ఉన్న క్రీడాకారుడు, ఇలా చట్టపరమైన కేసులో కటకటాల పాలవ్వడం క్రీడా వర్గాల్లో హాట్ టాపిక్‌గా మారింది. ఈ వ్యవహారంపై చట్టం తన పని తాను చేసుకుపోతుందని, పూర్తిస్థాయి దర్యాప్తు జరగాల్సి ఉందని అధికారులు వెల్లడించారు.

Abhishek Porel, Abhishek Porel Arrest, Delhi Capitals Cricketer, Calcutta High Court, BNS Case Mogra PS, IPL Cricketer Rape Case