ఈ ఎన్నికలలో టీఆర్ఎస్‌కి ఎన్ని లోక్‌సభ సీట్లు వస్తాయో ఏమో తెలియదుగానీ, టీఆర్ఎస్ మాత్రం కేంద్రంలో ఎవరికి మద్దతు ఇవ్వాలా అనే విషయం మీద తెగ టెన్షన్ పడిపోతోంది. చాలాకాలం నుంచి యుపీఏ ప్రభుత్వానికి మద్దతు ఇస్తామని చెబుతూ వచ్చిన టీఆర్ఎస్ రాష్ట్ర విభజన తర్వాత యుపిఎ భజన చేయడం ఆపేసింది. కొంతకాలం బీజేపీ భాగస్వామి అయిన ఎన్డీయే వైపు చూసిన టీఆర్ఎస్ బీజేపీ, టీడీపీ మద్దతు కుదరడంతో ఎన్టీయేకి పచ్చి కొట్టేసింది. ఆ తర్వాత కొంతకాలం థర్డ్ ఫ్రంట్‌ అనే మాటని పట్టుకుని వేలాడింది. కొంతకాలం తర్వాత థర్డ్ ఫ్రంట్ మీద మోజు తీరిపోయింది. ఆ తర్వాత టీఆర్ఎస్ అధినేత కేసీఆర్ గాలి కాంగ్రెస్ పార్టీ మీదకి మళ్ళింది. అందుకే మొన్నీమధ్యే ఆయన రాహుల్ గాంధీ కోరితే యుపీయేకి మద్దతు ఇస్తానని ప్రకటించారు. భూమి గుండ్రంగా వున్నట్టు టీఆర్ఎస్ మళ్ళీ యుపీఏ దగ్గరకి వచ్చింది కాబట్టి అక్కడితో ఆగుతుందని అందరూ అనుకున్నారు. అయితే అందరూ అనుకున్నట్టు చేస్తే అది టీఆర్ఎస్ ఎందుకవుతుంది? ఇప్పుడు టీఆర్ఎస్ కొత్త కూటమిని సృష్టించింది. ఆ కూటమి పేరు ‘లౌకిక కూటమి’. ఈసారి తమ పార్టీ మద్దతు లౌకిక కూటమికే వుంటుందని టీఆర్ఎస్ నాయకుడు ఈటెల రాజేందర్ ప్రకటించారు. టీఆర్ఎస్ ఊహల్లో పుట్టిన ఈ లౌకిక కూటమిని టీఆర్ఎస్ ఎంతకాలం లవ్ చేస్తుందో చూడాలి.