దేశంలోని అతిపెద్ద ప్రైవేట్ ఇంధన రిటైలర్ సంస్థ అయిన నయారా ఎనర్జీ వాహనదారులకు భారీ షాక్ ఇచ్చింది. అంతర్జాతీయ మార్కెట్‌లో ముడిచమురు ధరలు ఆకాశాన్నంటుతున్న నేపథ్యంలో, ఆ భారాన్ని వినియోగదారులపై వేస్తూ పెట్రోల్, డీజిల్ ధరలను పెంచుతూ గురువారం కీలక నిర్ణయం తీసుకుంది. దీనివల్ల ప్రైవేట్ బంకుల్లో ఇంధన ధరలు ఒక్కసారిగా పెరిగాయి.

నయారా ఎనర్జీ తాజా నిర్ణయం ప్రకారం.. పెట్రోల్ ధర లీటరుకు రూ. 5.30 వరకు పెరగగా, డీజిల్ ధర లీటరుకు రూ. 3 మేర అధికమైంది. స్థానిక పన్నులు మరియు వ్యాట్ ప్రభావంతో ఈ ధరల పెరుగుదల వివిధ రాష్ట్రాల్లో స్వల్ప మార్పులతో కనిపిస్తోంది. కొన్ని ప్రాంతాల్లో పెట్రోల్ రేటు గరిష్టంగా లీటరుకు రూ. 5.30 మేర పెరిగినట్లు గణాంకాలు చెబుతున్నాయి.

పశ్చిమాసియాలో నెలకొన్న ఉద్రిక్తతలు, ముఖ్యంగా ఇరాన్ మరియు ఇజ్రాయెల్ మధ్య ఘర్షణల కారణంగా అంతర్జాతీయంగా క్రూడ్ ఆయిల్ సరఫరాకు ఆటంకాలు ఏర్పడ్డాయి. దీనివల్ల ప్రపంచ మార్కెట్‌లో ముడిచమురు ధరలు దాదాపు 50 శాతం మేర పెరిగాయి. ఈ అదనపు భారాన్ని భరించలేక ప్రైవేట్ చమురు సంస్థలు ధరలను సవరించక తప్పలేదని విశ్లేషకులు భావిస్తున్నారు.

ప్రభుత్వ రంగ చమురు సంస్థలైన ఐఓసీ , బీపీసీఎల్ , హెచ్‌పీసీఎల్ వంటివి ప్రస్తుతం ధరలను స్థిరంగా కొనసాగిస్తున్నప్పటికీ, నయారా వంటి ప్రైవేట్ సంస్థలు మార్కెట్ ధరలకు అనుగుణంగా రేట్లను పెంచాయి. ప్రస్తుతం హైదరాబాద్‌ వంటి ప్రధాన నగరాల్లో నయారా బంకుల్లో పెట్రోల్ ధర రూ. 107.46 కు చేరుకుంది.

మరోవైపు గుజరాత్‌లోని నయారాకు చెందిన వదినార్ రిఫైనరీ ఏప్రిల్ మొదటి వారం నుండి మెయింటెనెన్స్ పనుల కోసం మూతపడనుంది. దాదాపు 35 రోజుల పాటు ఈ రిఫైనరీ పని చేయకపోవడం వల్ల దేశీయంగా ఇంధన సరఫరాపై మరింత ఒత్తిడి పెరిగే అవకాశం ఉందని సమాచారం.

ప్రస్తుతానికి ప్రభుత్వ రంగ సంస్థలు ధరలను పెంచనప్పటికీ, అంతర్జాతీయ పరిస్థితులు ఇలాగే కొనసాగితే భవిష్యత్తులో మిగిలిన కంపెనీలు కూడా ఇవే అడుగులు వేసే అవకాశం ఉందని నిపుణులు హెచ్చరిస్తున్నారు. సామాన్య ప్రజలు ఈ ధరల పెంపుతో ఆందోళన వ్యక్తం చేస్తున్నారు.