ఐపీఎల్ 2026 సీజన్ ఆరంభానికి ముందే సన్‌రైజర్స్ హైదరాబాద్ ఒక సంచలన నిర్ణయం తీసుకుంది.  జట్టు భవిష్యత్తును దృష్టిలో ఉంచుకుని, టీమిండియా వికెట్  కీపర్ బ్యాటర్ ఇషాన్ కిషన్‌ను తమ కొత్త కెప్టెన్‌గా నియమిస్తున్నట్లు ప్రకటించింది. గత సీజన్లలో జట్టును నడిపించిన సీనియర్ ఆటగాళ్ల స్థానంలో, దూకుడైన ఆటతీరు కలిగిన కిషన్‌కు బాధ్యతలు అప్పగించడం ఇప్పుడు క్రికెట్ వర్గాల్లో హాట్ టాపిక్‌గా మారింది.

గత కొద్ది కాలంగా సన్‌రైజర్స్ జట్టులో స్థిరత్వం కోసం యాజమాన్యం రకరకాల ప్రయోగాలు చేస్తోంది. ఈ క్రమంలోనే జట్టులో నూతన ఉత్తేజం నింపేందుకు యువ రక్తాన్ని ప్రోత్సహించాలని నిర్ణయించుకుంది. కిషన్ తన అటాకింగ్ బ్యాటింగ్ శైలితో పాటు, వికెట్ల వెనుక ఉండి గేమ్ ప్లాన్ చేయడంలో దిట్ట అని పేరు తెచ్చుకున్నాడు. అందుకే అతనికి పగ్గాలు అప్పగించడం ద్వారా జట్టు రూపురేఖలు మారుతాయని మేనేజ్‌మెంట్ భావిస్తోంది.

 2025-26 యాషెస్ సిరీస్ సమయంలో పాట్ కమిన్స్ తీవ్రంగా గాయపడ్డాడు. అప్పటి నుంచి అతడు మైదానంలోకి దిగలేదు. ఐపీఎల్ నాటికి ఆయన కోలుకుంటాడా లేదా అనే విషయంపై ఫ్రాంచైజీకి ఇప్పటివరకు ఎటువంటి సమాచారం అందలేదు. ఈ నేపథ్యంలోనే ఇషాన్ కిషన్‌కు బాధ్యతలు అప్పగించాలని మేనేజ్‌మెంట్ నిర్ణయించినట్లు తెలుస్తోంది. సయ్యద్ ముస్తాక్ అలీ ట్రోఫీలో కెప్టెన్‌గా ఝార్ఖండ్‌ను విజేతగా నిలిపి, మళ్లీ జాతీయ జట్టులోకి రీ ఎంట్రీ ఇచ్చాడు.  

ఇటీవల ముగిసిన టీ20 వరల్డ్ కప్‌లో 2026లో ఇషాన్ కిషన్ అద్భుత ఫామ్‌ను కనబరిచాడు. న్యూజిలాండ్‌తో జరిగిన ఫైనల్‌లో హాఫ్ సెంచరీ చేయడంతో పాటు, పాకిస్థాన్, నమీబియా మ్యాచ్‌ల్లో 'ప్లేయర్ ఆఫ్ ది మ్యాచ్' అవార్డులను అందుకున్నారు. భారత్ తరపున రెండో అత్యధిక పరుగులు చేసిన ఆటగాడిగా నిలిచి జట్టు విజయంలో కీలక పాత్ర పోషించారు.

ఈ మార్పుపై సన్‌రైజర్స్ అభిమానులు సామాజిక మాధ్యమాల్లో హర్షం వ్యక్తం చేస్తున్నారు. ముఖ్యంగా హైదరాబాద్ వంటి ఫ్రాంచైజీకి యువ మరియు డైనమిక్ కెప్టెన్ అవసరమని ఫ్యాన్స్ అభిప్రాయపడుతున్నారు. ఇషాన్ కిషన్ నేతృత్వంలో 'ఆరెంజ్ ఆర్మీ' మరోసారి ఛాంపియన్‌గా నిలుస్తుందని ఆశాభావం వ్యక్తం చేస్తున్నారు. జట్టు కూర్పులో కూడా కిషన్ తనదైన ముద్ర వేసే అవకాశం ఉంది.

రానున్న ఐపీఎల్ వేలంలో కిషన్ సూచనల మేరకు మరికొంత మంది ప్రతిభావంతులైన ఆటగాళ్లను జట్టులోకి తీసుకునే అవకాశం ఉంది. కొత్త కెప్టెన్, కొత్త వ్యూహాలతో సన్‌రైజర్స్ ఈసారి మైదానంలో ఎలాంటి సంచలనాలు సృష్టిస్తుందో చూడాలి. కిషన్ సారథ్యంలో హైదరాబాద్ జట్టు మళ్ళీ పూర్వవైభవాన్ని సంతరించుకోవాలని క్రీడాభిమానులు కోరుకుంటున్నారు.