బొమ్మ లాంతరు

    దిద్దుతూన్న గుంట ఓనమాలు చెరిపేసి
    చేతిలో ఉన్న బలపం విరిచేసి
    కొత్తపలక కొనుక్కొచ్చాడు కుర్రాడు

 

    పాగాచుట్టుకొంటూన్న రోకలి పారేసి
    తెలివితక్కువ తనాన్ని గొయ్యితీసి పాతేసి
    పొరుగువాడెలా ఉన్నాడని భోగట్టా చేశాడు వెర్రాడు

 

    ఆడుతూన్న నాటకం ఆపేసి
    పెట్టుకున్న గడ్డం కుళ్ళాయీ లాగేసి
    ఆడియన్సులో కలిసిపోయాడు విదూషకుడు

 

    నిన్నటి వాగ్దానాన్ని నేటి ఉపన్యాసంలో కాల్చేసి
    నేటి ఫోర్జరీని రేపటి సంతకంగా మార్చేసి
    ఇక్కడే వుండు వొస్తానని ఎక్కడికో పోయాడు వినాయకుడు

 

    తన చుట్టూ తాను తిరుగుతూ
    సూర్యుడిచుట్టూ పరిభ్రమించే భూమిలాగ
    ఆశయం చుట్టూ తిరుగుతోంది ఆవేశం.

                                                             - తెలుగు స్వతంత్ర - 4.12.1953

    (చీట్లాటలో ఒక చేతిని అన్నీ పొడిముక్కలే అయి ఒక బొమ్మ లేకపోవడం బొమ్మ లాంతరు. అప్పుడు ఆట కలిపి మళ్ళీ ముక్కలు కలపడం ధర్మం.)