బంగారుతల్లి
అమ్మా! అలమేలు మంగమ్మా!
ఆలింపవే మొరల తేలింపవే సిరుల
పాలింపవే మమ్ము పద్మవతమ్మా! ||అమ్మా||
శ్రీలు విరాజిల్లు పాలవెల్లిని నీవు
కలుములు వెదజల్లు కల్పవల్లివి నీవు
కలువరాజు గారాబు చెల్లివి నీవు
భక్తుల పాలి బంగారు తల్లివి నీవు ||అమ్మా||
వేదములు నీ దివ్య పాదమంజీరాలు
నక్షత్రములు నీకు నవరత్నహారాలు
మందహాసము చిందు సౌందర్యలహరీ!
అందుకో మాపూజ ఆనందలహరి! ||అమ్మా||
సంపద లిచ్చేటీ సౌభాగ్యలక్ష్మీ!
సేవలకు మెచ్చేటి శ్రీవిజయలక్ష్మీ!
శ్రీలక్ష్మీ! వరాలక్ష్మీ! శ్రీ మన్మహలక్ష్మీ!
అల శ్రీనివాసుని అర్ధాంగలక్ష్మీ! ||అమ్మా||
జనని! నీ అర్చనలు సర్వోదయశ్రీలు
తల్లి! నీ దీవనలు ధర్మవిజయశ్రీలు
మాత! నీ నయనాలు మధుర కరుణశ్రీలు
జగమంత నీస్వామీ స్వర్ణోత్సవశ్రీలు ||అమ్మా||
మువ్వలగోపాల
మువ్వలగోపాలా! చిరు
నవ్వుల గోపాలా!
ముజ్జగములు మురిపించే మురళీ
మోహన గోపాలా! మురళీ
మోహన గోపాలా! ||మువ్వలు||
ముద్దుల గోపాలా! వెన్న
ముద్దలా గోపాలా!
నిద్దపు నుదుటను నీటుగ కస్తురి
దిద్దిన గోపాలా! కస్తురి
దిద్దిన గోపాలా! ||మువ్వల||
చక్కని గోపాలా! చేతికి
చిక్కని గోపాలా!
అక్కడ ఇక్కడ చెక్కుల చెలిపలు
నొక్కుల గోపాలా! చెలిపలు
నొక్కుల గోపాలా! ||మువ్వలు||
కులుకుల గోపాలా! జిలిబిలి
పలుకుల గోపాలా!
తిలకించిన మెయి పులకించే కను
తళుకుల గోపాలా! కను
తళుకుల గోపాలా! ||మువ్వల||
వలపుల గోపాలా! తియ్యని
పిలుపుల గోపాలా!
తొలి తలపుల కలగలపుల అరమేల్
కొలువుల గోపాలా! అరమేల్
కొలువుల గోపాలా! ||మువ్వల||
ప్రభువు వేణువు పలికించేనే
ప్రభువు వేణువు పలికించేనే! ఈ
ప్రకృతి సర్వము పులకించెనే! నా ||ప్రభువు||
సభమున చంద్రుడు తిలకించేనే! చిరు
నవ్వుల వెన్నెల లోలికించేనే
చక్కని తీవలు తరులు సరస్సులు
చిక్కని మధువులు చిలికించేనే! నా ||ప్రభువు||
ఎండిన మ్రోడులు చివురించేనే! పెను
బండల గుండెలు ద్రవించేనే
ఆనందముతో రాధా హృదయము
యమునానదియై ప్రవహించేనే! నా ||ప్రభువు||
లేగలు చెవులోగ్గి వినసాగెనే
లేళ్ళు వింతగా కనసాగెనే
అణువణువున బృందావన మంతట
ప్రణవనాదములు మార్మ్రోగెనే! నా ||పభువు||
స్వామిని ఎటు లర్చించినదో
స్వామిని ఎటు లర్చించినదో!
భామిని ఏమని ప్రార్ధించినదో! ||స్వామిని||
గుడిలో గంటలు ఖంగున మ్రోగగ
గుండెలలో కోర్కెలు కొనసాగగ ||స్వామిని||
విచ్చీవిచ్చని విరిమొగ్గలతో
సిగ్గులు చిందే చిరుబుగ్గలతో ||స్వామిని||
అగరు ధూప సుగంధమ్ములతో
మధురాక్షర పదబంధమ్ములతో ||స్వామిని||
చెవిలోపలి చెంగలువ జారగా
ఎదలో తీయని తలపు లూరగా ||స్వామిని||
మహాదేవ శంభో
మహాదేవ శంభో! హర హర
మహేశా! స్వయంభూ!
ఉమామనోహర! హిమాంశు శేఖర!
నమో నమో అభయంకర శంకర! ||మహాదేవ||
ఫణీంద్రభూషణ! మునీంద్రపోషణ!
అనుగ్రహించవయా!
ప్రపన్న రక్షణ! వివక్ష శిక్షణ!
పరిగ్రహించవయా!
వారణాసిలో విశ్వేశ్వరుడవు
దక్షవాటిలో భీమేశ్వరుడవు
శ్రీపర్వతమున మల్లేశ్వరుడవు
జగాల నేలె సర్వేశ్వరుడవు ||మహాదేవ||
మురారి రంజన! సురారి భంజన!
మొరలాలించుమయా!
ప్రపంచకారణ! విపన్నివారణ!
పరిపాలించుమయా!
దుండగులను దండింపుమయా!
దురాగతుల ఖండింపుమయా!
జయశ్రీలు నిండింపుమయా!
దయామయా! జయ జయ! మృత్యుంజయ! ||మహాదేవ||
అందాల నటరాజ
అందాల నటరాజ ! అందుకో నా పూజ
ఎందుకో నాగుండె చిందిపోవుచుండె ||అందాల||
కందళించె విరాళి మందాకినీ మౌళి!
అలసించేదవేమి అఖిలలోకస్వామి! ||అందాల||
గంగాతరంగమై పొంగే నా హృదయమ్ము
అవధరింపుము ప్రభూ! అమృతాభిషేకమ్ము ||అందాల||
మనసు అరవిందమై మమత మకరందమై
విరిసింది నీ ముందు వేగగొను మీ విందు ||అందాల||
సర్వస్వమును నీవ శంభో ! మహాదేవ!
నిముసమును నిను బాసి నిలువలేదీ దాసీ ||అందాల||
మహేశా స్వయంభూ
మహేశా! స్వయంభూ! శివశివ
మహాదేవ శంభూ! జయ జయ ||మహేశా||
జటాజూటమును విడలింపుమయా
నిటాలేక్షణము కదలింపుమయా
హుటాహుటిని రిపుపటాలముల ఫేట
ఫెటార్భటులతో భేధింపుమయా ||మహేశా||
కరాళమాలను ధరింపుమయా
పురాంతకుడవై చరింపుమయ్యా
పరాక్రమశ్రీ భరించి దూర్తుల
దురాక్రమణలను హరింపుమయ్యా ||మహేశా||
మహానటుడవై నటియింపుమయా
మహోదయమ్మును ఘటియింపుమయా
ధర్మద్రోహుల దహింపుమయా
జయజయ! గౌరీప్రియ! మృత్యుంజయ! ||మహేశా||
కన్నయ్యా
(మీరా గీతం)
కన్నయ్యా ! నా
కన్నుల విందగుమయ్యా! ||కన్నయ్యా||
శిరమున విరిసే శిఖిపింఛముతో
ఉరమున మెరిసే వైజయంతితో
సొగసులు కురిసే నయనమ్ములతో
సిరిసిరి మువ్వల చరణమ్ములతో ||కన్నయ్యా||
గజ్జెల మొలత్రాడు గలగల మ్రోగగా
ముజ్జగములు చిరుబొజ్జలో నూగగా
మోవిపై పిల్లనగ్రోవి పలుకగా
మధుర మధుర మధురసము లొలుకగా ||కన్నయ్యా||
ముద్దులొలుకు నీ మోహనవదనం
అందాలు చిందే ఆనంద సదనం
నీ సన్నిధానమే నా పెన్నిధానం
దర్శనమీరా దాసీ యీ మీరా ||కన్నయ్యా ||
