ఆఖరిమాట మొదటిమాట!

    ఆఖరిమాట మొదటిమాట
    ఆశలకేం అనంతం
    ఆకాశం నా గుడారం
    అ ఆలు నా ఆస్తి
    ఆసియా అంతవాణ్ణి
    ఆశలకేం అనంతం
    అప్పారావు నా నేస్తం
    ఆంధ్రత్వం నా శాపం
    విశాఖపట్టణం వూరు
    వెర్రాసుపత్రి పేరు
    ఆఖరిమాట మొదటిమాట
    ఆశలకేం అనంతం
    ఆసియా అంతవాణ్ణి
    ఆశలకేం అనంతం
    అమాంతంగానే కాదండయ్యా క్రమంగా క్రక్రమంగా నా
    సమస్తం మీ సమక్షంలో సమర్పిస్తా శమిస్తే
    కపాలం నవ్వితేనేం కంపింపింబింబింస్తా1 నీ
    ప్రపంచాన్నే, పాటల్లో ఆటల్లో నామాటల్లో

 

    ఇదే నా రహస్యం
    యథార్థం నా తురఫు2

 

    నాకేమున్నాయిలే ఆసులా రాజులా రాణీలా
    జాకీలా క్షణకాలం జెండా ఎగిరించేస్తాం
    ఆ కొంచెం చాలదంటే సైనైడుకూడా కొంచెమే కా
    దంటే కాదనండయ్యా అన్నయ్యలారా
    పరమాణువు నా ప్రపంచం3
    నాతో నా గుణకారం

 

    క్షణాన్నే సాగదీస్తే కాలం డొంకంతా కదల్దా
    ఇలాగే ఎక్కేద్దాం శిఖరం కొత్తరాస్తాలు తీస్తూ
    మిలిట్రీ లారీ నడిపించే పద్ధతిలో పద్ హతితోనే
    అణాలూ అరణ్యాలూ అణువులూ అద్రులూ దాటుకుంటూ

 

    ఆ వేగం నా వేగం
    ఆసియాలకేం అనల్పం

 

    వికృత్వం శుంఠాయమానంగా కనబడితేనేం
    ఒకానొక ఋజుత్వం సాధిస్తాం మనం లోపా
    యికారీ వ్యాపారాల్లో పాల్గొంటామా చేస్తే
    అకస్మాత్తుగా ఓపెన్ గా చేస్తాం లేకపోతే నిద్రపోతాం

 

    స్వప్నంలో స్వర్గం5
    హతాశయాలకి పొటాసియాలు6

 

    హిప్పోపొటామస్ హిట్లర్ హిండెన్ బర్గు హిడింబా
    హిరణ్యాక్ష రాజ్యాలూ ఇవన్నీ ఎందుకోయ్ హ్రీ హ్రీ
    శ్రీతో శ్రీ7 శ్రీశ్రీతో శ్రీశ్రీ శ్రీశ్రీశ్రీతో శ్రీశ్రీశ్రీ
    శిఖరంపై జెండా శిలలకి ప్రాణం చీనీతో 8 స్నేహం

 

    ఆఖరిమాట మొదటిమాట9
    ఆశలకేం అనంతం10
    అప్పారావు నా నేస్తం11
    ఆంధ్రత్వం నా శాపం12
    ఆశయం అంతవాణ్ణి13
    ఆశలకేం అనంతం
    ఆఖరిమాట మొదటిమాట
    ఆశలకేం అనంతం
    అప్పారావంత వాణ్ణి14
    ఆశలకేం అనంతం

                                                 - ఆనందవాణి వారపత్రిక - 28.5.1944

    Notes :

    Manifesto = Automatic writing + Psychomontage

    1. Double verb telescopy

    2. Aspects of Reality as laboratory data
    
    3. Micromacrocosmology
    
    4. Grammarian's funeral
    
    5. Oneiric dominion status

    6. "Suicide is no solution"

    7. Binary Fission

    8. Heterosex....

    9. Hyiteayn proternn

    10. Novelway, swansway

    11. Camaraderie

    12. Defeatism

    13. Idealism

    14. Megalomania