మహానటుడు నందమూరి తారక రామారావు జీవితం ఆధారంగా తెరకెక్కిన 'యన్టీఆర్ కథానాయకుడు', 'యన్టీఆర్ మహానాయకుడు' చిత్రాల్లో టైటిల్ రోల్ లో నందమూరి బాలకృష్ణ నటించగా.. హరికృష్ణ పాత్రలో నందమూరి కళ్యాణ్ రామ్ కనిపించిన సంగతి తెలిసిందే. ఆ సినిమాల ఫలితమెలా ఉన్నా.. బాబాయ్, అబ్బాయ్ కాంబినేషన్ సీన్స్ అభిమానులను బాగానే అలరించాయి.
కట్ చేస్తే.. మరో నందమూరి అబ్బాయ్ బాలయ్య సినిమాలో కనువిందు చేయనున్నారట. ఆ వివరాల్లోకి వెళితే.. 'సింహా', 'లెజెండ్' చిత్రాల తరువాత బాలకృష్ణ, బోయపాటి శ్రీను కాంబినేషన్ లో ముచ్చటగా మూడో సినిమా రూపొందుతున్న సంగతి తెలిసిందే. ఇందులో కథను మలుపు తిప్పే కీ రోల్ ఉందట. అందులో నందమూరి తారకరత్న కనిపిస్తారని సమాచారం. అంతేకాదు.. ఈ పాత్రలో నెగటివ్ షేడ్స్ కూడా ఉంటాయని టాక్. త్వరలోనే తారకరత్న ఎంట్రీపై క్లారిటీ వచ్చే అవకాశముంది.
మిర్యాల రవీందర్ రెడ్డి నిర్మిస్తున్న ఈ చిత్రానికి థమన్ సంగీతమందిస్తున్నారు.