తనను తెలుగుదేశం పార్టీ నుంచి అన్యాయంగా సస్పెండ్ చేసిందని గుడివాడ ఎమ్మెల్యే కొడాలి నాని ప్రశ్నించారు. తను టిడిపిని వీడేది లేదని, తన సస్పెండ్ పై కోర్ట్ కి వెళ్తానని చెప్పారు. ఎన్.టి.ఆర్ ను వెన్నుపోటు పొడిచినట్లు తనను కూడా బయటకు పంపారని ఆయన ఆరోపించారు. కేంద్రంలో సోనియాగాంధీ, చిదంబరంలతో సంబందాలు పెట్టుకుని కాంగ్రెస్ కు టిడిపిని హోల్ సేల్ గా అమ్మేశారని చంద్రబాబుపై ఆరోపించారు. తనను సస్పెండ్ చేసినందుకు ఎన్.టి.ఆర్.ఆత్మ ఘోషిస్తుందని అన్నారు. నలబై చోట్ల ఎన్నికలు జరిగితే ఒక్క చోట గెలవలేదని, సిగ్గు లేకుండా పార్టీ అద్యక్షుడిగా ఉన్నారని అన్నారు. ఎన్.టి.రామారావుకు అభిమానినని, జూనియర్ ఎన్.టి.ఆర్ తనకు టిక్కెట్ ఇప్పించారని ఆయన చెప్పారు. జగన్ తనకు వ్యక్తిగతంగా తెలిసిన మనిషి, గతంలో కూడా నాలుగైదు సార్లు కలిశానని, ఆయన ఇబ్బందులలో ఉన్నారని కలవడానికి వెళ్లానని ఆయన చెప్పారు.