అవార్డులు, సత్కారాలకు అతీతుడు బాపు. అయినప్పటికీ ఆయన కొన్ని అవార్డులు, సత్కారాలకు అనుమతి ఇచ్చారు. బాపును వరించడం ద్వారా అనేక అవార్డుల జన్మ సార్థకమైంది. బాపు తాజాగా 2013లో పద్మశ్రీ అవార్డును పొందారు. 2001లో ఆయనకు ఇండియన్ ఇన్‌స్టిట్యూట్ ఆఫ్ కార్టూనిస్ట్స్ లైఫ్ టైమ్ అచీవ్‌మెంట్ అవార్డు అందించింది. ముత్యాలముగ్గు, మిస్టర్ పెళ్ళాం సినిమాలకు జాతీయ అవార్డులు పొందారు. సీతాకళ్యాణం (1976), వంశవృక్షం (1980) చిత్రాలకు ఫిలింఫేర్ అవార్డులను పొందటంతోపాటు 2012లో ఫిలిం ఫేర్ ద్వారా లైఫ్ టైమ్ అచీవ్‌మెంట్ అవార్డు పొందారు. 1986లో బాపు రఘుపతి వెంకయ్య అవార్డు, ఆంధ్రప్రదేశ్ ప్రభుత్వంచే లైఫ్ టైమ్ అచీవ్‌మెంట్ అవార్డు పొందారు. బాలరాజు కథ (1971), అందాల రాముడు (1973), ముత్యాలముగ్గు (1975), పెళ్ళిపుస్తకం (1991), మిస్టర్ పెళ్ళాం (1993), శ్రీరామరాజ్యం (2011) సినిమాల ద్వారా ఉత్తమ దర్శకుడిగా నంది అవార్డులు. ఇవే కాక ఇంకా ఎన్నో అవార్డులు, బిరుదులు, సత్కారాలు బాపు కీర్తి కిరీటంలో చేరి మెరిశాయి.