జుట్టు పొట్టిగా ఉందా ఈ హెయిర్ స్టైల్స్ ట్రై చేయండి.. అదిరిపోతారు..!

ప్రస్తుత కాలంలో ఉద్యోగానికి వెళ్లే మహిళలు ఎదుర్కొనే ప్రధాన సమస్యల్లో సమయాభావం ఒకటి. ఉదయాన్నే ఆఫీసుకి త్వరగా సిద్ధమయ్యే హడావుడిలో జుట్టును ఎలా స్టైల్  చేసుకోవాలో అర్థం కాక చాలామంది గందరగోళానికి గురవుతుంటారు. ముఖ్యంగా పొట్టి జుట్టు లేదా మధ్యస్థ పొడవు ఉండే జుట్టు ఉన్నవారు ప్రతిరోజూ ఒకే రకమైన హెయిర్ స్టైల్ వేసుకోవడం లేదా కేవలం ఫ్రీ హెయిర్ వదిలేయడం చేస్తుంటారు. దీనివల్ల కొద్ది రోజులకు ఆ లుక్ బోర్ కొట్టేస్తుంది.

అయితే పొట్టి జుట్టు ఉన్నంత మాత్రాన అందమైన హెయిర్ స్టైల్స్ వేసుకోలేమని అనుకోవడం పొరపాటు. కొద్దిపాటి సృజనాత్మకత, చిన్న చిన్న హెయిర్ క్లిప్పుల సహాయంతో చాలా తక్కువ సమయంలోనే ఎంతో ఆకర్షణీయంగా, ప్రొఫెషనల్ గా కనిపించేలా జుట్టును అలంకరించుకోవచ్చు. ఆఫీసు వాతావరణానికి సరిగ్గా సరిపోయే, త్వరితగతిన వేసుకోగలిగే ఐదు రకాల హెయిర్ స్టైల్స్ గురించి  వివరంగా తెలుసుకుంటే..

స్లీక్ లో పొనీటైల్..

మధ్యస్థ పొడవు ఉన్న జుట్టు అయితే స్లీక్ లో పొనీటైల్ చాలా చక్కని ఎంపిక అవుతుంది. ముందుగా జుట్టును నీటుగా దువ్వుకుని, మెడ దగ్గరగా కింది భాగంలో రబ్బర్ బ్యాండ్ తో ముడి వేసుకోవాలి. ముఖం మరింత అందంగా కనిపించడం కోసం ముందు భాగం నుండి కొన్ని వెంట్రుకలను తేలికగా వదులుగా వదిలేయవచ్చు. ఫార్మల్ దుస్తులు ధరించినప్పుడు ఈ హెయిర్ స్టైల్ చాలా రాయల్ గా, ప్రొఫెషనల్ లుక్ ఇస్తుంది.

హాఫ్ అప్ హాఫ్ డౌన్ స్టైల్..

జుట్టును పూర్తిగా ముడివేయడం ఇష్టం లేని వారు ఈ స్టైల్ ఎంచుకోవచ్చు. తల పైభాగంలో ఉన్న కొంత జుట్టును మాత్రమే వెనక్కి తీసుకువెళ్లి చిన్న క్లిప్ లేదా రబ్బర్ బ్యాండ్ తో పిన్ చేయాలి. మిగిలిన జుట్టును కిందకు వదిలేయాలి. ఇది వేసుకోవడానికి కేవలం రెండు నిమిషాల సమయం మాత్రమే పడుతుంది, పైగా చూడటానికి ఎంతో ట్రెండీగా ఉంటుంది.

సైడ్ పార్టింగ్ విత్ క్లిప్ స్టైల్..

పొట్టి జుట్టు ఉన్నవారికి ఇది చాలా వేగంగా అయిపోయే స్టైల్. జుట్టును ఒక పక్కకు పాపిడి తీసి, ఎక్కువ భాగం ఉన్న వైపు జుట్టును చెవి వెనుకకు దువ్వి అందమైన హెయిర్ క్లిప్ లేదా క్లా క్లిప్ తో సెట్ చేయాలి. ఇది జుట్టును ముఖం మీద పడకుండా ఆపడమే కాకుండా, చాలా స్టైలిష్ లుక్ ఇస్తుంది.

సింపుల్ లో బన్..

పొట్టి జుట్టు ఉన్నవారు కూడా చిన్న జుట్టు ముడిని చాలా సులభంగా వేసుకోవచ్చు. జుట్టునంతా మెడ దగ్గరకు తీసుకువచ్చి చిన్న ముడిలా తిప్పి పిన్నులతో గట్టిగా అమర్చాలి. ఒకవేళ కొన్ని చిన్న వెంట్రుకలు బయటకు వస్తే వాటిని తేలికగా సెట్ చేసుకుంటే సరిపోతుంది. ఆఫీసు పనిలో ఉన్నప్పుడు జుట్టు అసౌకర్యం కలిగించకుండా నీటుగా ఉండటానికి ఇది సరైన ఎంపిక.

ఈ ఐదు రకాల హెయిర్ స్టైల్స్  సమయాన్ని ఆదా చేయడమే కాకుండా, ప్రతిరోజూ ఆఫీసులో  కొత్తగా, ఎంతో ఆకర్షణీయంగా కనిపించేలా చేస్తాయి.  జుట్టు పొడవు, ఆకృతికి తగినట్లుగా వీటిలో చిన్న చిన్న మార్పులు చేసుకుంటూ  లుక్ ని మరింత పెంచుకోవచ్చు.

                     • రూపశ్రీ.