సుగంధ నూనెలతో ఇల్లు పరిమళభరితం   ఇల్లు పరిమళభరితంగా ఉంటే మనసు ఆహ్లాదంగా ఉంటుంది. ఐతే కొన్నిసార్లు వంట చేసిన తరువాత ఏర్పడే ఘాటు వాసనలతో, గాలి, వెలుతురు లేక ఏర్పడే దుర్వాసనలతో ఇబ్బందికరంగా అనిపిస్తుంటుంది. అటువంటి సమస్యలని రసాయనాలతో కాకుండా సుగంధ నూనెతో పరిష్కరించుకోవచ్చు. * అరబకేట్ నీటిలో పావుకప్పు వెనిగర్, పెద్ద చెంచా నిమ్మరసం నూనె కలిపి గదిలో కాస్త చల్లితే.. గదిలోని వంట వాసనలు పోయి హాయి వాతావరణంతో నిండిపోతుంది. * కార్పెట్లు మురికిగా మారి దుర్వాసన వస్తుంటే.... కప్పు బేకింగ్ సోడాకి, చెంచాడు ఏదైనా సుగంధ నూనేలని కలపాలి. ఈ మిశ్రమాన్ని కార్పెట్ పై చల్లి తెల్లారి వాక్యుమ్ క్లీనర్ తో శుభ్రం చేసుకొంటే సరిపోతుంది. * కిటికీ అద్దాలు దుమ్ముపట్టి ఉంటే కప్పు వెనిగర్ కి చెంచా లావెండర్ పరిమళన్ని జోడించి తుడిస్తే సరి. అవి తలుక్కుమనడమే కాకుండా సువాసనభరితంగా కూడా ఉంటాయి. * వంట చేసిన తరువాత గది అంతా ఆవరించే ఘాటు వాసనలు తొలగిపోవడానికి ఒక గిన్నె నిండా నీళ్ళు తీసుకొని దానిలో దాల్చిన చెక్కని వేసి మరిగిస్తే గది చక్కని పరిమళాలు వెదజల్లుతుంది. * దుస్తులు ఒక్కచోట పోగుపడి.. ముక్కిపోయిన వాసన వస్తుంటే ఎండలో ఆరవేయ్యాలి. వీలుకానప్పుడు నిమ్మ, లావెండర్ వంటి ఏదైనా పరిమళంలో ఒక జేబు రుమాలుని ముంచి దానిని దుస్తుల మధ్య ఉంచితే సరిపోతుంది.

సీతాదేవి సామాన్యురాలు కాదు!       రామాయణం గురించి ఆలోచన రాగానే రాముడు, హనుమంతుడు, రావణుడు వంటి పాత్రలే గుర్తుకువస్తుంటాయి. ఏతావాతా సీతమ్మ తల్లి గుర్తుకువచ్చినా ఒక అబలగా, లక్షణరేఖను దాటిన వ్యక్తిగానే అభిప్రాయాలు ఏర్పడతాయి. రామాయణంలో రాముడు ఎంత ముఖ్యమో సీత కూడా అంతే ముఖ్యమన్న స్పృహ చాలా అరుదు. సినిమాల్లో అంజలీదేవిలాగానే సీతాదేవి కూడా నిరంతరం దుఃఖితురాలై ఉంటుందని ఓ అంచనా! నిజంగా అంతేనా... రామాయణానికి ముందే సీత ఉంది! రామ అన్న పేరులాగానే సీత అన్న పేరులో కూడా రెండక్షరాలే! తిరగేసి వల్లెవేస్తే అదే పేరు పదేపదే వినిపిస్తుంది. విచిత్రంగా సీత అన్న పేరు రామాయణానికి ముందే వచ్చిన వేదాలలో కూడా వినిపిస్తుంది. రుగ్వేదంలో వ్యవసాయానికి అధినేత్రిగా సీత అనే దేవత కనిపిస్తుంది. ఆ తరువాతకాలంలో జనకుడు భూమిని దున్నుతుండగా సీత దొరికిన విషయం తెలిసిందే! అందుకే సీత అన్న పదానికి నాగటిచాలు అన్న అర్థం కూడా వస్తుంది. అంటే అనాదిగా మన పూర్వికులు భూమిలోని జీవానికి సీతమ్మ తల్లిని ఓ ప్రతరూపంగా భావించేవారన్నమాట! పట్టిన పట్టు వీడని సీత రామాయణంలో సీత మహా సాదుజీవిగా కనిపిస్తుంది. కానీ అవసరం అనుకున్నప్పుడు ఆమె పట్టిన పట్టుని వీడకపోవడాన్ని గమనించవచ్చు. మహా బలశాలి అయిన రావణాసురుడు ఆమె చెంతకు చేరినప్పుడు.... అతను ఒక గడ్డిపోచతో సమానం అన్నట్లుగా ప్రవర్తించి అహాన్ని దెబ్బతీస్తుంది. హనుమంతుడు లంకలోకి ప్రవేశించినప్పుడు అతనితో తిరిగివెళ్లే అవకాశం ఉన్నా కూడా... రాముడే వచ్చి రావణుని ఓడించి తనని చెర నుంచి విడిపించాలని కోరుతుంది. ఇంతకంటే బలయైన వ్యక్తిత్వాన్ని ఊహించగలమా! గీత దాటింది స్వేచ్ఛ కోసమే! లక్ష్మణుడు గీసిన గీత దాటిందని సీతను వేలెత్తి చూపుతారు కొందరు. కానీ సీత గీత దాటకపోయి ఉంటే రావణుని సంహారమే జరిగి ఉండేది కాదు కదా! అయినా ఒకరు గీసిన గీత వెనకే ఉండిపోతే సీతకి సొంత వ్యక్తిత్వం ఉన్నట్లు ఎలా అవుతుంది? సీత తను గీత దాటాలనుకుంది. దాటింది. అంతే! దాని తరువాత వచ్చే పర్యవసానాలకి ఆమె సిద్ధపడి ఉండవచ్చు. తనని ఎవరూ లోబరుచుకోలేరనో, ఎవరన్నా తనని హాని తలపెట్టినా భర్త రక్షిస్తాడనో... ఆమెకు నమ్మకం ఉండవచ్చు. అనుమానానికి ఆత్మాభిమానమే జవాబు సీత గర్భవతిగా ఉండగానే రాముడు ఆమెను అడవులకి పంపాడు. కానీ సీతమ్మ బేలగా మారి తన పుట్టింటికి చేరలేదు. బిడ్డలను కని అడవిలోనే పెంచి పెద్దచేసింది. వారు తండ్రిని సైతం ఎదుర్కొనే యోధులుగా తీర్చిదిద్దింది.  ఆ పిల్లలని రాముడు కనుగొని వారిని ఆహ్వానించగానే, వారితో పాటు సీతాదేవి అయోధ్యకు బయల్దేరలేదు. తనని అనుమానించి అవమానకరంగా వెళ్లగొట్టిన అయోధ్యాపురికి ఆమె ఎలా చేరుకుంటే ఆమె గొప్పదనం ఏముంటుంది? అందుకే తన తల్లి భూదేవిలోకే వెళ్లిపోయేందుకు సీతాదేవి సిద్ధపడింది. అది ఆత్మహత్య కాదు- నిష్క్రమణ! నిరసన! అవతార సమాప్తి! పగ తీర్చుకుంది సీతాదేవి అబల కాదు... కారణజన్మురాలు అని కొన్ని కావ్యాలు పేర్కొంటున్నాయి. కుశధ్వజుడు అనే రుషి కుమార్తె అయిన వేదవతే తనతో అనుచితంగా ప్రవర్తించిన రావణాసురుని మీద పగతీర్చుకునేందుకు సీతగా జన్మించిందట! అంటే అమాయకంగా కనిపిస్తూనే అను అనుకున్నది సాధించిందన్నమాట సీతాదేవి. శివధనుస్సుని సైతం కదిలించగల బలవంతురాలు సీత. అందుకనే ఆ ధనుస్సుని ఎక్కుపెట్టగలిగే వీరుడే ఆమెకు సాటి రాగలడంటూ స్వయంవరాన్ని ప్రకటించారు జనకుడు. మరి సీత బలహీనురాలు ఎలా అవుతుంది??? - నిర్జర.    

    చేతులున్నవారి మీద ఆమెది పైచేయి   అసలే ఆడపిల్ల! ఆపై రెండుచేతులూ లేకుండా పుట్టింది. పోనీ కుప్పలకుప్పలుగా డబ్బులున్నాయా అంటే మధ్యతరగతి కుటుంబమయ్యే. ఇదీ ‘దామినీ సేన్‌’ పరిస్థితి. మరొకరు ఆమె స్థానంలో ఉంటే ఏం జరిగేదో కానీ... దామినీ మాత్రం తానేమిటో నిరూపించుకుంది. ప్రతి విషయంలో ఇతరులతో పోటీపడుతూ- ఏకంగా ఓ ప్రపంచ రికార్డునే సాధించింది. దామినికి పుట్టుకతోనే చేతులు లేకపోవడంతో ఆమెకు చదువు ఎలాగా అన్న సమస్య మొదలైంది. పసి దామినికి స్నానం చేయించడం, బట్టలు తొడగడం వంటి పనుల్లో అయితే తల్లి సాయపడగలదు. కానీ ఆమెతో అక్షరాలను రాయించేదెలా! అందుకోసం ఆమె తల్లి మాధురీ సేన్ ఒక నిర్ణయం తీసుకుంది. దామినీ కాళ్లతోనే అక్షరాలను దిద్దించాలనుకుంది. కానీ ఎలా! అందుకోసం ముందు తనే కాళ్లతో అక్షరాలు రాసే ప్రయత్నం చేసింది. అందులో కాస్త నేర్పు సాధించాక అదే విద్యను దామినీకి నేర్పింది.     దామినీకి అక్షరాలు వచ్చేశాయి సరే! మరి ఆమెను బడిలో చేర్చేదెలా? అన్నది మరో సవాలు. చేతులు లేని దామినిని చేర్చుకునేందుకు పాఠశాల యజమాన్యాలు మొదట నిరాకరించాయి. కానీ ‘ఒక్కసారి ఆమెను చేర్చుకుని చూడండి. ఆమెను బడిలో కూర్చోబెట్టి చూడండి..’ అంటూ దామిని తండ్రి అభ్యర్థనను మన్నించక తప్పలేదు. నిజంగానే ఒక్కసారి చేర్చుకున్నాక దామిని మిగతా విద్యార్థులతో ఏమాత్రం తీసిపోదన్న విషయం ఉపాధ్యాయులకు అర్థమైంది. దామిని ఒకో తరగతినే దాటుకుంటూ రెండేళ్ల క్రితం ‘మా బంజారి గురుకుల్ విద్యాలయ(రాయ్‌పూర్)’లో పదో తరగతిని కూడా పూర్తిచేసింది. అది కూడా 80 శాతం మార్కులతో! ఇంతాచేసి దామిని కోసం పాఠశాల యాజమాన్యం ప్రత్యేకమైన ఏర్పాట్లు ఏమీ చేయాల్సి వచ్చేది కాదు. ఆమె కాళ్లతో నోట్స్‌ రాసుకునేందుకు కాస్త విడిగా కూర్చోనిస్తే సరిపోయేది!     దామిని చదువులోనే కాదు! మిగతా ఏ విషయంలోనూ ఇతరులకు తీసిపోదు. దామినిని చూస్తే ఆమెకు చేతులు లేవన్నది ఉత్తమాటే అనిపిస్తుంది. తన రెండు కాళ్లతోనే తలదువ్వుకోవడం, బట్టలు ఉతకడం, పాలు తాగడం దగ్గర్నుంచీ వంట చేయడం వరకూ అన్ని పనులూ చేసేస్తుంది. ఇదంతా ఒక ఎత్తయితే కాళ్లతో చకచకా బొమ్మలు గీసేయడం మరో ఎత్తు. మొదట్లో ఏదో కూతురు సరదా పడుతోంది కదా అని దామని తల్లిదండ్రులు ఆమెను బొమ్మలు గీసేందుకు ప్రోత్సహించేవారు. కానీ కార్టూన్లతో మొదలుపెట్టిన దామినిలోని చిత్రలేఖనం భారీ బొమ్మలు గీసే స్థాయికి చేరుకుంది. అంతేకాదు! కాలితో ఒక గంటలో అత్యధిక బొమ్మలు (38) గీసిన చిత్రకారిణిగా ప్రపంచ రికార్డుని సొంతం చేసుకుంది.     దామిని ప్రస్థానంలో ఆమె తల్లిదండ్రులు, చెల్లెలు అండగా ఉన్నారన్న మాట నిజమే! అయితే స్వతహగా ఆమెలో సానుకూల దృక్పథం లేకపోతే ఎవరెంతగా ప్రోత్సహించినా ఉపయోగం ఉండేది కాదు కదా! ఆ ఆత్మవిశ్వాసమే దామిని మాటల్లో స్పష్టంగా కనిపిస్తుంది. మొదట్లో తాను కాళ్లతో పనిచేయడాన్ని నేర్చుకున్నప్పుడు, జనం నవ్వుతారేమో అన్న ఆలోచన వచ్చిందనీ... కానీ ఇతరుల గురించి కాకుండా తన గురించి ఆలోచించడంతో ముందుకు సాగిపోయానని చెబుతుంది. అంతేకాదు! ‘మనమీద మనకి నమ్మకం ఉంటే, ప్రపంచం ఏమనుకుంటుందో అన్న ఆలోచన అడ్డుపడదని’ అంటోంది. ‘భగవంతుడు ఒక అందమైన జీవితాన్ని ప్రసాదించాడనీ... ఆ జీవితంతో ఏదో ఒకటి సాధించాలనీ’ ఆలొచింపచేసేలా మాట్లాడుతోంది.   దామిని ప్రస్తుతం డిగ్రీ మొదటి సంవత్సరం చదువుతోంది. మున్ముందు తనబోటివారికి సాయంగా నిలిచేందుకు IAS సాధించడమే తన లక్ష్యమని చెబుతోంది. దామిని ప్రతిభ, పట్టుదల ఎరిగినవారికి, ఆమె తన లక్ష్యాన్ని సాధిస్తుందన్న విషయంలో ఎలాంటి అనుమానమూ లేదు. చేతులు ఉండికూడా మనం చేయలేని పనిని దామిని అలవోకగా సాధించి చూపుతుందని... ఆమె నేస్తాల నమ్మకం. నిజమే కదా!     - నిర్జర.

  దేశం మర్చిపోయిన మహిళా శాస్త్రవేత్త - అన్నామణి     ఆమధ్య ఇస్రో వందకు మించిన ఉపగ్రహాలను ఆకాశంలోకి పంపగానే దేశం యావత్తూ గర్వపడింది. ఇస్రోలో మహిళా శాస్త్రవేత్తల మీద ప్రత్యేకమైన కథనాలు రాసేందుకు పత్రికలన్నీ ఉత్సాహ పడిపోయాయి. మంచిదే! కానీ ఆడవారిలో నూటికి ఒక్కరు కూడా చదువుకునే అవకాశం లేని రోజుల్లోనే... ఒక మహిళ విజ్ఞానరంగంలో దూసుకుపోవడం ఎంతటి విజయమో కదా! అలాంటి అరుదైన విజయాన్ని సాధించిన వ్యక్తి ‘అన్నామణి’. కేరళలోని ట్రావెన్కోర్ పట్నానికి సమీపంలోని ఓ చిన్న ఊరిలో 1918లో జన్మించారు అన్నామణి. తండ్రి ఇంజనీర్ కావడం చేతనో ఏమో... చిన్నప్పటి నుంచే ఆమెకు చదువంటే చాలా ఇష్టంగా ఉండేదట. ఆ ఇష్టంతోనే విపరీతంగా పుస్తకాలను చదివేవారు. ఆమె ఎనిమిదో ఏట బంగారు దిద్దులను బహుమతిగా ఇస్తానంటే కాదు... బ్రిటానికా ఎన్సైక్లోపీడియా కావాలని అడిగారట అన్నామణి. ఆమె పెరిగేకొద్దీ చదువు పట్ల ఆమె ఆసక్తి కూడా పెరుగుతూనే వచ్చింది. అందుకనే తన తోటివారంతా త్వరత్వరగా పెళ్లిళ్లు చేసేసుకుంటే, అన్నామణి మాత్రం చదువుకునేందుకే ప్రాధాన్యతని ఇచ్చారు. అలా తనకి ఇష్టమైన భౌతికశాస్త్రంలో బీఎస్సీ ఆనర్స్ డిగ్రీని సాధించారు. చదువు పూర్తయిపోయిన తరువాత డాక్టరేట్ పట్టా కోసం సర్ సి.వి.రామన్ లేబొరేటరీలో చేరారు మణి. అక్కడ ఒకటి కాదు, రెండు కాదు కాంతి గురించి ఏకంగా ఐదు రీసెర్చి పేపర్లను అందించారు. అయినా స్త్రీ అన్న కారణంగా మద్రాసు ప్రెసిడెన్సీ కాలేజి ఆమెకు పీహెచ్డీ పట్టాను అందించేందుకు సిద్ధపడలేదు. ఏవో చిన్నాచితకా సాకులు చూసి ఆమె శ్రమను వృధా చేసేసింది. అయినా అన్నామణిలో పట్టుదల ఏమాత్రం తగ్గలేదు సరికదా... ఈసారి ఉన్నత విద్య కోసం ఏకంగా అమెరికాకే ప్రయాణమయ్యారు. అమెరికాలో వాతావరణశాస్త్రం (Meteorology)లో ఉన్నతవిద్యను పూర్తిచేసి 1948లో దేశానికి తిరిగివచ్చారు అన్నామణి. అ సమయంలో దేశంలోని విజ్ఞానరంగం ఇంకా ప్రారంగభదశలోనే ఉంది. శాస్త్రపరిశోధనకు తగిన మౌలిక సదుపాయాలు కానీ, స్థిరమైన సంస్థలు కానీ లేవు. అలాంటి పరిస్థితులలో పునేలోని Indian Meteorological Departmentలో చేరారు అన్నామణి.   విజ్ఞానరంగానికే అంతగా ప్రాముఖ్యత లేని ఆ కాలంలో ఇక వాతావరణశాస్త్రం గురించి చెప్పేదేముంది. అసలు వాతావరణానికి ఓ ప్రత్యేకమైన శాఖ అన్న విషయమే జనాలకి ఆశ్చర్యంగా ఉండేది. అలాంటి శాఖతో అద్భుతాలు చేసి చూపారు అన్నామణి. దేశంలోని వివిధ ప్రాంతాలలో సోలార్ రేడియేషన్ స్థాయిని కొలిచే ప్రయత్నం చేయడం; ఓజోన్ పొర తీరు గురించి ఎప్పటికప్పుడు వివరాలను సేకరించడం; పవన విద్యుత్తు, సోలార్ విద్యుత్తుని ఉత్పత్తి చేసేందుకు అనువైన ప్రాంతాలను ఎంపిక చేయడం... ఇలా వాతావరణ శాఖకి కూడా ఓ ప్రత్యేకత ఉందని నిరూపించారు. ఆ ప్రతిభతోనే భారత వాతావరణశాఖకు డిప్యూటీ డైరక్టర్ జనరల్ స్థాయికి చేరుకున్నారు. ఆడవారికి చదువే దండగనుకునే కాలంలో ఉన్నత విద్యతో పాటు ఉన్నతమైన పదవులనీ అలంకరించారు అన్నామణి. ఆవిడ వృత్తి జీవితమే కాదు, వ్యక్తిగత జీవితం కూడా అంతే ఉన్నతంగా ఉండేది. చిన్నప్పుడు ఎప్పుడో గాంధీగారిని చూసి ప్రభావితం అయిన అన్నామణి తన జీవితాంతమూ ఖాదీ వస్త్రాలనే ధరించేవారు. ఎంతసేపూ విజ్ఞానరంగానికి ఏదన్నా చేయాలనే తలంపుతో ఆమె అవివాహితగానే మిగిలిపోయారు. దేశానికి ఇంత సేవ చేసినా కూడా మీడియా ఆమెను విస్మరించడం ఆశ్చర్యకరం. అన్నామణి చనిపోయి ఇప్పటికి 15 సంవత్సరాలు గడుస్తున్నా దేశ ప్రజలు ఆమె సేవలను గుర్తుచేసుకోకపోవడం బాధాకరం. బహుశా అన్నామణి ఇలాంటి గుర్తింపునో, కృతజ్ఞతనో ఆశించి తన జీవితాన్ని గడిపి ఉండరు. విజ్ఞానం పట్ల ఆసక్తి, చేస్తున్న పనికి న్యాయం చేయాలనే తపనే ఆమెను ముందుకు నడపించి ఉంటాయి. అంత ఉన్నతంగా ఆలోచించడం మనవల్ల కాదు కాబట్టి, ఆమెని ఇంకా గుర్తించలేకపోతున్నాం. - నిర్జర.

ఆడవారిగానే ఉంటాము!     ఎటుచూసినా మగవారి ఆధిపత్యమే కనిపించే ఈ ప్రపంచంలో ఒకోసారి ‘ఈ ఆడబ్రతుకు ఎందుకురా బాబూ’ అన్న నిర్వేదం కలగక మానదు. కానీ పరిస్థితులు మారుతున్నట్లున్నాయి. ఎందులోనూ, ఎవరితోనూ తక్కువ కాదని నిరూపించుకునేందుకు మహిళలు చేసిన పోరాటం మంచి ఫలితాలనే ఇస్తున్నట్లుంది. అందుకనే ఇప్పుడు ఆడవారు తమ జీవితం పట్ల నిర్వేదం చెందడం తగ్గింది. బీబీసీలో వచ్చే Radio 4 Woman's Hour కార్యక్రమాన్ని మొదలుపెట్టి 70 సంవత్సరాలు పూర్తయ్యింది. ఈ 70 ఏళ్లలో మహిళల అభిప్రాయాలలో ఏమన్నా మార్పులు వచ్చాయేమో పరిశీలించేందుకు వారు వేయిమందికి పైగా మహిళలను కొన్ని ప్రశ్నలు వేశారు. ఈ సమాధానాలతో గతకాలంలో జరిగిన కొన్ని పరిశోధనలను పోల్చి చూశారు. ఫలితాలు ఇవిగో... ఉద్యోగం: 1951లో కేవలం 31 శాతం మహిళలు మాత్రమే ఉద్యోగంలో ఉంటే ఇప్పుడు ఏకంగా 60 శాతం మంది ఉద్యోగాలు చేస్తున్నారు. అంతేకాదు! వయసుతో సంబంధం లేకుండా ఆడవారంతా కూడా ఉద్యోగాలకు సిద్ధపడటం మరో విశేషం. 1951లో 55 ఏళ్లు పైబడిన స్త్రీలలో ఉద్యోగం చేసేవారి సంఖ్య 22 శాతంగా ఉంటే, ఇప్పుడని ఏకంగా 62 శాతానికి చేరుకుంది. ఉద్యోగం చేయడానికి ఎందుకంత ప్రాధాన్యత ఇస్తున్నారని అడిగిన ప్రశ్నకు వారి దగ్గర ఖచ్చితమైన జవాబులు ఉన్నాయి. ఆత్మగౌరవం కోసం ఉద్యోగం చేయాలనుకుంటున్నామని చాలామంది బదులిచ్చారు. దీనికి తోడు డబ్బు సంపాదించాలన్న కోరిక, పని చేసేందుకు తగిన వాతావరణం ఉండటంతో తాము ఉద్యోగం చేసేందుకు సంకోచించడం లేదని చెప్పారు. కుటుంబ జీవితం: మహిళల వైవాహిక జీవితం కూడా బాగానే ఉన్నట్లు బీబీసీ భావిస్తోంది. 1951లో కేవలం 25 శాతం మహిళలు తమకి వైవాహిక జీవితంలో తగిన స్వాతంత్ర్యం లభించిందని చెప్పగా, ప్రస్తుతం అలా చెప్పే మహిళల సంఖ్య 42 శాతానికి చేరుకుంది. అంతేకాదు పదిమందిలో తొమ్మిదిమంది మహిళలు తమ భర్త తమకు తగినవాడని భావిస్తున్నారు. 1938నాటికి మహిళలలో ఎంతమంది పిల్లల్ని కనాలి అన్నదాని మీద కూడా తగినంత స్పష్టత లేదు. కానీ ఇప్పుడేమో 56 శాతం మహిళలు తమకి ఇద్దరు పిల్లలు ఉంటే బాగుంటుందన్న అభిప్రాయాన్ని వ్యక్తపరిచారు. సమస్యలు లేకపోలేదు: ఉద్యోగమూ, కుటుంబ జీవనమూ తృప్తిగా ఉన్నాయి కదా అని మహిళలకు అసలు సమస్యలేవీ లేవు అనుకోవడానికి లేదు. 46 శాతం మంది తమ అందాన్ని మెరుగుపర్చుకునేందుకు కాస్మెటిక్‌ సర్జరీ చేయించుకుంటే బాగుండు అన్న ఆలోచనలో ఉన్నారు. తాము లావుగా ఉన్నామని బాధపడేవారి సంఖ్య కూడా తక్కువేమీ లేదు. ఇక ఆరోగ్యం గురించీ, ఆర్థిక సమస్యల గురించిన కష్టాలూ అలాగే ఉన్నాయి. ఏతావాతా తేలిందేమిటంటే స్త్రీల జీవితం ఒకప్పటికంటే ఇప్పుడు కాస్త మెరుగుపడిందని... లేదా మెరుగుపడినట్లుగా వారు భావిస్తున్నారని! అందుకే 1947లో తాము ఆడవారిగాకంటే మగవారిగా ఉంటే బాగుండు అనుకునేవారి సంఖ్య 44 శాతంగా ఉంటే, ప్రస్తుతం ఆ సంఖ్య కేవలం 14 శాతంగానే ఉంది! మరి ఈ 14 శాతం చెరిగిపోయేందుకు ఇంకెన్నాళ్లు పడుతుందో! - నిర్జర.

  గ్రీన్ కాఫీతో బరువు తగ్గడం ఖాయం!     ఆరోగ్యానికి గ్రీన్ టీ మంచిదని మనకి తెలిసిందే. మరి గ్రీన్ కాఫీ గురించి ఎంతమందికి తెలుసు? ఇంకా చాలామందికి తెలియదు. ఎందుకంటే దీని వాడకం ఇప్పుడిప్పుడే పెరుగుతోంది. రోస్ట్ చేయని కాఫీ గింజల్ని నానబెట్టి, వాటి నుంచి ఎక్స్ ట్రాక్ట్ చేసేదే గ్రీన్ కాఫీ. దీనిలో క్లోరోజెనిక్ యాసిడ్ ఉంటుంది. ఇది ఒంట్లో ఉన్న కొలెస్ట్రాల్ ను బాగా కరిగిస్తుంది. అంతేకాదు... ఇది ఇన్సులిన్ ఉత్పత్తిని కూడా మెరుగు పరుస్తుందట.   దానివల్ల చక్కెర వ్యాధి వచ్చే అవకాశాలు కూడా బాగా తగ్గుతాయి. ఇది రక్త ప్రసరణను మెరుగు చేస్తుంది. డీటాక్సిఫికేషన్ కి ఉపయోగపడుతుంది. ఆకలిని కూడా అదుపు చేస్తుందట. తద్వారా ఫుడ్ తక్కువ తీసుకుంటాం కాబట్టి బరువు పెరిగే ప్రమాదం తగ్గిపోతుంది. ఇది మెదడును కూడా ఫ్రెష్ గా ఉంచుతుందట. కాబట్టి గ్రీన్ కాఫీని హ్యపీగా తాగేయమంటున్నారు వైద్యులు.     మార్కెట్లో గ్రీన్ కాఫీ మూడు రకాలుగా దొరుకుతోంది. పౌడర్ రూపంలో, డ్రై చేసి ఫ్రీజ్ చేసిన గింజలు, గ్రాన్యూల్స్... ఇలా మూడు రూపాల్లో లభ్యమవుతోంది. వీటితో దేన్ని వాడినా ఫర్వాలేదు. అయితే వీలైనంత వరకూ షుగర్ కానీ తేనె కానీ కలుపుకోకుండా తాగితేనే మంచిది.   మరింత ఉపయోగకరంగా ఉండటానికి పుదీనా ఆకులను కానీ, దాల్చినచెక్క కానీ, అల్లం కానీ వేసి మరిగించి తాగితే మరీ మంచిదట. కాస్త పసుపు కలిపి తాగినా కూడా చాలా మంచిదంటున్నారు. అయితే ఆహరం తిన్న వెంటనే మాత్రం ఎప్పుడూ తాగకూడదట.    రోజుకు ఓ మూడు కప్పులు గ్రీన్ కాఫీ తాగితే వెయిట్ లాస్ చాలా త్వరగా జరుగుతుందని, అంతకు మించి తాగకపోవడం మంచిదని కూడా సూచిస్తున్నారు. ఇంకెందుకాలస్యం... వెంటనే గ్రీన్ కాఫీకి గ్రీన్ సిగ్నల్ ఇవ్వండి మరి! - Sameera

  మన దగ్గరి వ్యక్తుల మనస్తత్వాలని ఎలా అర్థం చేసుకోవచ్చో సరదాగా నేర్చుకుందామా? ఎదుటి వ్యక్తికీ నచ్చిన పండు ఏదో తెలుసుకుంటే... దాని బట్టి వారి స్వభావం గురించి అంచనా వేయచ్చట. మన ఇష్టాయిష్టాలు సహజంగా మన స్వభావం, మనస్తత్వం పై ఆధారపడే ఏర్పడతాయి అంటున్నారు నిపుణులు. కాబట్టి ఆ ఇష్టాయిష్టాలు మన స్వభావానికి అద్దం పడుతాయన్నమాట. సరే నచ్చే పండుని బట్టి వారి స్వభావాన్ని ఎలా అంచనా వేయచ్చో తెలుసుకుందాం.   ఆరెంజ్ : ఆరెంజ్ ను అమితంగా ఇష్టపడే వ్యక్తుల స్వభావం ఎలా వుంటుందో చూద్దాం. వీరు చాలా సహనంగా ఉంటారు. పట్టుదల ఎక్కువ. వీరి పనితీరు నెమ్మదిగా అనిపించినా కష్టపడే తత్వం వీరి స్వంతం. ఏ బంధంలోనైనా వంద శాతం ఇస్తారు. నమ్మకస్తులు ఎవరైనా ఈ వ్యక్తులపై పూర్తి భరోసా పెట్టవచ్చు. వీరిని ఫ్రెండ్ గా పొందని వారు అదృష్టవంతులనే చెప్పాలి.   ఆపిల్ : ఆపిల్ అంటే చాలా ఇష్టమని అన్నారనుకోండి... వాళ్ళు ది బెస్ట్ టీం లీడర్స్ అని అర్థం చేసుకోవాలి. అంటే ముందుండి ఓ టీంని నడిపించే నాయకత్వ లక్షణాలు వీరి స్వంతం. ఉన్నదున్నట్టు ఎదుట వ్యక్తి మొహంపై చెప్పేస్తారు. కాస్త పోగరుబోతుల్లా కనిపిస్తారు. కాని వీరి స్వబావం అది కాదు నిజానికి. కాని మాట కాస్త కరుకుగా ఉంటుంది. వీరిలో నాయకత్వ లక్షణాలుంటాయి కానీ, వీరి లైఫ్ ను వీరే సరిగ్గా, సమర్థవంతంగా నిర్వహించుకోవటంలో కంగారు పడతారు. మామిడి : మామిడి పండును ఇష్టపడే వ్యక్తుల స్వభావం చాలా స్పష్టంగా ఉంటుంది. వీరి ఆలోచనలలో చాలా క్లారిటి వుంటుంది. వీరిని, వీరి ఆలోచనలని, పద్దతులని ప్రభావితం చేయటం అంత సులువు కాదు. వీరి ఇష్టాయిష్టాలు కూడా చాలా బలంగా ఉంటాయి. వీరి జీవితం ఎంతో చక్కగా సాగిపోతుంది. అయితే నచ్చిన వారి దగ్గర పిల్లల్లా మారిపోతారు.. అల్లరి చేసి ఆనందిస్తారు. బొప్పాయి : ఈ పండును ఇష్టపడే వ్యక్తులు మన స్నేహితులయితే చాలు. మన పెదవులపై చిరునవ్వు ఎప్పుడూ విరుస్తునే వుంటుంది. మంచి హాస్య స్వభావులు నవ్వుతూ, నవ్విస్తూ ఉంటారు. ఇతరులతో ఎంతో దయగా ఉంటారు. కొత్త వ్యక్తులతో ఇట్టే కలిసిపోగలరు. సఖులూ. ఫైనాఫిల్, అనాస : వీళ్ళు ఏ పని చేయాలన్నా నిర్ణయం తీసుకుంటే చాలు... వెంటనే మొదలు పెట్టేస్తారు. ధైర్యం ఎక్కువ తనపై తనకుండే నమ్మకమే అందుకు కారణం. వీరికి దేనినైనా సాధించటం ఎంతో తేలిక. అయినా వ్యక్తిగతంగా వీరు ఎవరితోనూ తొందరగా కలవలేరు. కాని ఒకసారి స్నేహితులయితే ఎంతో విలువనిస్తారు ఆ బంధానికి ... కాని వీరిలో బంధంలో ఉండేవారు ఒక్కటి అర్థం చేసుకోవాలి. వీరికి మనసులోని అభిమానాన్ని బయటకి చూపించటం రాదు. నల్ల ద్రాక్ష : వీళ్ళు మృదు స్వభావులు, కాని ముక్కుపై కోపం వుంటుంది. ఎంత తొందరగా కోపం వస్తే, అంత త్వరగా చల్లారిపోతారు. వీరితో ఉండటానికి ఎవరైనా ఇష్టపడతారు. వీరికి జీవితాన్ని ఎంత అందంగా, ఆనందంగా ఉంచుకోవాలో బాగా తెలుసు. ప్రతీ క్షణాన్ని ఆనందంగా గడపడానికి ఇష్టపడతారు. సీతాఫలం : వీళ్ళు చాలా లక్ష్యాలు కలిగి ఉంటారు. చాలా తెలివైన వారు. విజయాల కోసం కష్టపడతారు. అయితే ఎదుటి వ్యక్తుల లోని లోపాలని ఇట్టే పసిగడతారు. దాంతో వీరికి శత్రువులు కూడా ఎక్కువే. వీరు అభిమానాన్ని పైకి చూపరు. ఎదుటివారు అర్థం చేసుకోవాలి. అరటి పండు : వీళ్ళు ఎదుటివారిపై ఎంతో ఇష్టాన్ని చూపిస్తారు. అందరితో ఎంతో మంచిగా ఉంటారు. మంచి సంబంధ బాంధవ్యాలను కలిగి ఉంటారు. అయితే తమ విషయానికి వచ్చేసరికి వారిపై వారికీ నమ్మకం తక్కువ. పక్కవారి తోడుకోసం చూస్తుంటారు. స్వభావసిద్ధంగా వీరు విజయాలకంటే వ్యక్తులకే ఎక్కువ ప్రాధాన్యతనిస్తారు.

అన్ని పనులూ ఒకేసారి - ఆడవారికే సాధ్యం!   ప్రపంచం మారిపోతోంది. ఆ ప్రపంచంతో పాటు మన జీవనశైలీ మారిపోతోంది. మగవారి సంగతేమో కానీ... ఆడవారు  ఇంటాబయటా తామేంటో నిరూపించుకుంటున్నారు. అయితే ఇలా అన్ని రంగాలలోనూ నెగ్గుకురావడం ఆడవారికి వెన్నతో పెట్టిన విద్య అని రుజువు చేస్తోంది ఓ పరిశోధన. మల్టీ టాస్కింగ్: ఒకేసారి వేర్వేరు పనులు చేయగలగడాన్ని మనం మల్టీ టాస్కింగ్ అంటాము. ఉరుకుల పరుగుల జీవితంలో ఈ మల్టీ టాస్కింగ్‌లో నిష్ణాతులు అయితే కానీ ముందుకు సాగలేని పరిస్థితి. ఇక మహిళల జీవితంలో అయితే ఈ మల్టీ టాస్కింగ్‌ తప్పనిసరిగా మారిపోయింది. ఒక పక్క కూరలో తాలింపు వేశామో లేదో చూసుకోవాలి, మరోపక్క పిల్లల్ని బడికి సిద్ధం చేయాలి, ఇంకో పక్క ఇంటికి వచ్చేవారికి సమాధానం చెప్పుకోవాలి. ఇక తాము కూడా ఏదన్నా ఆఫీసులో పనిచేస్తుంటే, ఆ హడావుడి పరాకాష్టకి చేరుకుంటుంది. మొత్తానికి ఇంట్లోనే ఉండే గృహిణులైనా, ఆఫీసుల్లో పనిచేస్తున్న స్త్రీలైనా... మల్టీ టాస్కింగ్‌ మాత్రం తప్పనిసరిగా మారిపోయింది.   ఓ ప్రయోగం: మల్టీటాస్కింగ్ చేయడంలో మగవారికీ, ఆడవారికీ మధ్య ఏమన్నా తేడా ఉందేమో అన్న అనుమానం వచ్చింది కొందరు పరిశోధకులకి. రష్యాకి చెందిన సదరు పరిశోధకులు తమ అనుమానాన్ని నివృత్తి చేసుకునేందుకుగాను ఓ 140 మంది అభ్యర్థులను ఎంచుకున్నారు. వీరిలో 69 మంది మగవారు కాగా, 71 మంది ఆడవారు. వీరిలో 20 నుంచి 65 ఏళ్లలోపు వయసు కలిగినవారు ఉన్నారు. వీరందరికీ కూడా ఒకేసారి వేర్వేరు పనులను పురమాయించారు పరిశోధకులు. ఉదాహరణకు ఒక చేత్తో వేర్వేరు ఆకారాలలో ఉన్న వస్తువులను వేరు చేస్తూ, మరో చేత్తో వేరు వేరు అంకెలని వరుసక్రమంలో ఉంచమన్నారు.   ఫలితం! అభ్యర్థులు మల్టీటాస్కింగ్‌ చేస్తున్న సమయంలో వారి మెదడు ఎలా పనిచేస్తోందో తెలుసుకొనేందుకు MRI పరీక్షలు చేసి చూశారు. దీంతో మల్టీటాస్కింగ్ చేసే సమయంలో మగవారి మెదడు ఆడవారి మెదడుకంటే ఎక్కువ శక్తిని వినియోగించుకోవడాన్ని గమనించారు. అంతేనా! వేర్వేరు పనులు ఒకేసారి చేయాల్సి వచ్చినప్పుడు, వారి మెదడులోని వేర్వేరు భాగాలన్నీ కలసి పనిచేయాల్సి వచ్చిందట. కానీ ఆడవారిలో మెదళ్లు మాత్రం ఎలాంటి హడావుడీ లేకుండా అతి తక్కువ సమయంలో, అతి తక్కువ శక్తిని ఉపయోగిస్తూ... వేర్వేరు పనులను నిర్వహించేశాయి. ఎప్పుడో 50 ఏళ్లు దాటిన తరువాతగానీ ఆడవారిలో మల్టీటాస్కింగ్‌ సామర్థ్యంలో తగ్గుదల కనిపించలేదు. ఆడవారిలో కనిపించిన ఈ ప్రత్యేకతకి కారణం ఏమిటన్నది మాత్రం పరిశోధకులకు అంతుపట్టలేదు. బహుశా ఇంటిని చక్కదిద్దుకునే ప్రయత్నంలో ఆడవారికి అప్రయత్నంగానే ఈ విద్య అబ్బి ఉంటుంది. ఎలాంటి పరిస్థితినైనా ఎదుర్కొనే మనోనిబ్బరంతోనే ఇది సాధ్యపడి ఉంటుంది. కానీ ఒకేసారి ఇన్నేసి పనులు చేస్తున్నారు కదా అని... వారితో వీలైనంత చాకిరీ చేయించుకోవడమే విషాదకరం!   - నిర్జర.  

  Valentines Fun Ideas for All   Valentines Day has become so famous among the kids too, these days...few years ago, it was just for the youngsters..now, it is for everyone on the block..it is almost like a 'Thank you Day'. You can greet anyone who is special and send a gift for anyone who is close to your heart, it could be your Grandma, or a Best Friend, or your child can even give a card to his/her favorite Teacher. Ofcourse, the younger kids do it, the better. And so unofficially, it has become a Kids celebration day. Schools are hosting Valentines day parties for the little ones, they make heart crafts for eachother, Teachers get gifts from their cute students...Parents spend with them enjoying a sweet cupcake and lots of fun. The web has so many valentines day craft ideas for every age group. Buy a few ready-made greeting cards, or bring home few colorful papers, cut them up in heart shapes and prepare your own card, write what you like to express and Lo.,.. You are ready for the day ! Cards need not just be item ..you can bake a red velvet or a strawberry cake for your loved one, or steal a sweet recipe from someone or the internet and prepare a dessert for the evening, bring few dark chocolate packs and stash them on the couch for your special ones to find them to surprise when they crash on the couch.     I know the restaurants will be too busy that day, amd forget about going out without a dinner reservation if its a weekend, like this years...make sure to make your evening or afternoon a memorable one with family and friends by cooking and decorating together for fun. Sleepovers for kids and youngsters wouldne a lot of fun and a memory down the lane. Gather some old photographs of your couple or with your kids and family members and create a collage, set up a power-point presentation when everyone gathers for an exciting feeling and a nostaligic evening. If you are married, dig out all the old valentines day gifts your spouse gave you and arrange them on a table with candles lit up...dont forget to take new photographs of the present moments, they dont come back !! Compile an audio album of your loved ones favorite songs or your child's favorite rhymes or kids songs and play them when together for a casual amd exciting dancing time. A movie-nite with special ones is a good idea, anyways. Dine-out is fun but the restaurants are crowded that day and so you maynot be able to spend longer or have much privacy. Besides everything, those traditional surprise gifts have always been there. Make sure you give something the other person likes, not what you like. It is jot about the date, it is about the day...make it special and sweetly memorable !! Prathyusha Talluri  

మార్నింగ్ సిక్‌నెస్‌ మంచిదే!   మాతృత్వం గొప్ప వరమే! కానీ అదో క్లిష్టమైన ప్రయాణం కూడా. తల్లిని కాబోతున్నానని తెలిసిన క్షణం నుంచి బిడ్డను ప్రసవించేదాకా, స్త్రీని రకరకాల సమస్యలు చుట్టుముడతాయి. వాటిలో ‘మార్నింగ్‌ సిక్‌నెస్‌’ ఒకటి. అయితే ఈ మార్నింగ్‌ సిక్‌నెస్‌ విషయమై జరిగిన ఓ పరిశోధనతో... ఈ సమస్య వల్ల లాభమే కానీ నష్టం లేదని తెలుస్తోంది. ఈ వివరాలు ఇవీ... ఏమిటీ మార్నింగ్‌ సిక్‌నెస్‌! గర్భవతిగా ఉన్నప్పుడు వాంతులు, వికారంతో కూడిన ఇబ్బందినే మార్నింగ్‌ సిక్‌నెస్‌ అంటారు. ఈ సమస్య సాధారణంగా ఉదయం వేళల్లో మొదలై, రోజు గడిచేకొద్దీ సర్దుకుంటుంది కనుక ఆ పేరు వచ్చింది. గర్భవతులుగా ఉన్న స్త్రీలలో కనీసం 80 శాతం మందిలో ఈ పరిస్థితి కనిపిస్తుంది. కాబట్టి దీనిని ఓ తప్పనిసరి పరిస్థితిగానే భావిస్తుంటారు.   ఇంతకీ ఈ మార్నింగ్‌ సిక్‌నెస్‌ ఎందుకు వస్తుందన్నదానిమీద ఇప్పటివరకూ ఓ స్పష్టత లేదు. గర్భధారణ సమయంలో తల్లి శరీరంలోని హార్మోనులలో వచ్చే మార్పుల కారణంగానే మార్నింగ్ సిక్‌నెస్‌ వస్తుందని మాత్రం ఊహిస్తున్నారు. మార్నింగ్ సిక్‌నెస్‌ వల్ల తీవ్రమైన ఆరోగ్య సమస్యలు తలెత్తనప్పటికీ... చిన్నా చితకా ఇబ్బందులు మాత్రం తప్పవు. మనసంతా అలజడిగా, పనులు చేసుకునేందుకు అడ్డంకిగా ఉండే ఈ సమస్య ఎప్పుడు తగ్గుతుందా అని ఎదురుచూడటం తప్ప మందులు కూడా అంతగా ఉపయోగం ఉండవు.   మంచిదేనట! మార్నింగ్‌ సిక్‌నెస్‌ వల్ల ఇబ్బందులు ఉన్నమాట నిజమే. మరి దీని వల్ల గర్భవతులకు ఏమన్నా మేలు జరుగుతోందా అని పరిశీలించే ప్రయత్నం చేశారు కొందరు పరిశోధకులు. ఇందుకోసం గర్భం దాల్చిన ఓ 797 మందిని ఎన్నుకొన్నారు. వారందరినీ కూడా రెండో నెల మొదలుకొని ఎనిమిదో నెల వరకూ ఒక డైరీని రాస్తూ ఉండమన్నారు. అందులో తమ ఆరోగ్యం సమస్యలను నమోదు చేయమని సూచించారు.   పరిశోధన కోసం ఎన్నుకొన్న 797 మంది అభ్యర్థులలో దాదాపు 60 శాతం మంది మార్నింగ్‌ సిక్‌నెస్‌కు సంబంధించిన ఇబ్బందులను ఎదుర్కొన్నారని తేలింది. ఆశ్చర్యకరంగా వీరిలో గర్భస్రావం మాత్రం చాలా తక్కువగా నమోదైంది. మార్నింగ్ సిక్‌నెస్‌ ఇబ్బంది పడని స్త్రీలతో పోల్చుకుంటే, ఆ సమస్యను ఎదుర్కొన్న గర్భవతులలో గర్భస్రావం అయ్యే ప్రమాదం దాదాపు 75 శాతం తక్కువ నమోదైంది.   ఇంతకీ మార్నింగ్‌ సిక్‌నెస్‌ రావడానికీ పిండం ఆరోగ్యంగా ఉండటానికీ కారణం ఏమిటి? అన్న ప్రశ్నకు స్పష్టమైన జవాబు ఉందంటున్నారు పరిశోధకులు. గర్భవతులు తినే ఆహారంతో పాటుగా రకరకాల సూక్ష్మక్రిములు కూడా శరీరంలోకి ప్రవేశించవచ్చు. ఇవి గర్భస్థ శిశువుకి హాని చేసే ప్రమాదం లేకపోలేదు. ఆ ప్రమాదాన్ని నివారించేందుకు మన శరీరం చేసే పోరాటంలో భాగంగా కలిగే ఇబ్బందే మార్నింగ్‌ సిక్‌నెస్‌. కాబట్టి ఇకమీదట మార్నింగ్‌ సిక్‌నెస్‌ వస్తే అదేదో వ్యాధి అనుకుని బెంబేలెత్తిపోవడం మానుకుని... కడుపులో శిశువు క్షేమంగా ఉండబోతోందని తృప్తి చెందాలన్న మాట!   - నిర్జర.

  వందేళ్లనాటి ఈ చిట్కాతో సంతానం ఖాయమట!     సంతానలేమి... ఇప్పుడు చాలామందిని వేధిస్తున్న సమస్య! ఈ సమస్యకు పరిష్కారం ఎక్కడ దొరుకుతుందా అని తిరగని చోటు ఉండదు. చికిత్స కోసం పెట్టే ఖర్చుకి లెక్క ఉండదు. కానీ నెదర్లాండ్స్, ఆస్ట్రేలియాకు చెందిన పరిశోధకులు దీనికో పరిష్కారాన్ని కనుగొన్నారు. వందేళ్లనాటి ఓ చిన్నపాటి చికిత్సతో సంతోనలేమికి చెక్ పెట్టవచ్చని నిరూపించారు. ఒకప్పుడు సంతానలేమి ఉన్న స్త్రీలలో, సంతానాన్ని ఉత్పత్తి చేసే భాగాలలో ఏదన్నా లోపం ఉందా అని తెలుసుకునేందుకు ఓ పరీక్ష చేసేవారట. దీన్ని hysterosalpingography (HSG) అంటారు. ఇందులో భాగంగా Fallopian tubes స్పష్టంగా కనిపించేందుకు అందులోకి ఏదన్నా ద్రవపదార్థాన్ని పంపేవారు. సాధారణంగా ఇందుకోసం గసగసాల నుంచి తీసిన నూనెని (iodised poppy seed oil) నింపేవారు. ఆశ్చర్యంగా ఇలా గసగసాల నూనెతో Fallopian tubesని శుభ్రం చేయగానే చాలామందిలో సంతానం కలుగుతుండేది. అంటే పరీక్ష కాస్తా చికిత్సగా మారిపోయిందన్నమాట! ఎప్పుడో 1914లో మొదలైన ఈ తరహా పరీక్ష క్రమేపీ మరుగునపడిపోయింది. ఇప్పుడు సంతానలేమికి కారణాలను పరీక్షించేందుకు, లోపాలను సవరించేందుకు ఆధునికమైన చికిత్సలు అందుబాటులోకి వచ్చేశాయి. కానీ ఆస్ట్రేలియాలోని అడిలైడ్ విశ్వవిద్యాలయం, నెదర్లాండ్స్లోని 27 వైద్య బృందాలతో కలిసి మళ్లీ ఆనాటి చికిత్సలోని ప్రామాణికతను గమనించే ప్రయత్నం చేశారు. ఇందుకోసం సంతానలేమితో బాధపడుతున్న 1119 మంది స్త్రీలను ఎంచుకున్నారు. ప్రయోగం కోసం ఎంచుకున్న స్త్రీలలో కొందరి Fallopian tubesని గసగసాల నూనెతో ఫ్లష్ చేశారు. మరికొందరికి కేవలం మామూలు నీటితో ఫ్లష్ చేశారు. ఆరునెలలు తిరిగేసరికి నూనెతో చికిత్స పొందినవారిలో 40 శాతం మంది సంతానాన్ని పొందారు. నీటితో ఈ చికిత్సని పొందినవారు 29 శాతం మంది మాత్రమే సంతానాన్ని పొందారు. ఈ చికిత్సలో ఎలాంటి సైడ్ ఎఫెక్ట్స్ నమోదు కాకపోవడం మరో విశేషం. ఇంతకీ ఈ చికిత్స ఇంతలా విజయవంతం కావడానికి స్పష్టమైన కారణం ఏమిటో మాత్రం పరిశోధకులు కనిపెట్టలేకపోయారు. బహుశా Fallopian tubesలో అడ్డుగా నిలిచే మలినాలను తొలగించడం వల్ల సంతానం సాధ్యపడుతూ ఉండవచ్చని మాత్రం భావిస్తున్నారు. గసగసాల నూనె వల్ల అందులో చేరిన ఇన్ఫెక్షన్లు కూడా తగ్గిపోయేందుకు ఆస్కారం లభిస్తూ ఉండవచ్చు. అదీ విషయం! ఇక మీదట సంతానం కోసం ఎవరన్నా తమ దగ్గరకు వచ్చినప్పుడు వైద్యులు ఒకేసారి IVFలాంటి ఖరీదైన చికిత్సల జోలికి పోకుండా... ముందుగా ఈ చిన్నపాటి చిట్కాను పాటించి చూడాలని పరిశోధకులు కోరుతున్నారు. సంతానం కోసం వైద్యులని సంప్రదించేవారు కూడా ఓమారు ఈ చికిత్స గురించి వైద్యుని సంప్రదించాలని సూచిస్తున్నారు. గసగసాల నుంచి తీసిన నూనె ఇప్పటికీ Lipiodol® Ultra-Fluid పేరుతో ఎలాగూ అందుబాటులోనే ఉంది. - నిర్జర.  

మనకీ కావాలి  " ఒక బడ్జెట్ "     ఈ రోజు అంతా అందరూ బడ్జెట్ కోసం మాట్లాడుతున్నారు ..ఏవి పెరిగాయి ? ఏవి తగ్గాయి అంటూ... నాకు ఎందుకో మా అమ్మ గుర్తుకు వచ్చింది ..తన నల్ల డైరీ..లో మా ఇంటి బడ్జెట్ ..వుండేది. ఆ లెక్కలు చూస్తే మాకు భయం వేసేది..నాన్న జీతం ..మా ఇంటి అవసరాలకి మద్య బోలెడంత దూరం వుండేది. అమ్మ ఆ నెల ఖర్చు ఏంటో ఓ లిస్టు రాసేది ముందు ..నాన్న జీతం వచ్చాకా ..దాని బట్టి ఏవి ముఖ్యమ్..ఏవి ఈ నెల వాయిదా వేయచ్చు అని నిర్ణయించేది. అమ్మ ఆ నిర్ణయం లో మా అవసరాలు వాయిదా పడకుండా ఉండాలి అని గట్టిగా కోరుకునే వాళ్ళం. అయితే ఒకో నెల ఒకొక్కరి కోరికలు తీరేవి. ఒకోక్కరివి వాయిదా పడేవి ..వున్నా ఆదాయం తో అందరిని సంతృప్తి పరచేందుకు అమ్మ పెద్ద కసరత్తే చేసేది ..   చిన్నప్పుడు ఆ ప్రహసనమంతా ..మాకు కొంచం చిరాకు ని , కోపాన్ని తెప్పించిన మాట మాత్రం వాస్తవం. అమ్మ మా కోరిక వాయిదా వేసినప్పుడు ..అమ్మ కి మా మీద ప్రేమ లేదని బాధపడి పోయేవాళ్ళం. మా కోరిక తీరిన రోజున అమ్మ దేవత అనుకునే వాళ్ళం. ఇప్పుడు ఆ కోపాలు, అలకలు , అన్ని తలుచు కుంటే నవ్వు వస్తుంది ..కాని చాలా విషయాలు ఆ బడ్జెట్ అలాట్మెంట్ ద్వారా అమ్మ మాకు నేర్పింది అన్న సత్యం ఇప్పుడు మాకు అర్ధం అవుతోంది. అందులో ముఖ్యమయినవి ..   సహనం ... అవును ..మనసులో ఒక కోరిక వచ్చిందే తడువుగా కొత్త మొబైల్ నుంచి ..కొత్త కార్ దాకా ఏవయినా అందుబాటులో ఉంచుతున్నారు ఇప్పటి తల్లి తండ్రులు . .దానితో తీరని కోరికలు ఏవి లేవు ఇప్పటి పిల్లలకి. కాని అమ్మా నాన్నా కాదుగా "జీవితం "...అన్ని అమర్చి పెట్టదు..కొన్నిటిని ఊరించి , ఊరించి అందిస్తుంది ..కాని అడగగానే అమ్మ అన్ని అందించటం అలవాటు పడిన పిల్లలకి ..ఈ సహనం పట్టటం ఎలా తెలుస్తుంది ? బాధ పడతారు ..అసంతృప్తి తో కుమిలి పోతారు. అదిగో అదే ఇప్పటి జనరేషన్ లో చాలా మంది ని  ఇబ్బంది పెట్టే విషయం ...ఈ రోజు కాకా పోయినా రేపు మనకి కావలసినది దొరుకుతుంది లే ..అనే ఆశ ని కలిగించింది చిన్నప్పటి అమ్మ బడ్జెట్ ..   ఎదురు చూపలలో ఆనందం: ఒక్కసారి ఆలోచించండి ..అనుకున్నదే తడువుగా, తలుచు కున్న క్షణం లో మీకు కావలసినది మీ చేతిలో ఉన్నప్పటి ఆనందాన్ని , ఎంతో ఎదురు చూసి దక్కించుకున్న వస్తువు ..చేతి లో పడిన క్షణాన్న కలిగిన ఆనందాన్ని పోల్చి చూడండి ..రెండో అనుభవం జీవితాంతం గుర్తు వుంటుంది ..అందుకే మన చిన్నప్పుడు పండగ రోజున వేసుకున్న బట్టలు ఇప్పటికి  మనకి తీపి జ్ఞాపకాలు ..ఇప్పుడో ..ఎన్ని కొనుక్కున్నా ..ఆ తృప్తి ..ఆ ఆనందం రుచి చూడలేక పోతున్నాం ..ఎదురు చూపులలో వుండే ఆ తీపిని మిస్ అయిపోతున్నాం . ఇప్పటి పిల్లలకి అయితే ఆ రుచే తెలియదని చెప్పచ్చు.    రూపాయి విలువ..  అవును..రూపాయి విలువ పడిపోయింది అన్న మాట నిజమే నేమో అనిపిస్తుంది, ఇప్పటి మన ఖర్చు లు చూస్తుంటే ..ఒకప్పుడు చేతిలో ఉంటేనే మన రూపాయి ..అప్పుడే ఖర్చు ...గురించి ఆలోచన. ఇప్పుడో  ? కార్డు లో మన రూపాయి లేక పోయినా కావలసినంత ఖర్చు పెట్టె వీలు ..దానితో ఖర్చు పెట్టేటప్పుడు ముందు , వెనకా చూడటం మర్చి పోయాం. ఆ తర్వాత తీరిగ్గా ..బాధ పడుతుంటాం . పిల్లలకి అయితే ఆ నొప్పి కూడా తెలియదు , కాబట్టి ..తీరని, తీర్చలేని కోరికలు అంటూ వారికి పెద్దగా ఏవి వుండటం లేదేమో కూడా .   ఇలా ఒకటా .రెండా  ? ఎన్నో ఎన్నెన్నో నేర్చుకున్నాం అమ్మ బడ్జెట్ ప్రణాళిక వల్ల మనమంతా. మరి అమ్మలుగా మన పిల్లలకి ఆ విలువలు నేర్పాలంటే మనం కూడా బడ్జెట్ వేయటం మొదలు పెట్టాలి కదా ! దేశ బడ్జెట్ ఎలా వుందో చూసేసాం..ఇక మన ఇంటి బడ్జెట్ వేసుకుందాం ..రాబడి బట్టి ఖర్చు ని నిర్ణయించుకుందాం ..కొన్నిటిని వాయిదా వేద్దాం ..కొన్నిటిని పూర్తిగా వద్దనుకుందాం . పిల్లలకి నో చెప్పటం నేర్చుకుందాం. వాళ్ళ కి ఓర్పుని, ఎదురుచూడటం లోని ఆనందాన్ని రుచి చూబిద్దాం..ఇవే  అతి విలువయిన జీవిత పాఠాలు..  

మీలో ప్రత్యేకత ఏంటో  మీరే గుర్తించండి   ఆడవాళ్ళలో ఉన్న ఒక పెద్ద ప్రాబ్లం ఏంటంటే, అందరిలో అన్నీ కళలని గుర్తిస్తారు, వారికి అన్నీ అమరుస్తూ పైకి వచ్చేలా చూస్తారు. కానీ తమ విషయం వచ్చేసరికి, తరువాత చూద్దాంలే అనుకుంటారు. ఒక సంగీతమో ,సాహిత్యమో, లేక ఇంకేదైనా ఒక ఇష్టమైన పనో ఉందనుకోండి దాన్ని నెరవేర్చడానికి టైమ్ కావాలి, కానీ అందరి బాగోగులు చూసేసరికి వారికి తమకంటూ సమయమే మిగలదు. ధాంతో ఆ ఆశ ఎక్కడో అడుగున పడిపోతుంది. మామూలుగా అయితే ఇది పెద్ద విషయం కాదనట్టు వదిలేస్తారు. కానీ ఇలా కొన్ని ఏళ్ళు గడిచాక ఎక్కడో ఎవరో తమకి నచ్చిన పని చేస్తూ. కనబడతారు, అంతే ఇంకమనసులో బాధ మొదలు. ఇంకా ప్రతి నిముషం ఆ విషయం మనసుని  తోలుస్తూనే ఉంటుంది. ఆ బాధలో ఇంట్లో పనులు భారంగాను కష్టపడి పోతున్నట్టు అనిపిస్తుంది వారికి. చిరాకు ఎక్కువై చిర్రుబుర్రు మంటుంటారు. ఇంట్లో వాళ్లకేమో విషయం అర్ధం కాక "మొన్నటిదాకా బానే ఉండేది ఈ మధ్య ఏమైందో ఎంటో", అనుకుని బాధపడుతుంటారు. పోనీ ఆడవారు చెప్పచ్చుగా అనుకోవచ్చు, నిజమే చెప్పచ్చు కానీ తనకంటూ ఒక ఇష్టం ఉందని చెప్పడం ఆడవారికి ఇంకా అలవాటు కావటం లేదు, నవ్వుతారేమో అన్న భయం కూడా తొడవుతుంది. దాంతో ఈ సమస్య పెద్దదై ఇంట్లో గొడవలు మొదలవుతాయి.. అందుకే ఆడవారు తమ ఇష్టాలు తమలో ఉన్న టాలెంట్ ని వారే గుర్తించి బయటపెట్టుకోవాలి, అందరికీ నిర్మొహమాటంగా చెప్పుకోవాలి. ఇంక ఈ విషయంలో  ఇంట్లో వారి బాధ్యత కూడా చాలా ఉంది. ఇంత లేట్ ఏజ్ లో ఇదెందుకు అని అనకుండా,వారిని ప్రోత్సహించాలి.   * ఎంతో లేట్ అయిందని అనుకునే కన్నా, ఇప్పటికైనా మొదలు పెట్టా కదా, అని మిమ్మల్ని మీరే శెభాష్ అనుకోండి.   * ఇంట్లో వారి పనులు అన్నీ మీరే చేసెయ్యాలనుకోకుండా పనిని అందరితో పంచుకోండి అప్పుడు మీకంటూ కాస్త సమయం దొరుకుతుంది.  * మీలానే ఆలోచించే ఇంకొకరినో లేదా ఒక గ్రూప్ నో కలుసుకోండి. అప్పుడు మీకు తోడు దొరకడమే కాదు ఆ పనిలో ఉత్సాహం కూడా కలుగుతుంది. * ఒకవేళ ఇంట్లో మిమ్మల్ని ప్రోత్సహించే వారు లేరనుకోండి, నిరాశపడకండి, ఈ మధ్య కాలంలో ఇంటర్నెట్ లో దొరకని వీడియో లేదు, మీ కావాల్సింది మీ ఫ్రీ టైమ్ లో మీ ఇంట్లోనే నేర్చుకోవచ్చు. చివరిగా ఒక మాట మీ బాద్యత మీ ఇంటి పట్ల ఉండాలనుకోవడంలో అస్సలు తప్పులేదు ,కానీ అదే బాధ్యత మీ పట్ల కూడా కాస్త చూపిస్తే, జీవితం సుఖమయంగా ఉంటుంది. మీరే కాదు మీ చుట్టుపక్కల వాళ్ళు కూడా ఆనందంగా ఉంటారు, ఆలోచించండి..... --Pushpa

  అక్కడ ఆడవారికి సమాన జీతం ఇవ్వాల్సిందే!     స్త్రీ ఆకాశంలో సగం అంటారు. కానీ నేల మీద మాత్రం తగిన ప్రాముఖ్యత ఇవ్వరు. అడ్డాకూలీల దగ్గర నుంచీ ఆఫీసర్ల వరకూ ఆడవారు చేసే పనికి చాలీచాలని వేతనమే లభిస్తుంది. ఈ విషయం మన కళ్ల ముందు కనిపించేదే! ఇది నిజమని రుజువుచేసేందుకు కావల్సినన్ని పరిశోధనలు కూడా జరిగాయి. నోరు తెరిచి అడిగినా కూడా ఆడవారికీ జీతాలు పెరగవనీ, సున్నితంగా ఉండే ఆడవారి జీతాలు అస్సలు మెరుగుపడవనీ గణాంకాలు రుజువుచేస్తున్నాయి. ఈ సోత్కర్షంతా ఎందుకంటే ఐస్లాండ్లో జరిగిన ఓ విప్లవం గురించి చెప్పుకోవడం కోసం!   మిగతా దేశాలతో పోలిస్తే ఐస్లాండ్లో జీవన పరిస్థితులు మెరుగ్గానే ఉంటాయి. అందుకే సంతోషకరమైన దేశాలలో ఐస్లాండ్ ఎప్పుడూ ముందే ఉంటుంది. అక్కడ స్త్రీపురుషుల మధ్య వివక్షా తక్కువగానే ఉంటుంది. మహిళా ఉద్యోగులు, పురుష ఉద్యోగుల జీతాల మధ్య 14 శాతం మాత్రమే వ్యత్యాసం కనిపిస్తుంది. కానీ అక్కడి ఆడవారు ‘తక్కువ వ్యత్యాసం’తో సరిపెట్టుకోలేదు. అసలు వివక్షే లేని సమాజం కావాలని ఉద్యమించారు.   గత అక్టోబరులో ఐస్లాండ్లోని మహిళా ఉద్యోగులు... తమకు సమానమైన జీతాలు కావాలని డిమాండ్ చేస్తూ విధులను బహిష్కరించారు. ఆ తరువాత విధులలో చేరినా... తక్కువ జీతాలను తీసుకునేందుకు నిరాకరించారు. వీరి ఆవేదనను ప్రభుత్వం కూడా అర్థం చేసుకుంది. ఇక మీదట స్త్రీపురుషు ఉద్యోగులందరికీ సమానంగా జీతాలు ఇవ్వాలంటూ చట్టాన్ని ప్రవేశపెట్టింది. ఇకపై అక్కడ 25మంది కంటే ఎక్కువమంది ఉద్యోగులు ఉన్న ప్రతి సంస్థా... తాము సమానమైన వేతనాలను చెల్లిస్తున్నామంటూ ఒక ధృవపత్రాన్ని సమర్పించాల్సి ఉంటుంది. దీంతో చట్టబద్ధంగా సమాన వేతనాలని అమలు చేస్తున్న తొలిదేశంగా ఐస్లాండ్ చరిత్ర సృష్టించింది.   ఉద్యోగరంగంలో స్త్రీలకు తగిన ప్రాధాన్యత ఇవ్వడం ఐస్లాండ్కి కొత్తేమీ కాదు. 50 మందికి మించి ఉద్యోగులు ఉన్న సంస్థల బోర్డులో కనీసం 40 శాతం మంది మహిళా సభ్యులుండాలని ఇప్పటికే ఓ నిబంధన ఉంది. ఇలాంటి నిబంధనల వల్లే world economic forum ఐస్లాండ్లో మహిళా సాధికారత అత్యుత్తమం అంటూ కితాబు ఇచ్చింది. ఇక మహిళలకు సమాన వేతనాలతో ఐస్లాండ్ మరే దేశానికీ అందనంత ఎత్తుకి చేరుకుంది.   ఐస్లాండ్ని చూసి మన దేశం ఎంతో నేర్చుకోవాల్సి ఉంది. ఒకపక్క భారతదేశంలో స్త్రీని దేవతగా పూజిస్తారని డప్పు కొడుతూనే వీలైనంతగా అణచివేతకి గురిచేయడం కనిపిస్తుంటుంది. పార్లమెంటులో మూడోవంతు రిజర్వేషన్ కోసం రూపొందిన బిల్లు దాదాపు 20 ఏళ్లుగా దుమ్ముకొట్టుకుని ఉంది. ఇక సమాన ఉద్యోగాలు, వేతనాలు గురించి ఏమని చెప్పుకోగలం. - నిర్జర.  

సాహసమే ఊపిరి... హర్షిణీ కన్హేకర్... హర్షిణి కన్హేకర్‌ ఈ పేరు చాలా తక్కువ మంది వినుండవచ్చు. మన దేశపు తొలి మహిళా ఫైర్‌ ఫైటర్‌. నలుగురు వెళ్లే మార్గం కాకుండా భిన్న మార్గాన్ని ఎంచుకుని తన సత్తాను చాటింది. చాలా కష్టమైన రంగాన్ని ఎన్నుకొని ఎంతోమంది స్త్రీలకు ఆదర్సంగా నిలిచారు. ఈరోజు మహిళా దినోత్సవం రోజున హర్షిణీ కన్హేకర్ గురించి ఈ వీడియో మీకోసం. చూసి స్ఫూర్తి పొందండి..   https://www.youtube.com/watch?v=UgK4JfiklEw

ఆడవాళ్లు ఏం చేసినా తప్పేనా!     స్త్రీ పట్ల సమాజం ధోరణ ఎప్పుడూ చిత్రంగానే ఉంటుంది. వారిని ఓ పక్క దేవతగా పొగుడుతూనే... ఆటవస్తువుగానే చూస్తుంటుంది. స్త్రీ స్వేచ్ఛ గురించి మాట్లాడుతూనే సంకెళ్లు వేస్తుంది. ఆడవారి పట్ల ఈ ద్వంద్వ వైఖరికి సాక్ష్యంగా ఇప్పుడు ఏకంగా ఓ పరిశోధనే వెలుగులోకి వచ్చింది. ఈ మధ్యకాలం అంతా మెటర్నటీ లీవ్ గురించే మాట్లాడుతున్నారు. ఆడవాళ్లు పిల్లల్ని కన్న తరువాత ఎంతకాలం మెటర్నిటీ లీవ్ ఉంటే మంచిది? దాని కోసం ప్రభుత్వాలు ఏం చేయాలి? అంటూ తెగ ఉపన్యాసాలు వినిపిస్తున్నాయి. కానీ మెటర్నటీ లీవ్ తీసుకునే ఆడవారి గురించి సమాజం ఏమనుకుంటుంది? అన్న ఆలోచన వచ్చింది ఇంగ్లండులోని కొందరు పరిశోధకులకి. ఆలోచన వచ్చిందే తడవుగా ఓ 137 ఆడవారినీ, 157 మగవారినీ తమ ప్రయోగం కోసం ఎన్నుకొన్నారు. ప్రయోగంలో భాగంగా అభ్యర్థులందరికీ ఈమధ్యనే బిడ్డను కన్న ఒక స్త్రీ గురించి చెప్పారు. కాకపోతే ఆమె తన పిల్లవాడిని చూసుకునేందుకు మెటర్నటీ లీవ్ తీసుకుందని కొందరితో చెబితే, మెటర్నటీ లీవ్ పూర్తిగా వాడుకోకుండా ఆఫీసుకి వెళ్తోందని మరికొందరితో చెప్పారు. ఆ తర్వాత ఆ మహిళ గురించి తమ అభిప్రాయం ఏమిటంటూ వారిని ప్రశ్నించారు. అనూహ్యంగా రెండు సందర్భాలలోనూ సదరు వ్యక్తి చేసిన పనిని అభ్యర్థులు తప్పుపట్టారు. మెటర్నటీ లీవ్ని ఉపయోగించుకున్న సందర్భంలోనేమో ఆ వ్యక్తికి ఉద్యోగం పట్ల అంతగా నిబద్ధత లేదన్న అభిప్రాయం వ్యక్తమైది. మెటర్నటీ లీవ్ను వద్దనుకుని ఉద్యోగంలో చేరిన సందర్భంలోనేమో... తల్లిగా తన బాధ్యతని సక్రమంగా నిర్వర్తించలేదన్న అభిప్రాయం వ్యక్తమైంది. ఏతావాతా రెండు సందర్భాలలోనూ స్త్రీ నింద పడాల్సి వచ్చింది! ఈ అభిప్రాయాలను వ్యక్తం చేసినవారంతా కూడా 33 ఏళ్ల సగటు వయసున్న యువతే కావడం గమనార్హం. వారిలో దాదాపు సగం మంది స్త్రీలు ఉండటం మరో వైపరీత్యం! పైగా వీరంతా అభివృద్ధి చెందాయని చెప్పే ఇంగ్లండ్, అమెరికా దేశవాసులు కావడం మరో విచిత్రం. మెటర్నటీ లీవ్ పట్ల సమాజపు ధోరణ తెలుసుకునేందుకు ఈ పరిశోధన జరిగి ఉండవచ్చు. కానీ బిడ్డను కనేందుకు, తన జీవితాన్ని పణంగా పెట్టే సందర్భంలోనే ఆడవారి పట్ల ఇలాంటి వివక్ష ఉంటే... ఇక రోజువారీ సందర్భాలలో వారి పట్ల సమాజ ధోరణి ఎలా ఉంటుందో ఇక చెప్పేదేముంది! - నిర్జర.    

జనం నోరు మూయించిన ‘నల్లపిల్ల’   ఇది నలుపు తెలుపుల ప్రపంచం. పైకి ఎన్ని కబుర్లు వినిపించినా తెల్లగా ఉండేవారి పట్లే మోజు ఎక్కువగా ఉంటుంది. నల్లగా ఉండేవారి పట్ల వివక్షా ఉంటుంది. ఆడవారి విషయంలో అయితే చెప్పనే అక్కర్లేదు. వాళ్లు తెల్లగా అయ్యే క్రీంని రాసుకుంటేనే విజయాలను సాధిస్తారంటూ బహిరంగంగానే ప్రకటనలు కనిపిస్తుంటాయి. అలాంటిది ఒక కారు నలుపు రంగులో ఉన్న అమ్మాయి ఏం చేయాలి. ‘నన్ను ఇలా ఎందుకు పుట్టించావురా భగవంతుడా!’ అంటూ జీవితాంతం కుమిలికుమిలి ఏడుస్తూ బతకాలా?’ ఈ ప్రశ్నకు సమాధానం ఖౌదియా (Khoudia) దగ్గర ఉంది...     ఖౌదియా ఆఫ్రికా ఖండంలోని సెనగల్‌ దేశంలో పుట్టింది. ఆమెకు 15 ఏళ్లు వచ్చేసరికి కుటుంబం, ఫ్యాషన్‌ ప్రపంచం అయిన ఫ్రాన్స్‌లో స్థిరపడింది. ఖౌదియా బాగా నల్లగా ఉండేది. దాంతో సహజంగానే ఆమె తీవ్రమైన వివక్షకు గురయ్యేది. చిన్నప్పటి నుంచీ ఆమెను తోటి పిల్లలు వెంటాడి వెంటాడి ఏడిపించేవారు. ఇక ఫ్రాన్స్‌లోకి అడుగుపెట్టిన తరువాత కూడా ఇదే పరిస్థితి కొనసాగింది. నలుగురిలోనూ భిన్నంగా కనిపించే ఆమె ఒంటి రంగుని చూడగానే ఆకతాయిల మాటలకు హద్దులుండేవి కావు.     ‘నన్ను ఏడిపించేవారిని చూసీచూసీ... నన్ను నేనే ప్రేమించుకోవాలని నిశ్చయించుకున్నాను. విమర్శించేవారిని నిదానంగా పట్టించుకోవడం మానేశాను. ఆ దృక్పథం నాకు ఎంతగానో ఉపయోగపడింది,’ అంటుంది ఖౌదియా. అలా ఎదిగిన విశ్వాసంతో ఖౌదియా రెండేళ్ల క్రితం మోడల్‌గా జీవితాన్ని ప్రారంభించింది. తెలుపు రంగుకి మాత్రమే ప్రాధాన్యత ఉన్న రంగంలోనే తనేమిటో నిరూపించుకోవాలనుకుంది. అలా తొలిసారి నల్లజాతీయులకు సంబంధించిన ఒక ఫొటోషూట్‌లో స్థానాన్ని సంపాదించింది.     తొలి ఫొటోషూట్‌ తరువాత ఖౌదియాకు నిదానంగా అవకాశాలు రావడం మొదలుపెట్టాయి. కానీ అదే స్థాయిలో విమర్శలూ వినిపించసాగాయి. ‘నల్ల పిల్ల’, ‘చీకటి పిల్ల’ లాంటి మారుపేర్లతో ఆమెను పిలవడం మొదలుపెట్టారు. కానీ ఖౌదియా అవేవీ పట్టించుకోలేదు సరికదా... ఇంకా దూకుడుగా అవకాశాల కోసం ప్రయత్నించసాగింది. ‘నన్ను వాళ్లు నానారకాల పేర్లతోనూ ఏడిపించేందుకు ప్రయత్నించేవారు. నా రంగుని చూసి నేను బాధపడాలని వాళ్లు కోరుకునేవారు. కానీ నన్ను నా రంగుతో పిలిచిని ప్రతి పిలుపునీ నేను ప్రేమించాను. వాళ్లకి నేనేమిటో నిరూపించాలని అనుకున్నాను,’ అంటుంది ఖౌదియా. ఖౌదియాకు ఇప్పుడు 19 ఏళ్లు. ఆమె ఆత్మవిశ్వాసాన్నీ, పట్టుదలనీ చూసిన The Colored Girl Inc అనే సంస్థ ఆమె మోడలింగ్‌ బాధ్యతలు చూసుకునేందుకు ముందుకువచ్చింది. ఖౌదియా ఇప్పుడో సెలబ్రెటీ! ప్యారిస్‌, న్యూయార్క్‌ ఫ్యాషన్‌ ప్రపంచంలో ఆమె పేరు విననివారు ఉండరు. ఖౌదియా ఇన్‌స్టాగ్రాం అకౌంటుని తెరవగానే దాదాపు మూడులక్షల మంది ఆమెను అనుసరించడం మొదలుపెట్టారంటేనే అర్థం చేసుకోవచ్చు... ఆమె విజయం ఏ స్థాయికి చేరుకుందో!       ఖౌదియా ఏదో అనుకోకుండా ఫ్యాషన్‌ ప్రపంచంలోకి అడుగుపెట్టలేదు- ‘ఆడవాళ్లు నలుపు రంగులో ఉన్నప్పటికీ, వాళ్ల కలలన్నింటినీ నిజం చేసుకోవచ్చు అని నిరూపించేందుకే ఈ రంగంలోకి అడుగుపెట్టానని’ అంటోంది. అంతేకాదు! ‘అందానికి నిర్వచనం ఇదీ అనీ... నువ్వు ఇలాగే కనిపించాలనీ చెప్పే అధికారం ఎవ్వరికీ లేద’ని ఖచ్చితంగా చెప్పేస్తోంది. మన అందం పట్ల విశ్వాసం ఉన్నంతవరకూ, బయటకి ఎలా కనిపించామన్నది ఎమాత్రం ముఖ్యం కాదన్నది ఖౌదియా వాదన. ఖౌదియా విజయం వేలాదిమంది నల్లజాతీయులకు ఓ ప్రేరణగా నిలుస్తోంది. కొందరైతే ఏకంగా ఆమెను అనుసరిస్తూ ఫ్యాషన్‌ ప్రపంచంలో అడుగులు వేసేందుకు సిద్ధంగా ఉన్నారు- ‘ఈ ఫ్యాషన్‌ సామ్రాజ్యంలో చాలామంది నల్లజాతీయులకు చోటు ఉంది,’ అంటూ వారందరినీ సాదరంగా ఆహ్వానిస్తోంది ఖౌదియా. -నిర్జర.  

మనకో ..".డే " అవసరమా   అసలు ఆడవాళ్ళకి సంవత్సరం లో తమని తాము గురిక్తించుకోవడానికి ఒక" డే "అవసరమా అని ఆలోచించా? అవసరమే అని తేలింధి..ఎంధుకంటారా ? మహిళల్లో ఉన్న (పెద్ద బలహీనతో బలమో తెలీధు కానీ ) ఒక ఆలోచనా విధానం ధీనికి కారణం. పిల్లలు ,భర్త...వీరే ప్రపంచం గా బ్రతికేస్తుంటారు  చాలా మంధి ఆడవాళ్ళు.(అత్తమామల గురించి మీరు అడక్కండి నేను చెప్పను) ఈ హడావిడిలో  తమని తాము తరచి చూసుకోవడం చాలా అరుదుగా చేస్తుంటారు. అంధుకే ఆడవాళ్ళు తమని తాము ప్రతి లిస్ట్ లో చివర పెట్టుకుంటూ వుంటారు.. "త్యాగమూర్తివమ్మా మహిళా..." అని పొగిడించుకోవడానికి కాకపోయినా అదో తృప్తి వారికి. అయితే ఇలా కొన్ని రోజులు పరవాలేధు ,జీవితమంతా ఉంటేనే ఇబ్బంధి  .. ఆలా ఉండిపోవడం వల్ల వారి ఆలోచన లో స్తబ్దత ,,ఆచరణలో నిర్లిప్తత , చోటుచేసుకుంటాయి. చివరికి అదే విసుగు, చిరాకు గా మారి బయటపడతాయి. అప్పటిదాక చేసింధి గుర్తించకపోయినా  ఈ విసుగుని చిరాకుని మాత్రం తెగ పట్టేస్తారు  బంధుజనమ్ . "ఏవిటి ఎప్పుడూ   నీకంత కోపం ?" అనేవారే కానీ "ఎంధుకు అంత కోపం వస్తోంధా? అని ఆరాతీసే నాధుడే ఉండడు..మీ బాధకి మిమ్మల్ని వదిలేస్తారు తప్ప ,బాధ అడిగి తెలుసుకునే ప్రయత్నం చెయ్యరు. ఇందులో  వారి తప్పు లేధు . వారు మిమ్మల్ని అడిగి చేయించుకోలేధు ,మీరే ప్రేమ ఎక్కువై  చేశారు . ఈ విసుగుని కోపాన్ని ఇలానే వదిలేస్తే చిలికి, చిలికి గాలి వానవుతుంది.మరి ఈ సమస్యనుంచి బయటపడటం ఎలా .? ధీనికో మార్గం ఉంధి... * ముంధు అందరి తో పాటు మీ ఉనికిని ఇష్టాన్ని కూడా గుర్తు పెట్టుకోండి * అందరి పనులు అడిగి మరి చేయండి,కానీ  వద్దంటే వదిలేయ్యడం  కూడా నేర్చుకోండి   * మీకంటూ ఒక జీవిత ధ్యేయం పెట్టుకోండి,ధాన్ని చేరుకోవడానికి దారులు మీరే వెతుక్కోండి. * రోజులో మీకంటూ కాస్త సమయాన్ని కేటాయించండి తప్పేం లేధు స్వార్ధం అంతకన్నా కాధు * మీ ఆరోగ్యాన్ని మీరే పట్టించుకోండి మీరు ఆరోగ్యం గా ఉంటేనే మీ ఇంట్లో అందరూ సంతోషం గా ఉంటారు అని గుర్తు పెట్టుకోండి * ఏదన్నా సాధించాం అనిపించగానే అందరూ సెహబాష్ అనాలని  కోరుకోకండి మెల్లిగా వారే నేర్చుకుంటారు * జీవితం మీధి ధాని పగ్గాలు మీ చేతిలోనే ఉండనివ్వండి . ఇంతే .. ఈ కాస్త గుర్తు పెట్టుకుంటే....చాలు ...ఉమెన్స్ డే కి మీరు ఎలాంటి నిర్ణయాలు తీసుకున్నా , అవన్నీ పాటించి తీరుతారు .