"ఇష్టంలేదా"

 

    కాంక్షతో కదిలిపోతూందామె.

 

    మరో అడుగు వెనక్కి వేసాడు.

 

    "డోంట్యూ వాంట్ మి."

 

    శ్రీహర్ష ఫాలభాగంపై స్వేదం పేరుకుంటూంది.

 

    "ప్లీజ్ కమాన్... ..."

 

    "రేష్మీ..." బడలికగా పలికింది శ్రీహర్ష కంఠం.

 

    "కాదనలేను. నువ్వు అసాధారణమయిన అందగత్తెవి. అందానికి నువ్వు అసలయిన నిర్వచనానివి. అదీ కాదనలేను. కాని నిన్నుమాత్రం అవుననలేక పోతున్నాను."

 

    "ఎందుకు" అడిగింది ఓటమిని భరించలేని తమకంతో.

 

    "నువ్వు కోరడం నిజంకాని నీలో కోరిక నిజంకాదు."

 

    అర్థంకానట్టు చూసింది.

 

    "స్వప్నానికీ వాస్తవానికీ మధ్య సన్నని రేఖలా నిలబడి ఆలోచనల హేంగోవర్ తో ఓ అభినందనలా నాకు దగ్గర కావాలనుకుంటున్న మిస్ రేష్మి! నువ్విప్పుడు యిష్టపడుతున్నది నన్ను కాదు నాలో నువ్వు గమనించిన సాహసాన్ని"

 

    "కాదనను"

 

    "అంటే నన్ను అంగీకరించింది ఆయుధంగానేగా"

 

    "అవును."

 

    "ఆయుధాన్ని ప్రయోగించాల్సింది ప్రత్యర్థులతో జరిగే యుద్ధంలో"

 

    "మొదలయిందిగా"

 

    "అలాంటప్పుడు అదే ఆయుధాలతో నిన్ను నువ్వు గాయపరుచుకోవడం."

 

    "ఇది గాయపరుచుకోవడం కాదు శ్రీహర్షా" రేష్మి కళ్ళనుంచి ఉక్రోషంగా నీళ్ళు రాలుతున్నాయి "గుండెల గాయాన్ని చల్లార్చుకోవాలనే తపన."

 

    "అందుకు మత్తుని ఆశ్రయించావుగా."

 

    "కాని అది చాలటంలేదు."

 

    "నేను కావాలి."

 

    "యా..."

 

    "శారీరకంగానా మానసికంగానా"

 

    "మనిషి నావాడయితే మనసుని సొంతం చేసుకుంటాను."

 

    "కాని నేనెలా నీ మనిషిని కాగలను"

 

    "ఏం... నాలో అలాంటి అర్హత లేదా"

 

    "అర్హత వుండబట్టే నువ్వు ప్రత్యర్థుల్నీ సృష్టించుకున్నావ్"

 

    "నేను సృష్టించుకోలేదు శ్రీహర్షా... నా అందమే."

 

    "అంటే. అది చాలా విలువయింది కదూ."

 

    "యా..." కసిగా అంది.

 

    "అలాంటి అందాన్ని, వేల లక్షలమందిని పిచ్చివాళ్ళని చేయగల నీ అసాధారణమైన సౌందర్యాన్ని, ఒక బలమయిన వ్యవస్థకు చాలా అవసరంగా మారిన నీ అపదృసమయిన రూపాన్ని" క్షణం ఆగి అన్నాడు. "ఇంత సులభంగా నాకెందుకు అర్పించాలనుకుంటున్నావ్ రేష్మీ."

 

    క్షణంపాటు ఆమె అవాక్కయ్యింది.

 

    "జవాబు చెప్పు రేష్మీ. నువ్వు కసితో నాకు దగ్గరవ్వాలనుకున్నావు తప్ప కోరికతో కాదుగా..."

 

    జవాబు తోచడంలేదు.

 

    నిజం అదికాదూ అని చెప్పాలని వుంది.

 

    పరిచయం స్వల్పమైనాకానీ అతన్ని కోరుకుంటున్నానని స్పష్టంగా తెలియజేయాలనుంది.

 

    "రేష్మీ" నిర్లిప్తంగా అన్నాడు "ఈ క్షణం నేను కోరుకుంటున్నది ఇలాంటి అవకాశాలు కాదు. నా అవసరం తీరడం"

 

    అర్థం కానట్టుగా చూసింది.

 

    జూలీకోసమే నా ఆరాటమంతా అని చెప్పాలనిపించి నిగ్రహించుకున్నాడు "చెప్పు. జూలీ నాకు... సారీ... నీకు దక్కాలీ అంటే ఎవరిద్వారా అది సాధ్యం? అసలు ప్రారంభం ఎక్కడ జరగాలి."

 

    తండ్రి శమంత్ కోసం ఆరాటపడుతున్న లల్లూలా ఇప్పుడు కూతురు జూలీకోసం శ్రీహర్ష మనసు మండిపోతూంది.

 

    రేష్మి జాప్యం చేయలేదు.

 

    సమీపంలోవున్న ఓ న్యూస్ పేపరు అందించింది.

 

    "చిత్రలేఖనం నా ప్రాణం. ప్రముఖ పారిశ్రామికవేత్త రాజీవ్ ఉవాచ"

 

    "ఎవరీ రాజీవ్"

 

    "నా ముఖ్య ప్రత్యర్థి" కసిగా అందామె.

 

    శ్రీహర్ష భృకుటి ముడిపడింది.

 

    "ఈ దేశంలో పెద్ద వీడియో వ్యాపారిగా చలామణీ అవుతూ అన్ని భాషల చిత్రాల్ని వీడియో ఫిల్ములుగా విడుదలచేసే రాజీవ్ కి వున్న మరో అంతర్జాతీయ వ్యాపారం ఈ ఆర్ట్ ఎగ్జిబిషన్స్ నిర్వహించడంకూడా" వివరంగా చెప్పింది రేష్మి.

 

    "సంఘంలో పెద్దమనిషిగా చలామణీ అవుతున్న ఈ వ్యక్తి ఎంత నికృష్టుడో కేవలం నాలాంటివాళ్ళకే తెలుసు శ్రీహర్షా. రాజీవ్ కున్న మరో అలవాటు రహస్యంగా బ్లూ ఫిలింస్ తీసి విదేశాలకి ఎగుమతి చేయటం కూడా. నన్ను బలవంతంగా రొంపిలోకి లాగాలని జూలీని అదృశ్యం చేసిందీ వీడే."

 

    పత్రికలోని రాజీవ్ ఫోటో కేసి ఏకాగ్రతగా చూసాడు అతను

 

    పాతికేళ్ళలోపు వయసు... సూట్ లో అందంగా కనిపిస్తున్నాడు.

 

    అయిదు నిమిషాలలో ఇంటర్వ్యూ మొత్తం చదివిన శ్రీహర్షకి అర్థమైంది ఒక్కటే.

 

    మరుసటిరోజే నగరంలో ఓ అంతర్జాతీయస్థాయి ఆర్టు ఎగ్జిబిషన్ ప్రారంభం కాబోతూంది రాజీవ్ ఆధ్వర్యంలో.

 

    అందులో విదేశాలకిచెందిన ప్రముఖ చిత్రకారుల పెయింటింగ్స్ తోబాటు ఇండియాకి చెందిన ఎమ్.ఎఫ్.హుస్సేన్ వీ ఉంటాయి.

 

    కానీ అన్నిటికన్నా అతి ఖరీదయినది జర్మనీకి చెందిన వేన్ రిజన్ 'ది ఫ్లయిట్ యింటూ ఈజిఫ్ట్' పెయింటింగ్.

 

    ఇంటర్నేషనల్ గా ఆ కళాఖండానికి చాలా విలువవుంది. కాబట్టి ఇతర దేశాలకి చెందిన ఆర్ట్ లవర్స్ కనీసం ఏభైలక్షల ఖరీదుకయినా కాని తీసుకెళతారని అతడి బలమైన నమ్మకం.