బెల్లంకొండ గణేష్ ని హీరోగా పరిచయం చేస్తూ సితార ఎంటర్ టైన్మెంట్స్ బ్యానర్ పై సూర్య దేవర నాగవంశీ నిర్మిస్తున్న చిత్రం 'స్వాతిముత్యం'. వర్ష బొల్లమ్మ హీరోయిన్ గా నటిస్తున్న ఈ సినిమాతో లక్ష్మణ్.కె.కృష్ణ దర్శకుడిగా పరిచయమవుతున్నాడు. ఆగస్టు 13న విడుదల కావాల్సిన ఈ మూవీ వాయిదా పడిన సంగతి తెలిసిందే. తాజాగా ఈ మూవీ కొత్త రిలీజ్ డేట్ ని ప్రకటించారు మేకర్స్ .

 

'స్వాతిముత్యం' సినిమాని దసరా కానుకగా అక్టోబర్ 5న విడుదల చేస్తున్నట్లు తాజాగా చిత్ర నిర్మాత సూర్యదేవర నాగవంశీ అధికారికంగా ప్రకటించారు. 'స్వాతిముత్యం' లాంటి ఓ యువకుడు కథే ఈ చిత్రం. ప్రేమతో కూడిన వినోద భరిత కుటుంబ కథా చిత్రంగా తెరకెక్కిన 'స్వాతిముత్యం' ప్రేక్షకులను ఏ స్థాయిలో మెప్పిస్తుందో చూడాలి. ఇదిలా ఉంటే ఈ దసరాకు చిరంజీవి 'గాడ్ ఫాదర్', నాగార్జున 'ది ఘోస్ట్' చిత్రాలు విడుదల కానున్నాయి. దసరా బరిలో భారీ చిత్రాలు దిగుతున్నప్పటికీ.. కంటెంట్ మీదున్న నమ్మకంతోనే 'స్వాతిముత్యం'ను విడుదల చేయడానికి మేకర్స్ రెడీ అయ్యారని తెలుస్తోంది.

మహతి స్వర సాగర్ సంగీతం అందిస్తున్న ఈ చిత్రంలో సీనియర్ నటుడు నరేష్, రావు రమేష్, సుబ్బరాజు, వెన్నెల కిషోర్, సప్తగిరి, ప్రగతి, సురేఖావాణి, సునయన, దివ్య శ్రీపాద తదితరులు నటిస్తున్నారు. ఈ సినిమాకి సినిమాటోగ్రాఫర్ గా సూర్య, ఎడిటర్ గా నవీన్ నూలి వ్యవహరిస్తున్నారు.