తెలుగు సినిమాల రిలీజ్‌కి సంబంధించి సంక్రాంతి, సమ్మర్‌, దసరా, దీపావళి ఈ నాలుగు సీజన్లు చాలా ముఖ్యం. స్టార్‌ హీరోలు తమ సినిమాలను ఈ సీజన్స్‌లో రిలీజ్‌ చేసేందుకు ఇష్టపడతారు. ఎందుకంటే పండగ మూడ్‌ కావచ్చు, హాలీడేస్‌ అనే హ్యాపీనెస్‌ కావచ్చు.. ప్రేక్షకులు.. ముఖ్యంగా ఫ్యామిలీ ఆడియన్స్‌ ఈ సీజన్స్‌లో థియేటర్లకు తరలి వస్తారు. దాన్ని దృష్టిలో ఉంచుకొని రాబోయే దసరాకి ఇద్దరు టాప్‌ హీరోల సినిమాలను రిలీజ్‌ చేసేందుకు నిర్మాతలు సన్నాహాలు చేస్తున్నారు. నందమూరి బాలకృష్ణ హీరోగా బోయపాటి శ్రీను దర్శకత్వంలో రూపొందుతున్న ‘అఖండ2’, పవన్‌కళ్యాణ్‌ హీరోగా సుజిత్‌ దర్శకత్వంలో తయారవుతున్న ‘ఓజి’ చిత్రాలు సెప్టెంబర్‌ 25న దసరా కానుకగా రిలీజ్‌ కాబోతున్నాయి. ఇప్పటికే ఈ సినిమాల రిలీజ్‌కి సంబంధించిన అప్‌డేట్స్‌ వచ్చేశాయి.

పండగ సీజన్లలో ఒకేరోజు ఎక్కువ సినిమాలు రిలీజ్‌ చేయడం వల్ల థియేటర్ల సమస్య వచ్చే అవకాశం ఉందని నిర్మాతలు ఎప్పుడూ భయపడుతుంటారు. అందుకే ఒక్కోసారి రిలీజ్‌ డేట్స్‌ను ఎడ్జస్ట్‌ చేస్తుంటారు. కానీ, అఖండ2, ఓజి చిత్రాలకు ఆ అవకాశం లేనట్టుగా కనిపిస్తోంది. ఇద్దరు హీరోలూ అదే డేట్‌కి థియేటర్లకు రావాలనుకుంటున్నారు. దీని వల్ల రెండు సినిమాలూ ఇబ్బంది పడే అవకాశం ఉందనే ప్రచారం జరుగుతోంది. అయితే ఒకేరోజు రెండు సినిమాలు రిలీజ్‌ అయినంత మాత్రాన థియేటర్ల కొరత ఎందుకంటే సంక్రాంతి సీజన్‌లో స్టార్‌ హీరోలు నటించిన మూడు, నాలుగు సినిమాలు రిలీజ్‌ అయి ఘన విజయం సాధించిన సందర్భాలు కూడా ఉన్నాయి. ఆ లెక్కన ఈ రెండు సినిమాలకు థియేటర్ల సమస్య ఉండకపోవచ్చు.

ఇదిలా ఉంటే.. అఖండ2, ఓజి సినిమాలకు మరో సినిమా వల్ల ప్రమాదం ఉందనేది కొత్తగా వినిపిస్తున్న మాట. కన్నడ చిత్రం కాంతార చాప్టర్‌ 1 వల్ల బాలకృష్ణ, పవన్‌కళ్యాణ్‌ సినిమాలకు నష్టం జరిగే అవకాశం ఉందని ట్రేడ్‌ వర్గాలు అంచనా వేస్తున్నాయి. ఈ సినిమాను అక్టోబర్‌ 2న విడుదల చేసేందుకు సన్నాహాలు చేస్తున్నారు. అంటే అఖండ2, ఓజి రిలీజ్‌ అయిన వారం రోజులకు కాంతార చాప్టర్‌1 రిలీజ్‌ కాబోతోంది. 2022లో వచ్చిన కాంతార ఎంతటి సంచలనం సృష్టించిందో అందరికీ తెలిసిందే. 15 కోట్ల బడ్జెట్‌తో నిర్మించిన ఈ సినిమా 400 కోట్లకు పైగా వసూళ్లు సాధించి రికార్డు క్రియేట్‌ చేసింది. అలాంటి సినిమాకి ప్రీక్వెల్‌గా కాంతార చాప్టర్‌ 1 వస్తోందంటే ప్రేక్షకుల్లో కూడా ఆ సినిమాపై ఎంతో ఆసక్తి ఉంటుంది. అందులోనూ పండగ సీజన్‌ కావడంతో ఈ సినిమా కలెక్షన్లు అఖండ2, ఓజీ కలెక్షన్లను ప్రభావితం చేసే అవకాశం ఉంది.

నందమూరి బాలకృష్ణ, పవన్‌కళ్యాణ్‌.. ఇద్దరి మధ్య మంచి అనుబంధం ఉంది. పైగా ఇద్దరూ కూటమికి చెందినవారు. కాబట్టి రెండు సినిమాలు ఒకేరోజు రిలీజ్‌ అయినా ఇద్దరి అభిమానులు రెండు సినిమాలనూ చూస్తారు. ఆ విషయంలో ఎలాంటి సందేహం లేదు. అయితే వారం గ్యాప్‌లో రిలీజ్‌ అవుతున్న కాంతార చాప్టర్‌1 గురించే అందరూ ఆలోచిస్తున్నారు. అఖండ2, ఓజీ చిత్రాలకు భారీ ఓపెనింగ్స్‌ ఎలాగూ ఉంటాయి. దాన్ని సస్టెయిన్‌ చేస్తూ సినిమా కలెక్షన్లు మరింత పుంజుకోవాలంటే ఈ సినిమాలు థియేటర్లలో ఉండడం తప్పనిసరి. కానీ, కాంతార సినిమా రిలీజ్‌ టైమ్‌కి ఈ రెండు సినిమాల తాలూకు థియేటర్లలో కొన్నింటిని దానికి కేటాయించక తప్పదు. దీనివల్ల బాలకృష్ణ, పవన్‌కళ్యాణ్‌ సినిమాల కలెక్షన్స్‌పై ప్రభావం పడే అవకాశం ఉంది. మరి ఈ విషయంలో ఈ ఇద్దరు స్టార్‌ హీరోలు ఎలాంటి నిర్ణయం తీసుకుంటారు, ఈ సమస్య నుంచి ఎలా బయట పడతారు అనేది చూడాలి.