గ్లోబల్ స్టాక్ మార్కెట్ చరిత్రలోనే అత్యంత ప్రతిష్టాత్మకమైన, భారీ ఐపీఓకు తెరలేచింది. టెక్ దిగ్గజం, బిలియనీర్ ఎలోన్ మస్క్‌కు చెందిన ప్రసిద్ధ అంతరిక్ష పరిశోధనా సంస్థ స్పేస్‌ఎక్స్  (SpaceX) స్టాక్ మార్కెట్లలోకి అడుగుపెట్టడానికి సర్వం సిద్ధం చేసుకుంది. ప్రపంచవ్యాప్తంగా ఉన్న ఇన్వెస్టర్లు ఎప్పుడెప్పుడా అని ఎదురుచూస్తున్న ఆ క్షణం రానే వచ్చింది. ఈ బిగ్గెస్ట్ ఐపీఓకు అంతర్జాతీయ మార్కెట్లో ఊహించని రేంజ్‌లో డిమాండ్ వ్యక్తమవుతోంది. బ్లూమ్‌బెర్గ్ నివేదికల ప్రకారం, ఇప్పటికే పలు పెద్ద పెద్ద సంస్థాగత ఇన్వెస్టర్లు ఏకంగా 10 బిలియన్ డాలర్లు లేదా అంతకంటే ఎక్కువ మొత్తంలో షేర్లను కొనుగోలు చేయడానికి ఆర్డర్లు పెట్టేయడం గమనార్హం.

గతంలో అంటే 2019వ సంవత్సరంలో సౌదీ అరామ్‌కో సంస్థ ఏకంగా 29.4 బిలియన్ డాలర్ల నిధుల సేకరణతో సృష్టించిన బిగ్గెస్ట్ ఐపీఓ రికార్డును స్పేస్‌ఎక్స్ ఇప్పుడు బద్దలు కొట్టబోతోంది. చరిత్రలోనే అత్యంత భారీ ఓపెనింగ్‌తో స్టాక్ మార్కెట్లలో సరికొత్త చరిత్రను లిఖించడానికి ఈ అంతరిక్ష సంస్థ దూసుకుపోతోంది. ఈ మెగా ఐపీఓకు సంబంధించిన షేర్ల ధరల ఖరారు ప్రక్రియ జూన్ 11న జరగనుంది. ఆ మరుసటి రోజే, అంటే శుక్రవారం, జూన్ 12, 2026 నుండి స్టాక్ ఎక్స్ఛేంజ్‌లలో స్పేస్‌ఎక్స్ షేర్ల ట్రేడింగ్ అధికారికంగా ప్రారంభం కానుంది.

ఈ భారీ పబ్లిక్ ఆఫరింగ్ ద్వారా కంపెనీ మొత్తం 555.6 మిలియన్ షేర్లను విక్రయానికి ఉంచింది. ప్రతి ఒక్క షేరు ధరను 135 డాలర్ల ఫిక్స్‌డ్ ప్రైస్‌గా నిర్ణయించడం విశేషం. ఈ మెగా ఐపీఓ ద్వారా కంపెనీ ఏకంగా 75 బిలియన్ డాలర్ల భారీ నిధులను సేకరించాలని లక్ష్యంగా పెట్టుకుంది. ఈ నిధుల సేకరణ విజయవంతంగా పూర్తయితే స్పేస్‌ఎక్స్ కంపెనీ మొత్తం మార్కెట్ వాల్యుయేషన్ ఏకంగా 1.8 ట్రిలియన్ డాలర్లకు చేరుకుంటుంది. మనలాంటి సాధారణ రీటైల్ ఇన్వెస్టర్లకు కూడా కంపెనీ బంపర్ ఆఫర్ ప్రకటించింది. ఈ మెగా ఐపీఓలో సాధారణ రీటైల్ ఇన్వెస్టర్ల కోసం కంపెనీ ఏకంగా 30 శాతం షేర్లను కేటాయించింది. కొన్ని ప్లాట్‌ఫారమ్‌లలో రీటైల్ ఇన్వెస్టర్లు బుధవారం లోపే తమ ఆర్డర్లను సబ్మిట్ చేయాల్సి ఉంటుంది. మరోపక్క, ఇన్‌స్టిట్యూషనల్ ఇన్వెస్టర్లకు కూడా బుధవారం సాయంత్రంతోనే గడువు ముగియనుంది.

ఈ మెగా ఐపీఓను విజయవంతం చేసేందుకు ప్రముఖ మోర్గాన్ స్టాన్లీ బ్యాంక్ తన న్యూయార్క్ హెడ్‌క్వార్టర్స్‌లో దాదాపు 300 మంది బిగ్ ఇన్వెస్టర్లతో కీలకమైన సమావేశాన్ని ఏర్పాటు చేసింది. ఈ మీటింగ్‌లో స్పేస్‌ఎక్స్ ప్రెసిడెంట్ గ్విన్ షాట్‌వెల్, సీఎఫ్ఓ బ్రెట్ జాన్సన్ పాల్గొని ఇన్వెస్టర్ల సందేహాలను నివృత్తి చేశారు. కేవలం రాకెట్ లాంచ్‌లు మాత్రమే కాకుండా, స్టార్‌లింక్ శాటిలైట్ సేవలు, స్పేస్ రీసెర్చ్, ఆర్టిఫిషియల్ ఇంటెలిజెన్స్ (AI), సోషల్ మీడియా ప్లాట్‌ఫారమ్ X నిర్వహణ వంటి పలు రంగాలలో స్పేస్‌ఎక్స్ దూసుకుపోతోంది. తాజాగా ఈ కంపెనీ గూగుల్ మాతృసంస్థ Alphabet తో ఒక భారీ క్లౌడ్ సర్వీసెస్ డీల్ కుదుర్చుకుంది. దీని ప్రకారం 2029 వరకు ఆల్ఫాబెట్ సంస్థ స్పేస్‌ఎక్స్‌కు నెలకు 920 మిలియన్ డాలర్లు చెల్లించనుంది. అలాగే ప్రముఖ ఏఐ కంపెనీ  Anthropic  తో కూడా స్పేస్‌ఎక్స్ ఒప్పందం చేసుకుంది. మార్కెట్లో దీనికి ఆంత్రోపిక్‌తో పాటు 850 బిలియన్ డాలర్ల వాల్యుయేషన్ ఉన్న ఓపెన్ ఏఐ (OpenAI) నుండి గట్టి పోటీ ఎదురవుతోంది.