భారతీయుల ద్వంద్వ వైఖరిపై ప్రత్యేక విశ్లేషణ

ప్రస్తుత ఆధునిక సమాజంలో అంతర్జాతీయ మార్కెట్‌లో డాలర్‌తో పోలిస్తే రూపాయి విలువ పడిపోవడంపై సర్వత్రా ఆందోళన వ్యక్తమవుతోంది. ముఖ్యంగా సామాజిక మాధ్యమాల్లో చురుగ్గా ఉండే మధ్యతరగతి విద్యావంతులు దేశ ఆర్థిక పరిస్థితిపై తీవ్రమైన చర్చలు జరుపుతుంటారు. అయితే..  ఈ ఆందోళనల వెనుక ఉన్న అసలు వాస్తవాలను సగటు భారతీయుడి దైనందిన జీవితంలో దాగి ఉన్న ద్వంద్వ ప్రమాణాలను గమనిస్తే ఒక విచిత్రమైన పరిస్థితి కనిపిస్తుంది. దేశభక్తి గురించి సుదీర్ఘ ఉపన్యాసాలు ఇచ్చే చాలామంది, తమ నిత్య జీవితంలో మాత్రం ఉదయం లేచింది మొదలు రాత్రి పడుకునే వరకు పూర్తిగా అంతర్జాతీయ బ్రాండ్లపైనే ఆధారపడుతున్నారు.  మాటల్లో స్వదేశీ మంత్రం పఠిస్తూ..  చేతల్లో మాత్రం గ్లోబల్ ఉత్పత్తులకు జై కొట్టే సగటు  మేధావి  జీవన విధానంపై సమాజంలో ఇప్పుడు సరికొత్త చర్చ నడుస్తోంది.  

సగటు పౌరుడి రోజువారీ దినచర్యను నిశితంగా పరిశీలిస్తే.. . ఉదయాన్నే నిద్రలేవగానే పళ్లు తోముకునే టూత్‌పేస్ట్ దగ్గర నుంచి ఈ విదేశీ బ్రాండ్ల ప్రభావం మొదలవుతుంది. స్వదేశీ ప్రత్యామ్నాయాల గురించి కనీసం ఆలోచించకుండానే, అంతర్జాతీయ సంస్థల ఉత్పత్తులతో రోజును ప్రారంభిస్తారు. ఆపై గడ్డం గీసుకోవడానికి ఉపయోగించే రేజర్లు, స్నానానికి వాడే సబ్బులు, సువాసనలు వెదజల్లే కాస్మొటిక్స్ అన్నీ పాశ్చాత్య దేశాలవే అయి ఉంటాయి. విశేషమేమిటంటే, ఈ వస్తువులను వినియోగిస్తూనే.. అంతర్జాతీయ ఆర్థిక సంస్థలు లేదా ఇతర అగ్రదేశాలు కలిసి మన దేశ కరెన్సీని ఎలా దెబ్బతీస్తున్నాయనే విషయాలపై సోషల్ మీడియా వేదికల నుంచి సేకరించిన అరకొర సమాచారంతో పెద్ద ఎత్తున విశ్లేషణలు చేస్తుంటారు. మన దేశంలో నాణ్యమైన వస్తువులు తయారు కావడం లేదని ఈసడించుకుంటూనే..  దేశాభివృద్ధి కుంటుపడుతోందని బాధపడటం ఇక్కడి విచిత్ర పరిస్థితి.  

ఈ ధోరణి కేవలం బాత్రూమ్‌కే పరిమితం కాకుండా అల్మారాలు, వంటగదుల వరకూ విస్తరించింది. ధరించే లోదుస్తుల నుంచి ఆఫీసు వేళల్లో వేసుకునే బ్రాండెడ్ షర్టులు, జీన్స్ ప్యాంట్ల వరకు అన్నీ విదేశీ కార్పొరేట్ సంస్థలవే అయి ఉంటాయి. ఇటువంటి దుస్తులు ధరించి ఆధునిక రూపం వచ్చిందని మురిసిపోతూనే.. మరోవైపు రూపాయి విలువ రోజురోజుకూ పతనమవడానికి పాలకుల విధానాలే కారణమంటూ నిందలు వేస్తుంటారు. ఉదయం బ్రేక్‌ఫాస్ట్ విషయానికి వస్తే, త్వరితగతిన తయారయ్యే విదేశీ నూడుల్స్ ఆరగిస్తూ..  అంతర్జాతీయ బ్రాండ్‌కు చెందిన కాఫీలను సేవిస్తూ..  టెలివిజన్లలో వచ్చే బిజినెస్ వార్తలను చూసి ఆర్థిక నిపుణుల తరహాలో లెక్చర్లు దంచడం రివాజుగా మారిపోయింది.  

ఇక కార్యాలయాలకు వెళ్లే మార్గంలోనూ ఇదే ధోరణి కనిపిస్తుంది. విదేశీ సాంకేతికతతో తయారైన ద్విచక్ర వాహనాలపై ప్రయాణిస్తూ..  అంతర్జాతీయ కంపెనీల స్మార్ట్‌ఫోన్లు, నెట్‌వర్క్‌లను వాడుతూ దేశ ఆర్థిక ప్రగతిపై ఆందోళన చెందుతుంటారు. ట్రాఫిక్ సిగ్నల్స్ వద్ద ఆగినప్పుడు కూడా ఫోన్లలో వచ్చే  సందేశాలను చదవడం, వాటిని ఇతరులకు షేర్ చేయడం చేస్తుంటారు. కళ్లకు పెట్టుకునే సన్‌గ్లాసెస్ నుంచి చేతికి పెట్టుకునే వాచీల వరకు అన్నీ లక్షల రూపాయల విలువైన విదేశీ బ్రాండ్లే. మార్కెట్ ప్రారంభం కాగానే రూపాయి విలువ ఎంత పడిపోయిందో లెక్కలు కట్టే ఈ మేధావులు, తాము వాడే ప్రతి వస్తువు వల్ల దేశీయ కరెన్సీపై ఎంత భారం పడుతుందో మాత్రం గమనించరు.  

ఆఫీసు లంచ్ బ్రేక్‌లోనూ ఇదే గ్లోబల్ మెనూ కొనసాగుతుంది. విదేశీ ఫాస్ట్ ఫుడ్ కేంద్రాల నుంచి తెప్పించుకున్న బర్గర్లు, కార్బోనేటెడ్ కూల్‌డ్రింక్స్‌ను ఆస్వాదిస్తూ, మరోవైపు ల్యాప్‌టాప్‌లలో రూపాయి పతనానికి గల కారణాలపై వచ్చే విశ్లేషణాత్మక వీడియోలను వీక్షిస్తారు.  (గ్లోబలైజేషన్ వల్లే దేశీయ మార్కెట్ దెబ్బతింటోందని తలలు ఊపుతారే తప్ప..  తమ ప్లేట్‌లో ఉన్న ఆహారం, చేతిలో ఉన్న గ్యాడ్జెట్లు అన్నీ ఆ గ్లోబలైజేషన్ ఉత్పత్తులేనని గ్రహించలేరు. ఈ రకమైన అవగాహన లోపం నేటి తరం విద్యావంతులలో స్పష్టంగా కనిపిస్తోంది.  సాయంత్రం ఇంటికి వచ్చేటప్పుడు కూడా విదేశీ బ్రాండ్ల పిజ్జాలను ప్యాక్ చేయించుకుని రావడం, వంట చేసుకునే శ్రమ తప్పిందని మురిసిపోవడం నేటి ఆధునిక జీవనశైలిగా మారింది. 

డైనింగ్ టేబుల్ వద్ద కూర్చుని ఆ పిజ్జాలు  తింటూ..  టీవీ ఛానళ్లలో వచ్చే ఆర్థిక వార్తలను చూసి,  మనమంతా స్వదేశీ వస్తువులనే వాడాలి, విదేశీ కంపెనీల వల్లే మన సంపద తరలిపోతోంది  అని సుద్దులు చెబుతుంటారు. అలా చెబుతూనే పక్కనే ఉన్న విదేశీ కూల్‌డ్రింక్‌ను గుటకలేయడం వీరి ద్వంద్వ నీతికి నిదర్శనం. రాత్రి పడుకునే ముందు కూడా అదే స్మార్ట్‌ఫోన్లలో సామాజిక మాధ్యమాలు ఓపెన్ చేసి, దేశభక్తిని ప్రబోధించే సందేశాలను పదుల సంఖ్యలో ఉన్న గ్రూపులకు ఫార్వార్డ్ చేసి, తమ బాధ్యత తీరిపోయిందని భావిస్తుంటారు.  ఈ మొత్తం వ్యవహారంలో అసలైన లోపం ఎక్కడుందనేది విశ్లేషిస్తే..  అది కేవలం రూపాయి విలువ పడిపోవడంలో మాత్రమే లేదు. ప్రజల వినియోగ అలవాట్లలో, బ్రాండ్ల పట్ల ఉన్న వ్యామోహంలో ఉంది. నిత్యం వాడే బ్రష్ నుంచి బైక్ వరకు, వేసుకునే షర్ట్ నుంచి తాగే సాఫ్ట్ డ్రింక్ వరకు అన్నీ అంతర్జాతీయ సంస్థలవే కావాలనుకుంటూ..  దేశ ఆర్థిక వ్యవస్థ మాత్రం బలోపేతం కావాలని కోరుకోవడం ఒక పెద్ద తమాషా. ఖర్చు పెట్టే అలవాట్లేమో అంతర్జాతీయ స్థాయిలో ఉంచుకుని.. ఆర్థిక విషయాలపై అవగాహనను మాత్రం సోషల్ మీడియా ఫార్వార్డ్ మెసేజ్‌ల స్థాయికి పరిమితం చేసి, అభిప్రాయాలు మాత్రం ఉన్నత స్థాయి ఆర్థికవేత్తల తరహాలో వ్యక్తపరచడం నేటి మేధావుల లక్షణంగా మారింది.  

అంతిమంగా, దేశ ఆర్థిక పరిస్థితి పట్ల ఆందోళన చెందడం, కరెన్సీ విలువలపై చర్చించడం ఖచ్చితంగా ఆహ్వానించదగ్గ పరిణామమే. అయితే ఆ ఆలోచనలు, చర్చలు కేవలం మాటలకే పరిమితం కాకూడదు. నిత్య జీవితంలో మనం తీసుకునే చిన్న చిన్న నిర్ణయాలు, మన బ్రాండ్ ఎంపికలు దేశ ఆర్థిక వ్యవస్థను ఎలా ప్రభావితం చేస్తాయనే కనీస అవగాహన ప్రతి ఒక్కరిలోనూ కలగాలి. కేవలం ఇంటర్నెట్‌లో వచ్చే సందేశాలను ఇతరులకు పంపడం ద్వారానే దేశభక్తి చాటుకున్నామని అనుకోకుండా, క్షేత్రస్థాయిలో స్వదేశీ ఉత్పత్తులకు ప్రాధాన్యతనిచ్చినప్పుడే రూపాయి బలపడటానికి, దేశం ఆర్థికంగా పురోగమించడానికి నిజమైన మార్గం సుగమమవుతుందని నిపుణులు అభిప్రాయపడుతున్నారు. 

-సీతారాం కంఠంనేని

ఈ విశ్లేషణ మీకు నచ్చినట్లయితే, దయచేసి https://www.teluguone.com పోర్టల్ ను  ఫాలో అవ్వండి. లైక్ చేయండి. షేర్ చేయండి. మీ విలువైన అభిప్రయాలను తెలియజేయండి.