ఆర్టిఫిషియల్ ఇంటెలిజెన్స్ (AI) ప్రపంచంలో ఒకప్పుడు సంచలనం సృష్టించిన చాట్‌బాట్ సాంకేతికత ఇప్పుడు పూర్తిగా రూపాంతరం చెందబోతోంది. చాట్ ఈజ్ డెడ్ (చాటింగ్ చాప్టర్ ముగిసింది) అంటూ ఓపెన్ఏఐ సంస్థకు చెందిన ఒక సీనియర్ ఉద్యోగి చేసిన వ్యాఖ్యలు ఇప్పుడు టెక్ ప్రపంచాన్ని షాక్‌కు గురిచేస్తున్నాయి. కేవలం మనం అడిగే ప్రశ్నలకు సమాధానాలు ఇచ్చే రోజులకు కాలం చెల్లిందని, వినియోగదారుల పనులను స్వయంగా పూర్తి చేసే సరికొత్త ఏజెంట్ల కాలం మొదలైందని ఓపెన్ఏఐ గట్టిగా నమ్ముతోంది. అందుకే 2022లో విడుదలై ప్రపంచవ్యాప్తంగా దాదాపు 100 కోట్ల (1 Billion) మంది వినియోగదారులను ఆకర్షించిన చాట్‌జీపీటీ (ChatGPT) లో ఇప్పటివరకు ఎన్నడూ చూడని అతిపెద్ద మార్పులను తీసుకురావడానికి కంపెనీ సిద్ధమైంది. ఈ ఏడాది చివర్లో రాబోయే భారీ ఐపీఓ (IPO) కంటే ముందే ఈ భారీ వ్యూహాత్మక మార్పును పూర్తి చేయాలని శామ్ ఆల్ట్‌మన్ నేతృత్వంలోని ఓపెన్ఏఐ ప్రణాళికలు రచిస్తోంది.

ఈ సరికొత్త ప్రణాళికలో భాగంగా చాట్‌జీపీటీని కేవలం ఒక చాట్‌బాట్‌లా కాకుండా, అన్ని రకాల సేవలను ఒకే చోట అందించే ఒక పవర్‌ఫుల్ సూపర్ యాప్ (Superapp) గా మార్చబోతున్నారు. ఇందులో భాగంగా ఓపెన్ఏఐకి చెందిన కోడింగ్ సాఫ్ట్‌వేర్  కోడెక్స్ (Codex) ను చాట్‌జీపీటీతో పూర్తిగా అనుసంధానం చేయనున్నారు. ప్రస్తుతం కోడెక్స్ సిస్టమ్‌కు వారానికి 50 లక్షల (5 Million) కంటే ఎక్కువ మంది యాక్టివ్ యూజర్లు ఉన్నారు. ఈ కోడెక్స్ డెవలప్‌మెంట్ టీమ్‌తో పాటు చాట్‌జీపీటీ విభాగాన్ని ఇప్పుడు ఒకే లీడర్‌షిప్ కిందకు తీసుకువచ్చారు. ఇకపై యూజర్లు కేవలం టెక్స్ట్ టైప్ చేయడం మాత్రమే కాకుండా.. కోడింగ్ చేయడం, ఇమేజ్ జనరేషన్, ఇంకా కాన్వా (Canva), బుకింగ్ డాట్ కామ్ (Booking.com) వంటి ప్రముఖ భాగస్వామ్య యాప్‌లను నేరుగా చాట్‌జీపీటీ ఇంటర్‌ఫేస్ నుంచే ఉపయోగించుకోవచ్చు.

ఓపెన్ఏఐ ప్రస్తుతం తన ప్రధాన ప్రత్యర్థి అయిన యాంత్రోపిక్ (Anthropic) సంస్థతో తీవ్రమైన పోటీని ఎదుర్కొంటోంది. యాంత్రోపిక్ తెచ్చిన  క్లాడ్ కోడ్  వ్యాపార రంగంలో భారీగా దూసుకుపోతోంది. దీనికి గట్టి పోటీ ఇవ్వడానికి ఓపెన్ఏఐ తన ప్రాధాన్యతలను మార్చుకుంది. కేవలం ఉచితంగా చాట్ చేసే సాధారణ వినియోగదారుల కంటే, ఎక్కువ ఆదాయాన్ని అందించే బిజినెస్ కస్టమర్లపై కంపెనీ దృష్టి పెట్టింది. ప్రస్తుతం ఓపెన్ఏఐకి ఉన్న 20 లక్షల (2 Million) కార్పొరేట్ క్లయింట్లు కంపెనీ మొత్తం ఆదాయంలో దాదాపు 40 శాతం వాటాను అందిస్తున్నారు. ఈ ఏడాది ముగిసే సమయానికి ఈ వ్యాపార ఆదాయాన్ని 50 శాతానికి పెంచాలనేది ఓపెన్ఏఐ టార్గెట్. ఇందుకోసం గతంలో యూజర్లు బాగా ఇష్టపడిన సోరా (Sora) వీడియో జనరేషన్ ప్రాజెక్ట్‌ను సైతం తాత్కాలికంగా పక్కన పెట్టేసి, తమ పూర్తి శ్రమను మరియు కంప్యూటింగ్ పవర్‌ను ఈ సూపర్ యాప్ రీడిజైన్ కోసమే కేటాయిస్తున్నారు.