ఎయిరిండియా.. టాటా యాజమాన్యం చేతుల్లోకి వెళ్లిన తరువాత ప్రయాణీకులకు సేవల విషయంలో గణనీయమైన పురోగతి సాధించింది. అలాగే ఆదాయ మార్గాలను పెంచుకుంటూ.. నష్టాల భర్తీలో శరవేగంగా ముందుకు సాగుతోంది. ఇందుకోసం  టాటాయాజమాన్యం వినూత్న పద్ధతులను అవలంబిస్తోంది. అలాగే ప్రయాణీకులను గౌరవించే విషయంలోనూ, వారికి మర్యాదల విషయంలోనూ కూడ అందరి ప్రశంసలూ పొందుతూ ముందుకు సాగుతోంది. కొత్త యాజమాన్యం వచ్చిన తరువాత సేవలలో నాణ్యత భేష్ అన్న ప్రశంసలూ అందుకుంటోంది. అయితే ఈ క్రమంలో సిబ్బంది ఆహార్యం విషయంలో సంస్థ యాజమాన్యం పెడుతున్న కండీషన్స్ ఒకింత కఠినంగా ఉంటున్నాయని చెప్పక తప్పదు. సంస్థలో పని చేసే వారంతా శుభ్రతకు పెద్ద పీట వేయాలని చెబుతూ కొత్త నిబంధనలను విధించింది. ముఖ్యంగా ఎయిర్ హోస్టింగ్ విషయంలో మగవారి జట్టు విషయంలో అత్యంత కఠినమైన నిబంధనలను అమలు చేస్తున్నది. పురుషులలో హెయిర్ ఫాల్ ఉంటే మాత్రం గుండు చేయించుకు తీరాల్సిందే అంటోంది. అంతే కాదు మగవారు జుట్టు పొడుగ్గా పెంచుకునే స్టైలిష్ విధానాలకు తిలోదకాలివ్వాల్సిందేనని స్పష్టం చేసింద. ఇక సిబ్బందిలోని ఆడవారి విషయంలోనూ కొత్త విధానాలకు శ్రీకారం చుట్టింది. మహిళా సిబ్బంది ముత్యాల చెవి రింగులు ధరించడానికి వీల్లేదని నిబంధన విధించింది. వేళాడే చెవికమ్మలపై నిషేధం విధించింది. అలాగే ఉంగరాలు కూడా చిన్నచిన్నవి అయితే మాత్రమే అనుమతిస్తామని చెప్పింది. అంతే కాదు ఒక చేతికి ఒక ఉంగరం మాత్రమే ఉండాలి.  అలాగే చీర లేదా ఇండో-వెస్ట్రన్ డ్రెస్‌ ఏదైనా సరే చెప్పులు ధరించడం తప్పనిసరి. అలాగే ముఖాన బొట్టు తప్పని సరి చేసింది.