తనేమైపోతుంది, తన బతుకేమైపోతుంది?

    ఆ చీకటిరాత్రి నిస్సహాయతవల్ల పొంగుకొచ్చిన దుఃఖంతో ఆమె మూగగా అయిపోయింది- ఆ రాత్రి అలాగే మధుకర్ ని భరించింది.

    అద్దాల మేడలా కాపాడుకుంటున్న వ్యక్తిత్వం, చప్పున కూలిపోతున్నట్లుగా భావించింది.

    కాని ఉదయానికి తేరుకుంది. ఆ రాత్రి కావాలనే సుధారాణిని అక్కడే, ఆ గదిలోనే వుండేలా చూసింది. మత్తు దిగిన మరుక్షణం ఆమెని చూసి తాను చేసిన తప్పు తెలుసుకోవాలనే అలా చేసింది.

    "ఓ.కే. మధు! ఎందుకు, ఏమిటి, ఎలా జరిగింది అన్న ప్రశ్నలు ఇప్పుడనవసరం. ఏ ఆశయసాధనకయినా, బేసిక్ గా కావలసింది డిసిప్లిన్.

    మనం సాధించాల్సిన లక్ష్యానికి గడువు ఇంకా మూడునేలలే వుంది.

    నీ ఇష్టం...

    నువ్వు మళ్ళీ నీ పాత వ్యామోహాలే కావాలనుకుంటే, నేను నీకేం అడ్డుగా నిలవను. గో ఇన్ యువర్ ఓన్ వే..."

    ఆ మాటలనేసి ఫోన్ ని డిస్కనెక్ట్ చేసింది.

                                       *    *    *    *    *

    రూమ్ కొచ్చి మొహం కడుక్కుని, గది మధ్యలో కూర్చున్నాడు.

    అప్పుడు సమయం రెండు గంటలయింది.

    జన్నీ ఫాబ్రిక్స్ యాడ్ మెటీరియల్ అందుకున్నాడు. రకరకాల ఫోజుల్లో వున్న నాగార్జున ఫోటోల్ని చూశాడు.

    పేపర్స్, పెన్ను తీసుకున్నాడు.

    రఫ్ డిజైన్ తయారుచెయ్యడం ప్రారంభించాడు. కేప్షన్స్, బాడీ మేటర్ తయారుచేస్తూనే వున్నాడు.

    రాత్రంతా మరో ధ్యాస లేదు.

    పాతిక రకాల స్కెచ్ లు, కేప్షన్స్ తయారయ్యాయి. అందులో తనకునచ్చిన కొన్నిటిని మరికొన్ని మార్పులు చేశాడు.

                          *    *    *    *    *

    * You too can have jenny like mine.

    * A 'jenny' is forever.

    * I'am only here for only 'jenny'

    * నాకు ఇష్టమైనవి రెండే రెండు.

    * ఒకటి అన్నపూర్ణా స్టూడియోస్. రెండు జెన్నీ ఫాబ్రిక్స్....

    * నాగార్జునని నాగార్జునలా చూపెట్టేది 'జెన్నీ'.

    * నాగార్జున ది ఓన్లీ హీరో... 'జెన్నీ' ది ఓన్లీ డ్రెస్...  

    రఫ్ స్కెచ్, కాప్షన్ తో మధుకర్ అందిస్తున్న ఒక్కొక్క కాపీని చూస్తున్నాడు సుమదేవ్.

    "నైస్, వెరీగుడ్! సాధ్యమైనంతవరకూ బాడీమేటర్ ను తగ్గించు. బాడీమేటర్ తో యాడ్స్ ఇవ్వడం ఓల్డు. ఒకే ఒక కాప్షన్ తో, లేదా కేప్షన్ లెస్ యాడ్స్" చెప్పాడు.

    మధుకర్ తయారుచేసిన వాటిలో, కొన్నింటిని ప్రత్యేకంగా సెలక్ట్ చేశాడు.

    "వండ్రఫుల్! అన్నీ బాగున్నాయి. కానీ నువ్వే బాగాలేవు. నీ కళ్ళెందుకు ఎర్రగా వున్నాయి? రాత్రంతా నిద్రలేదు కదూ?"

    అవునన్నట్టుగా తలూపాడతను.

    "వెళ్ళి రెస్టు తీసుకో! జెన్నీ ఫాబ్రిక్స్ వాళ్ళతో నేను మాట్లాడి మిగతా డిటైల్స్ వర్కవుట్ చేస్తా!"

    ఫిజికల్ గానే కాదు, రాత్రి ఇన్సిడెంట్ వల్ల మెంటల్ గా కూడా బాగా లేడు మధుకర్.

    ఓ పదినిమిషాలు ఆఫీసులో గడిపి, రూమ్ కొచ్చేసాడు. అదే సమయంలో యాడ్స్ ఇండియా ఆఫీసులో మహతి, జెన్నీ ఫాబ్రిక్స్ యాడ్ కాంపైన్ విషయమై సుమదేవ్ తో డిస్కస్ చేస్తోంది.

                           *    *    *    *    *

    సరిగ్గా పదిహేను రోజుల తర్వాత-

    దేశంలో అన్ని ప్రముఖ సినిమా పత్రికలు, డైలీ న్యూస్ పేపర్స్ లో ఎక్కడ చూసినా-

    జెన్నీ... జెన్నీ... జెన్నీ ఫాబ్రిక్స్ ఎడ్వర్టయిజ్ మెంట్స్-

    ఎక్కడ చూసినా సంచలనం.

    టెక్స్ టైల్ ఇండస్ట్రీ ఆ యాడ్ కాంపైన్ కి ఆశ్చర్యపోతోంది.

    ఫేమస్ మిల్స్ ఓనర్లు జెన్నీ డ్రెస్ మెటీరియల్ కోసం ఎంక్వయిరీలు మొదలుపెట్టారు.

    ఆ ఫాబ్రిక్స్ కంపెనీ మొదట నాగార్జునది అనుకొన్నారు కొందరు.

     ఆ జెన్నీ ఫాబ్రిక్స్ వివరాల కోసం అన్నపూర్ణా స్టూడియోకి వచ్చే ఫోన్ కాల్స్ రోజురోజుకీ పెరుగుతున్నాయి.

    అలాగే-

    జెన్నీ ఫాబ్రిక్స్ హైదరాబాద్ కొచ్చే ఫోన్లు... అన్నీ తనే స్వయంగా రిసీవ్ చేసుకుంటోంది మహతి.

    మద్రాస్, బోంబే, కలకత్తా, అహ్మదాబాద్, న్యూఢిల్లీ నుంచి తమకు డీలర్ షిప్ కావాలని ఫోన్లు. వాళ్ళలో పాతికమందిని మాత్రమే సెలక్టు చేసింది మహతి.

    ఫోన్ ద్వారా ఎపాయింట్ మెంట్ ఫిక్స్ చేసింది.

    భువనగిరి నుంచి వచ్చిన రఘురామశెట్టికి ఈ తతంగం అంతా అనూహ్యంగా వుంది. అద్భుతంగా అనిపించింది.

    మహతి ఒక మనిషిలా కనబడలేదాయనకు.

    కంప్యూటర్ లా వుంది.

    పేపర్ యాడ్స్ చూసి స్టేట్ లోని వివిధ సెంటర్స్ నుంచి వచ్చిన బిజినెస్ మెన్స్ తో మీటింగ్ పూర్తయ్యేసరికి ఆరోజు రాత్రి పదకొండు గంటలయింది.

    తనకేమీ పనిలేక రఘురామశెట్టి తన ఛాంబర్ లో కూర్చున్నంతసేపు ఓపిగ్గా కూర్చుని, ఆ తర్వాత నిద్రపోతున్నాడు.

    విజిటర్స్ వెళ్ళిపోయాక టేబిల్ మీదున్న ఫ్లాస్కులోంచి రెండు కప్పుల్లో టీ పోసుకుని రఘురామశెట్టి ఛాంబర్లో కెళ్ళింది మహతి.

    డోర్ చప్పుడికి ఉలిక్కిపడి లేచాడాయన.

    "సారీ అమ్మా!"

    "ఫర్వాలేదు తీసుకోండి" ఆయనకో కప్పిచ్చి, ఎదురుగా కూర్చుని టీ తాగుతూ-

    "భువనగిరి గోడౌన్స్ లోని మన మెటీరియల్ మొత్తం వారంలోగా మూవ్ అయిపోవాలి. మనం ఎపాయింట్ చేసుకున్న టైలర్స్ కి అది అందాలి. ఇకపై కాలం కంటే వేగంగా మనం వర్క్ చేస్తేనే మన ప్రొడక్టుకున్న డిమాండ్ ని మీట్ కాగలం.

    చాలా సాదాగా, ఏమాత్రం ఉద్రేకం ప్రదర్శించకుండా అంది మహతి.

    టీ తాగుతున్న శెట్టిగారు కళ్ళప్పగించి చూస్తూ వుండిపోయాడు.

    "రెండ్రోజుల్లో మెటీరియల్ లోడింగ్ కార్యక్రమం మొదలెట్టాలి. రేపుదయాన్నే మీరు భువనగిరి వెళ్ళిపోండి. ఆ తర్వాత నేనొస్తాను.

    "అలాగేనమ్మా!" నెమ్మదిగా అన్నాడాయన.   

                           *    *    *    *    *

    "నీకోసమే వెయిట్ చేస్తున్ననోయ్!" డోర్ తీసికొని, లోనికొస్తున్న మధుకర్ వేపు హేపీగా చూస్తూ అన్నాడు సుమదేవ్.

    "ఏమిటి సార్ విశేషం? కొత్త కాంట్రాక్టు ఏమైనా వచ్చిందా?"

    "ఏమైనా వచ్చిందా అని నెమ్మదిగా అంటావేవిటోయ్! ట్వంటీఫస్ట్ సెంచరీ ప్రొడక్ట్స్ యాడ్ కాంపైన్ అంతా మనకే వచ్చింది. ఆ క్రెడిట్ అంతా నీకేనోయ్! పేపర్ ఎడ్వర్టయిజ్ మెంట్ చూసి నువ్వే వాళ్ళతో డీల్ చేశావుగా... ఏమాత్రం ఇన్ ఫ్లుయన్స్ వుపయోగించకుండానే మనకా కాంట్రాక్టు వొచ్చింది. ఆ ప్రొడక్ట్సు పేపర్, టీ.వీ, హోర్డింగ్ టోటల్ మనం కోడ్ చేసిన బడ్జెట్ కు వాళ్ళు గ్రీన్ సిగ్నల్ ఇచ్చారు. ఇంత తక్కువ టైమ్ లో అంత ప్రోగ్రెస్ సాధిస్తామని అనుకోలేదోయ్.ఇవాళ నాకంటే ప్రపంచంలో మరెవ్వరూ ఇంత ఆనందంగా వుండరు."