వెల్ కమ్ పామ్ పామ్!

వెల్ కమ్ పామ్ పామ్!

 

 

పామ్ పామ్ గురించి మీకు తెలుసా? తెలియదు అని మాత్రం అనకండి. ఎందుకంటే... దాని పేరు పామ్ పామ్ అని తెలియదేమో కానీ అది మీకు బాగా పరిచయమున్నదే. ఈ ఫొటోలు చూడండి. దారాల కుచ్చులాంటిదొకటి కనిపించడంలా? దాని పేరే పామ్ పామ్.

ఒకప్పుడు వీటిని బ్యాగులకు వేళ్లాడదీసేవారు. దాంతో బ్యాగ్ చాలా కలర్ ఫుల్ గా అందంగా కనిపించేది. ఆ తర్వాత చున్నీల చివర్లు కట్టేవారు. ఆ రకంగా పామ్ పామ్ మనకు బాగా పరిచయం. కాకపోతే ఇప్పుడు దీని లెవెల్ బాగా పెరిగిపోయింది. ఫ్యాషన్ ఇండస్ట్రీలో పాదం మోపింది. ఓ ట్రెండ్ నే సృష్టించింది.

 

 

డ్రెస్ మీద రెండు పామ్ పామ్ లు కుట్టండి... ఆ డ్రెస్ వాల్యూ ఎంత పెరిగిపోతుందో మీరు ఊహించలేరు. చెప్పులకి, హ్యాండ్ బ్యాగులకి, హెయిర్ బ్యాండ్ లకి, టోపీలకి... వేటి మీదికి పామ్ పామ్ చేరినా దాని అందం రెట్టింపవ్వాల్సిందే. ఇక పామ్ పామ్ లతో చేసిన చెవి, కంఠాభరణాలకైతే మామూలు డిమాండ్ లేదు.

ఇందులో ఏముంది... దారాల కుచ్చే కదా అనుకోకండి. విదేశీ మార్కెట్లో పామ్ పామ్ దుమ్ము రేపుతోంది. హాలీవుడ్ తారలు సైతం పామ్ పామ్ ఫ్యాషన్ కి హారతి పడుతున్నారు. ఇండియన్ మార్కెట్లో కూడా పామ్ పామ్ ఉన్నా... దీని వాల్యూ మనవాళ్లకి ఇంకా పూర్తిగా తెలియలేదు. అందుకే కాస్త తక్కువ కనిపిస్తోంది. కానీ త్వరలోనే ఇది మన దేశంలో కూడా తన ముద్ర వేసి తీరుతుందని ఫ్యాషన్ నిపుణులు జోస్యం చెప్తున్నారు.

 

 

ఎప్పుడో అది ముద్ర వేసే వరకూ ఎదురు చూడటం దేనికి! మనమే ముందు దాన్ని స్వాగతిస్తే పోలా! రంగురంగుల పామ్ పామ్ లతో తయారు చేసిన బట్టలు, వస్తువులు, ఆభరణాలు మార్కెట్లో ఉన్నాయి. ఆన్ లైన్లో చాలా చీప్ గా కూడా దొరుకుతున్నాయి. కావాలంటే విడిగా కూడా పామ్ పామ్ లు దొరుకుతాయి. పది మి.మీ., ఇరవై మి.మీ. అంటూ సైజును బట్టి ఉంటాయి. యాభై పామ్ పామ్ లు ఉండే ప్యాక్ ఆన్ లైన్లో నూట యాభై రూపాయలకి దొరికేస్తుంది. కావాలంటే కొనుక్కుని మనమే మనకిష్టమైన వాటికి అటాచ్ చేసుకోవచ్చు. పామ్ పామ్ ఫ్యాషన్ తో అదరగొట్టేయొచ్చు. లేట్ చేయకండి మరి!

 

 

- Sameera