పవన్ భయపడ్డాడు, మహేష్ త్వర పడ్డాడు
on Mar 22, 2018
శ్రీమంతుడు విడుదలయిన కొత్తలో ఆ సినిమా పవన్ కళ్యాణ్ చేసుంటే బాగుండేదని కొందరు అభిప్రాయ పడ్డారు. అందుకు కారణం లేకపోలేదు. రాజకీయాల్లోకి రావాలనుకున్నాడు కాబట్టి ఆ సినిమా చేసుంటే పవన్ కి మైలేజ్ వచ్చేది అనేది వారి వాదన. శ్రీమంతుడు లాంటి సూపర్ హిట్ ఇచ్చిన దర్శకుడు కొరటాల శివ తో ప్రస్తుతం మహేష్ బాబు భరత్ అనే నేను సినిమా చేస్తున్నాడు. షూటింగ్ చివరి దశలో ఉన్న భరత్ అనే నేను ఏప్రిల్ 20 న ప్రేక్షకుల ముందుకి వస్తుంది. పొలిటికల్ డ్రామా గా తెరకెక్కుతున్న ఈ సినిమాలో మహేష్ బాబు ముఖ్యమంత్రి గా కనిపించనున్నాడు. గత చిత్రాలకు సొంతంగా కథ రాసుకున్న శివ, ఈసారి మాత్రం శ్రీహరి నాను అనే కొత్త రచయిత దగ్గర స్టోరీ తీసుకున్నాడు. కథ రాసే సమయంలో, శ్రీహరి మనసులో పవన్ కళ్యాణ్ ఉన్నాడట. స్క్రిప్ట్ పనులు పూర్తవగానే పవన్ ని కలిసి నరేషన్ ఇచ్చాడట. కథ నచ్చినప్పటికీ, పవన్ ఆ సినిమా చేసేందుకు భయపడ్డాడట. అందుకు కారణం, సినిమాలో హీరో సీఎం కాబట్టి తనకు సీఎం అవ్వాలనే కోరిక ఉందనే తప్పుడు సిగ్నల్స్ వెళ్తాయని అభిప్రాయ పడ్డాడట. ఇక ఆ కథ కొరటాల దగ్గరికి వెళ్లిన తర్వాత, మహేష్ బాబు వెంటనే ఓకే చేసాడట. గతంలో కూడా పవన్ కళ్యాణ్ కొన్ని సినిమాల్ని రిజెక్ట్ చేయగా అవి సూపర్ హిట్టయ్యాయి. మరి, ఈ సారి ఏం జరుగుతుందో చూడాలి.