జపాన్ ప్రధాని భార్యను ఏడిపించిన అతిలోకసుందరి
on Jun 13, 2014
బాలనటిగా తెరమీదకొచ్చి, అతిలోకసుందరిగా దేశవ్యాప్తంగా అభిమానులను సంపాదించుకున్న శ్రీదేవి ఒక కొత్త అభిమానిని సంపాదించుకున్నారు. పదిహేనేళ్ల పాటు సినిమాలకు దూరంగా వున్న ఆమె నటించిన చిత్రం 'ఇంగ్లిష్ వింగ్లిష్'. హౌజ్వైఫ్ పాత్రలో, చాలా సాదాసీదగా కనిపించి, తన నటనతో అందరినీ ఆకట్టుకుంది. ఈ చిత్రాన్ని తాజాగా జపాన్ భాషలో డబ్ చేశారు. జూన్ 28న అక్కడ విడుదల చేయబోతున్న ఈ చిత్రం ప్రిమియర్ షో జపాన్లో ఏర్పాటు చేశారు. దీనికి జపాన్ దేశ ప్రధాని భార్య అకా ఆబె ప్రత్యేక అతిధిగా వచ్చారు. ఆమె ఈ చిత్రంలో కొన్ని సున్నితమైన సన్నివేశాలను చూసి ఆమె కంటతడి పెట్టిందట. ఆ తర్వాత ఆమె ఈ చిత్రం గురించి ప్రశంసల జల్లు కురిపించారట. గ్లామర్ క్వీన్ గా హిందీ పరిశ్రమను ఏలిన శ్రీదేవి, వయసుమళ్లిన పాత్రలో ఎంతో మందిని ఆకట్టుకుంది. దేశ విదేశాలలో తన నటనతో అభిమానులను నేటికి సంపాదించుకుంటోంది. ఇంతే కాదు, శ్రీదేవి ఇకపై సినిమాలు కొనసాగిస్తున్నట్టు ప్రకటించింది. తాజాగా తమిళ సినిమా ఒకటి ఓకే కూడా చేసిందట.