పవన్ కోసం `క్యూ` ఎక్కువైంది!
on Feb 25, 2015
పవన్ కల్యాణ్ ఆఫీసు ముందు రేషన్ క్యూలా.. దర్శకుల, నిర్మాతల క్యూ రోజు రోజుకీ ఎక్కువైపోతోంది. గబ్బర్ సింగ్ 2 చేస్తానని సంపత్ నందికి హ్యాండిచ్చాడు పవన్. గబ్బర్ సింగ్ 2 కోసం రెండేళ్లు టైం వేస్ట్ చేసుకొని.. ఇప్పుడు ప్రశ్చాత్తప పడుతున్నాడు సంపత్ నంది. దాంతో... పవన్ సంపత్తో మళ్లీ ఓ సినిమా చేస్తానని మాటిచ్చాడు. బెంగాల్ టైగర్ అయిపోయాక.. సంపత్ మళ్లీ పవన్ కోసం వచ్చేస్తాడు. గోపాల గోపాల జరుగుతున్నప్పుడే దర్శకుడు డాలీకి కూడా ప్రామిస్ చేశాడు. `డాలీతో మరో సినిమా చేస్తా.` అని ఆడియో ఫంక్షన్లోనూ చెప్పాడు. ఆ తరవాత ఆ ఊసే ఎత్తలేదు. పీవీపీ బ్యానర్లో పవన్ ఓ సినిమా చేయాలి. పవన్ కోసం ప్రసాద్ పొట్లూరి కథలు వినడం మొదలెట్టేశారు. కథ ఓకే అయితే మరి పవన్ ఏమంటాడో..?? పవన్తో ఓ సినిమా చేయాలని దిల్రాజు ఎప్పటి నుంచో ప్లానింగ్. పవన్ కోసం కొన్ని కథలూ రెడీ చేసుకొన్నాడు. పవన్ కల్యాణ్ కూడా దిల్ రాజుకి ఓ సినిమా చేసిపెడతానని చెప్పాడు. ఆ సినిమా ఇప్పటి వరకూ అత్తాపత్తా లేదు. మిత్రుడు త్రివిక్రమ్తో ముచ్చటగా మూడో సినిమా గురించి ఎప్పటి నుంచో ప్లానింగ్. బన్నీ సినిమా పూర్తయ్యాక త్రివిక్రమ్ పవన్ సినిమాపైనే ఫోకస్ పెడతారని చెప్పుకొంటున్నారు. ఇప్పుడు దాసరి కూడా రెడీ అయిపోయారు. త్వరలోనే పవన్తో ఓ సినిమా చేయబోతున్నా అని అధికారికంగా ప్రకటించారు ఆయన. చూస్తుంటే ఈ క్యూ ఇప్పట్లో ఆగేట్టు లేదు. మరో వైపు పవన్ కల్యాణ్ ప్రతీ పనీ నిదానంగా చేసే టైపు. ఒకొక్క సినిమాకీ యేడాదైనా టైమ్ తీసుకొంటాడు. గబ్బర్ సింగ్ 2 ఈ యేడాది పూర్తయితే అదే పది వేలు. మరి ఈ సినిమాలన్నీ ఎప్పుడు మొదలవుతాయో.. ఎప్పుడు పూర్తవుతాయో.. ఆ బ్రహ్మాదేవుడికే ఎరుక.