విజిల్ ఊదుతున్న ‘బాహుబలి’ సృష్టికర్త!

‘బాహుబలి’ సృష్టికర్త రాజమౌళి విజిల్ ఊదుతున్నారు. సాధారణంగా రాజమౌళి తన సినిమాల షూటింగ్‌లో తాను తీయబోతున్న ప్రతి సన్నివేశంలో నటీనటులు ఎలా నటించాలో తానే నటించి చూపిస్తూ వుంటారు. దీనిప్రకారం ‘బాహుబలి’ సినిమాలో ఏదో విజిల్ వేసే సీన్ వుండి వుంటుంది. దానికోసం రాజమౌళి విజిల్ ఊది చూపించి వుంటారని అనుకుంటున్నారా? కాదు.. రాజమౌళి విజిల్ ఊదింది సినిమా ‘బాహుబలి’ కోసం కాదు.. రాజకీయాల్లో ‘బాహుబలి’ కోసం. అవినీతిరహిత రాజకీయాలు చేయడానికి, అవినీతిపరులను రాజకీయాల నుంచి తప్పించడానికి ‘బాహుబలి’ లాంటి యోధుడిలా పనిచేస్తున్న జయప్రకాష్ నారాయణ కోసం! జయప్రకాష్ నారాయణ స్థాపించిన ‘లోక్‌సత్తా’ పార్టీకి రాజమౌళి మొదటి నుంచీ మద్దతు ఇస్తున్నారు. ఇప్పుడు ఎన్నికల సందర్భంగా లోక్‌సత్తా రూపొందించిన ఒక ప్రకటనలో రాజమౌళి నటించారు. నటించారు అనడం కంటే, ఓటర్లకి ఒక సందేశం ఇచ్చారని చెప్పడం బెటరేమో. సదరు ప్రకటనలో కనిపించిన రాజమౌళి- ‘మీ ఓటు కొనాలని ప్రయత్నించే రాజకీయ నాయకులను తరిమికొట్టంది’ అని ఓటర్లకి చెప్పి, శ్రీకృష్ణుడు, అర్జునుడు శంఖాలు ఊదిన లెవల్లో విజిల్ ఊదారు. ఈ ప్రకటన మిగతా రాజకీయ పార్టీల ప్రకటనల కంటే చాలా ఉన్నత స్థాయిలో వుందన్న అభిప్రాయాలు వ్యక్తమవుతున్నాయి.