శాంతి దూత గాంధీజీ హత్యకు గురయ్యారు. అదే బాటలో ఆయన శిష్యుడు అన్నా హజారే కూడా హత్యకు గురి కాబోతున్నారా? తాజా పరిణామాలు ఈ భయాన్ని కలిగిస్తున్నాయి. అన్నా హజారేని చంపేస్తానని ఒక ప్రవాస భారతీయుడు ఫేస్‌బుక్‌లో కామెంట్ పెట్టాడు. ‘అన్నా హజారే టైమ్ అయిపోయింది. ఆయన్ని చంపే టైమ్ వచ్చింది. కాబోయే నాథూరామ్ గాడ్సేని నేనే’’ అని కెనడాకు చెందిన ఒక ఎన్నారై గగన్ విధు తన ఫేస్‌బుక్ అకౌంట్లో పోస్టు పెట్టాడు. దాంతో అన్నా హజారే మద్దతుదారులు బెదిరిపోయి పోలీసులకు ఫిర్యాదు చేశారు. ఏనాటి నుంచో అలుపెరుగని ఉద్యమాలు చేస్తున్న అన్నా హజారే జన లోక్‌పాల్ బిల్లు ఆమోదం కోసం తన పోరాటాన్ని కొనసాగిస్తున్నారు. తాజాగా ఆయన 1100 కిలోమీటర్ల పాదయాత్రను కూడా ప్లాన్ చేశారు. ఈ నేపథ్యంలో ఆయనను చంపుతానని ఒక వ్యక్తి ఫేస్‌బుక్‌లో పేర్కొనడం హజారే మద్దతుదారులకు ఆందోళన కలిగిస్తోంది. అన్నా మద్దతుదారుల ఫిర్యాదు అందుకున్న పోలీసులు గగన్ విధు మీద, అతనికి సహకరించిన నీల్ అనే వ్యక్తి మీద ఎఫ్.ఐ.ఆర్. నమోదు చేశారు. ఇదిలా వుంటే, తన మీద ఎఫ్.ఐ.ఆర్. నమోదు కావడం పట్ల గగన్ విధు ఫేస్‌బుక్‌లో సంతోషాన్ని వ్యక్తం చేశాడు.
.webp)
.webp)
.webp)
