నర్సుకి ఇబోలా... అమెరికాలో ఎలర్ట్

ఇప్పటి వరకూ ఆఫ్రికన్ దేశాలను హడలెత్తిస్తున్న ఇబోలా వ్యాధి ఇప్పుడు అమెరికాని కూడా భయపెడుతోంది. అమెరికాకు చెందిన థామస్ ఎరిక్ డంకన్ అనే వ్యక్తి లైబీరియా నుంచి సెప్టెంబర్ 20న డల్లాస్‌కి వచ్చాడు. డల్లాస్‌కి వచ్చిన తర్వాత అతనికి ఇబోలా వైరస్ సోకిందని తెలిసి హడలిపోయిన అమెరికా అతనికి ప్రత్యేక పద్ధతులలో చికిత్స నిర్వహించింది. అయితే 42 సంవత్సరాల వయసు వున్న డంకన్ ఆ తర్వాత చనిపోయారు. డంకన్‌కి చికిత్స చేసిన ఒక అమెరికన్ నర్సుకు కూడా ఎబోలా వ్యాధి వైరస్ సోకినట్టు కనుగొన్నారు. డంకన్ దగ్గరకి చికిత్స నిమిత్తం వెళ్ళిన సమయంలో నర్స్ సరైన రక్షణ పద్ధతులు పాటించకపోవడం వల్ల సదరు నర్సుకు కూడా ఎబోలా వ్యాధి వచ్చినట్టు తెలుస్తోంది. ఇప్పుడు ఎబోలా వ్యాధి ఇంకా విస్తరించకుండా వుండటానికి అమెరికా ప్రభుత్వం ప్రయత్నాలు ప్రారంభించింది.