కారులో కాలిపోయిన డబ్బు కోటి పైనే?

నల్గొండ జిల్లా సూర్యాపేట దగ్గర ఒక ఇన్నోవా కారులోని ఇంజన్ దగ్గర పెట్టిన డబ్బు దగ్ధమైంది. ఈ కారు కాంగ్రెస్ పార్టీ నాయకుడు ఉత్తమ్ కుమార్ రెడ్డికి చెందినట్టు తెలుస్తోంది. ఎన్నికలలో పంచేందుకు తీసుకెళ్తున్న డబ్బు పోలీసుల కంట పడకుండా వుండాలన్న ఉద్దేశంతో కారు ఇంజన్ దగ్గర పెట్టగా ఇంజన్‌లో వేడికి ఇంజన్ పక్కనే వున్న డబ్బు కాలిపోయినట్టు తెలుస్తోంది. డబ్బు తీసుకెళ్తున్న ఇన్నోవా మీద ఉత్తమ్ కుమార్ రెడ్డికి చెందిన ఎమ్మెల్యే స్టిక్కర్ అతికించి వుంది. ఈ కారు ఉత్తమ్ కుమార్ రెడ్డి తండ్రి పేరు మీద రిజిస్టర్ అయి వున్నట్టు తెలుస్తోంది. ఈ సంఘటలో మొత్తం కోటి రూపాయలకు పైనే డబ్బు కాలిపోయిందని పోలీసులు అనుమానిస్తున్నారు. ఈ సంఘటనకు సంబంధించిన పూర్తి వివరాల కూపీ లాగేందుకు పోలీసులు ప్రయత్నిస్తున్నారు.