కంబళ పోటీల్లో మరో ఉసేన్ బోల్ట్‌.. శ్రీనివాస గౌడ రికార్డ్ బ్రేక్

కర్ణాటకలో నిర్వహించే సంప్రదాయ కంబళ పోటీల్లో శ్రీనివాస గౌడ అనే యువకుడు 100 మీటర్ల దూరాన్ని 9.55 సెకన్లలో పరుగెత్తితే దేశం మొత్తం ఆశ్చర్యపడింది. ఉసేన్ బోల్ట్ 9.58 సెకన్ల వరల్డ్ రికార్డుతో పోల్చుతూ అతన్ని ఆకాశానికెత్తింది. అయితే, కంబళ వీరుడు శ్రీనివాస గౌడ ఉసేన్ బోల్ట్ రికార్డును బద్దలు కొట్టాడన్న వార్త వెలుగుచూసి వారం రోజులైనా కాలేదు. అప్పుడే మరో సంచలన రికార్డు నమోదైంది. కంబళ టోర్నీలో భాగంగా తాజాగా జరిగిన పోరులో శ్రీనివాస గౌడ రికార్డు బద్దలైంది. నిశాంత్ శెట్టి అనే యువకుడు 100 మీటర్ల దూరాన్ని కేవలం 9.51 సెకన్లలోనే అధిగమించి ఔరా అనిపించాడు. నిశాంత్ శెట్టి కర్ణాటకలోని బజగోళి జోగిబెట్ట ప్రాంతానికి చెందినవాడు. ఈ పోటీల్లో నిశాంత్ శెట్టి మొత్తం 143 మీటర్ల దూరాన్ని 13.68 సెకన్లలో పూర్తి చేశాడు.