మెగా ఫ్యామిలీలో చీలిక

పవర్ స్టార్ పవన్ కళ్యాణ్ రాజకీయ రంగ ప్రవేశం గురించి ప్రజలందరూ ఆసక్తిగా ఎదురుచూస్తుంటే, చిరంజీవి కాంగ్రెస్ పార్టీలో ఉన్న కారణంగా, పవన్ కళ్యాణ్ కు ఇంటిపోరు తప్పడం లేదు. ఆయన సోదరుడు నాగబాబు మీడియాతో మాట్లాడుతూ, తమకు తమ అన్నయ్య చిరంజీవే దారి చూపాడని అందువల్ల ఆయన చూపిన బాటలోనే, ఆయననే అనుసరిస్తూ ముందుకు సాగుతానని చెప్పారు. తాను చిరంజీవికే మద్దతు పలుకుతానని విస్పష్టంగా చెప్పారు. ఇకపై మెగా ఫ్యామిలీలో మిగిలిన హీరోలు అల్లు అర్జున్, శిరీష్, వరుణ్ తేజ తదితరులు అందరూ కూడా వారి బాటేపట్టే అవకాశం ఉంది. గనుక పవన్ కళ్యాణ్ ఒంటరి అయిపోయినట్లే భావించవచ్చును. అదేవిధంగా మెగాభిమానులు కూడా ఎటువైపు మొగ్గాలనే సందిగ్ధంలో ఉన్నారు కనుక వారిలో కూడా చీలిక రావడం తధ్యం. రేపు పవన్ కళ్యాణ్ తన పార్టీ, తన ఆశయాలు, ఆంధ్ర, తెలంగాణా అంశాలు, సమైక్యవాదం, బలహీన వర్గాలు వగైరా అంశాల గురించి మాట్లాడిన తరువాత ప్రజలు, అభిమానులు, రాజకీయ పార్టీలు కూడా స్పందించడం మొదలుపెడతాయి. దానిని బట్టి పవన్ కళ్యాణ్ వెంట ఎంత మంది నడుస్తారో, ఎవరెవరు నడుస్తారో అనే అంశంపై మరింత స్పష్టత వస్తుంది.