పండగ పుణ్యమాని.. తగ్గిన ఖర్చు

ఈసారి ఎన్నికల్లో పోటీచేస్తున్న అభ్యర్థులకు ఉగాది పండుగ కలిసొస్తోంది. ఈ నెల 30వ తేదీ ఆదివారం నాడు మునిసిపల్ ఎన్నికలున్నాయి. ఆ మర్నాడే ఉగాది పండుగ. అంటే రెండు రోజులు సెలవులొస్తున్నాయి. ఎటూ రెండు రోజులు సెలవులు వస్తాయి కాబట్టి, వేర్వేరు నగరాల్లో స్థిరపడినవాళ్లు కూడా సొంతూళ్లకు తమంతట తామే వస్తారు. పండుగ పుణ్యమా అని ఆయా డివిజన్లలోని అభ్యర్థులకు కొంత ఖర్చు తగ్గినట్టవుతుంది. ఒకవేళ ఉగాదికి వాళ్లు రాకపోతే దూర ప్రాంతాల్లో ఉన్న ఓటర్లను రవాణా చార్జీలు భరించి తీసుకురావాల్సి వచ్చేది. ప్రతిసారీ స్థానిక ఎన్నికల్లో, ముఖ్యంగా పంచాయతీ ఎన్నికల్లో అయితే హైదరాబాద్ నుంచి రాష్ట్రంలోని వివిధ ప్రాంతాలకు కేవలం ఓట్లు వేయించుకోడానికే భారీ సంఖ్యలో ఓటర్లను వోల్వో బస్సుల్లో తీసుకెళ్లేవారు. ఇప్పుడు ఆ ఖర్చు మొత్తం తగ్గిపోయినట్లయింది.