నాన్నకు ఓటేశా.. చిక్కుల్లో ట్రంప్ కొడుకు..
posted on Nov 9, 2016 7:22AM
అమెరికా అధ్యక్ష ఎన్నికలు నిన్న జరిగిన సంగతి తెలిసిందే. ఈ ఎన్నికల కౌంటింగ్ ఇంకా కొనసాగుతూనే ఉంది. అయితే ఈ ఎన్నికల నేపథ్యంలో ఇప్పుడు రిపబ్లికన్ పార్టీ అభ్యర్థి డొనాల్డ్ ట్రంప్ తనయుడు ఎరిక్ ట్రంప్ చిక్కుల్లో పడ్డాడు. అసలు సంగతేంటంటే..ఎరిక్ ట్రంప్ ఓటు వేసిన అనంతరం మా నాన్నకు ఓటు వేశాను అని.. అమెరికా ఉజ్వల భవిష్యత్కు ఆయన కృషి చేస్తారు అని చెబుతూ ట్వీట్ చేశాడు. ఇందులో తప్పేముంది అతని తండ్రికి ఓటు వేశాడు.. చెప్పుకున్నాడు అనుకుంటున్నారా.. అక్కడే వచ్చిపడింది చిక్కంతా.. ఎందుకంటే... న్యూయార్క్ రాష్ట్ర నిబంధనల ప్రకారం ఓటు వేసిన అనంతరం తాము ఎవరికి ఓటు వేశామో ప్రకటించడం చట్ట వ్యతిరేకం. దీంతో ఈ నిబంధనల ప్రకారం ట్రంప్ తనయుడిపై అధికారవర్గాలు ఏలాంటి చర్య చేపట్టనున్నారో అన్న అంశంపై ఉత్కంఠ ఏర్పడింది. ఇదిలా ఉండగా తాను ట్వీట్ చేసిన కొద్ది సేపటికే ఎరిక్ ట్రంప్ పోస్ట్ తీసేశాడు. మరి చూద్దాం న్యూయార్క్ చట్టం ఎరిక్ ట్రంప్ పై ఎలాంటి చర్యలు తీసుకుంటుందో..