ఆహుకుడు

Aahukudu

నలుడు పూర్వజన్మలో ఆహుకుడనే భిల్లుడిగా జన్మించాడు. అతడు శివభక్తుడు. అతని భక్తిని పరీక్షించేందుకు శివుడు ఒక ముని రూపంలో అతని వద్దకు వచ్చి, అతని ఇంట్లో తనకు ఆశ్రయమివ్వమని కోరాడు. ఆహుకుడికి, అతని భార్యకు ఉన్న చోటు అతి తక్కువ కావడంతో మునికి, తన భార్యకు ఇంట్లో చోటిచ్చి, తను ఆరుబయట నిద్రించాడు. ఆ సమయంలో ఒక పులి అతడిని చంపేస్తుంది. అతని భార్య సహగమనం చేయబోగా, ఆ ముని ఏదైనా కోరుకోమని ఆహుకుడి భార్యకు చెప్పగా, ఆమె “మీకు తోచింది ఇవ్వ’’మంది. అప్పుడు శివుడు నిజరూపంలో ప్రత్యక్షమై, వచ్చే జన్మలో మీరు నలదమయంతులుగా పుడతారని, వారిమధ్య వియోగం వచ్చినప్పుడు తాను హంస రూపంలో వారిద్దరినీ కలుపుతానని వరమిస్తాడు. ఆ వరప్రభావంతో ఆహుకుడే నలుడిగా జన్మించాడు. అతని భార్య దమయంతిగా పుట్టింది.